Шаерамы ортчиз дано адямиосты сӥлы карон ужрад

Удмурт Дунне
By Удмурт Дунне Ноябрь 9, 2015 13:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмуртилэн дано гражданинэз» нимен пусъемъёслэн лыдзы 2 муртлы унояз: та пусэн лента ошемын Зинаида Боткиналэн но Виктор Походинлэн пельпумазы.

Данъян пул вылэ пыртэмъёсты, Удмуртилэн дано гражданинэз луэмъёсты но Удмуртилэсь Кун премизэ басьтэмъёсты сӥлы карон ужрад ортчиз Удмурт Элькунлэн Тӧроезлэн резиденцияз. Кун приём ортчиз Калык огазеяськон нуналэз но Удмуртилэн кунлык басьтэмез дырысен 95 ар тырмонэз пусъён улсын.

Та нуналэ резиденциысь куно пумитан зал эшшо но яркытгес луиз кадь — одӥг интые люкаськизы тужгес йӧно, ужзэс яратӥсь адямиос. Пӧлысьтызы пумиталод Удмуртилэсь дано гражданинзэ но, заводысь огшоры слесарез но, кун службалы уно аръёссэ сӥзем муртэ но, эмъясез но.

«Удмуртилэн дано гражданинэз» нимен пусъемъёслэн лыдзы 2 муртлы унояз: та пусэн лента ошемын Зинаида Боткиналэн но Виктор Походинлэн пельпумазы. Зинаида Яковлевналэн нимыз уноезлы тодмо. Эгра ёросысь Щербет гуртын вордскем нылаш ужан сюрессэ мытӥз гурт библиотекаысен. Вань сюлэмзэ сётыса тыршемез сое кивалтӥсёзь ӝутӥз: 1982-тӥ арысен ужаз Удмурт АССР-ысь Министръёслэн Советсылэн председателезлэн воштӥсез луыса, кыл кутӥз социальной удыс понна. Со сюлмаськемен, пуктэмын Ижысь операя но балетъя театр, радъямын «Лудорвай» музей-заповедник но трос мукетыз. Шутэтскыны потыса но, Зинаида Боткина тэк улонэз уг тоды: кивалтэ Россиысь синпелетъёсты утёнъя огазеяськонлэн Удмуртиысь ёзэныз, элькунысьтымы Ветеранъёслэн огазеяськонзылэн президиумезлэн ёзчиез луэ.

Виктор Походин но пенсиын ни ке но, гань-гань пукыны солы мӧзмыт: пыриське калык огазеяськонъёсы, визь-кенешен юрттэ юристъёслы. Со вордскемын Брянск палъёсын, но татчы распределение пыр вуыса, пыраклы синмаськиз Удмурт шаерлы. 40 ар тыршиз югдурез утён удысын, 17 ар ӵоже вал Удмуртилэн прокурорез, со дышетэм улсын кыдамын  элькунысьтымы тужгес визьмо прокуроръёс, следовательёс. Нош кӧня йыружъёсты сэрттоно-пертчоно луиз Виктор Михайловичлы! Со сяна, ӵапак со тыршон вакытэ тупаз огыр-бугыр вакыт: совето властьлэн куашкамез, перестройка. Но удысме мон котьку нуи кунмылэн Валтӥсь законэзъя, шуэ Виктор Михайлович.

Наука но технологиос удысын Кун премиен пусъемъёс пӧлын туэ нош ик висъяськизы оборона комплексын тыршисьёс. ТОР-М2 ожгар машиналэн командирезлы чаклам тренажёр кылдытэмзы понна пусъемын Ижысь «Купол» заводлэн коллективез. Ракетаосты поттонын вормонъёс басьтэмзы понна данъямын «Аксион» предприятиын тыршисьёс но. Нош пыӵал тӥрлык поттонэ выль технологиосты пыӵатэмзы понна премия сётэмын «Калашников» концернысь коллективлы.

NIK_9406_00004 фото Карипов Э

«Тӥ милям данъяськонмы! Тӥ шоры учкыса, оскон кылдэ: котькыӵе шуг-секытъёс мед луозы — ваньзэ вормом! «

Кун премиен пусъемын Вотка ёросысь «Пихтовка» хозяйствоын тыршисьёс — чорыг будэтонын выль амалъёсты кутэмзы понна.

Искусствоез азинтэмзы понна Удмуртилэн Кун премиеныз пусъемын Ӟуч театрысь артистъёс: соос лауреат луизы «Человек-подушка» спектаклез дасямзы понна. Тӧро вӧзын мусо адскизы 2 удмурт нылкышноос: литература удысын кун премилэн лауреатэзлэн пусэз сётэмын Анай кылэз дышетонъя научно-исследовательской институтысь Юлия Байтеряковалы но Надежда Боталовалы. Соос сюлмаськемъя поттэмын удмурт нылпиослы учебникъёс.

Элькунмылэн Данъян пул вылаз пыртэмын история наукаосъя доктор, Удмурт кун университетысь профессор, наукая 300 ужъёслэн авторзы Римма Голдина,  Сюресъёсъя управленилэн Пичи Пурга ёросъя ёзысьтыз машинист Иван Елышев, Вотка ёросысь «Июльское» хозяйствоысь скал кыскись Татьяна Пьянкова, Алнаш ёросысь «Молодая гвардия» эштослэн кивалтӥсез Михаил Крылов, «Киясовский» хозяйствоысь парсь вордӥсь Людмила Козырева, Якшур-Бӧдья ёросысь «Родина» хозяйствоысь водитель Юрий Шабалин, Кизнер ёросысь «Звезда» хозяйствоысь валтћсь агроном Гаврил Загуменнов  но трос мукетъёсыз. П. Чайковскийлэн вордскемез дырысен 175 ар тырмонэз пусъён улсын данъямын быдӟым композиторлэн Воткаысь музей-усадьбаяз тыршисьёс. Сӥлы каремын Нырысетӥ элькун больницаысь хирургияя служба, Пичи Пурга ёросысь  нылпиослы чаклам спортшколаын тыршисьёс но уно мукетъёсыз. Ужрадэз йылпумъяса, Александр Соловьёв шуиз:

— Тӥ милям данъяськонмы! Тӥ шоры учкыса, оскон кылдэ: котькыӵе шуг-секытъёс мед луозы — ваньзэ вормом!

Елена Тугашова

Удмурт Дунне
By Удмурт Дунне Ноябрь 9, 2015 13:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<