Владимир Невоструев: Бырйисьёсты кылзоно но кылоно

Удмурт Дунне
By Удмурт Дунне 9 ноября, 2015 11:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртилэн кунлык басьтэмез дырысен 95 ар тырмиз. Кыӵеен адӟиське шаермы мукет улосъёс пӧлын? Мар бурдъя но мар малпаськытэ? Та но мукетыз сярысь вераськиськом Кун Кенешлэн Тӧроеныз Владимир Невоструевен.

112

Кун Кенешлэн Тӧроез В. Невоструев: удмурт кылэз валасьёсын тыршисько анай кылыным ик вераськыны.

 

— Владимир Петрович, Удмурт Республикалы ним сётэмын вашкала дырысен татын улӥсь калыкъя — удмуртъёсъя. Нош асьтэос тӥ ӵем-а удмурт сямен вераськиськоды?

— Удмурт кылэз валасьёсын тыршисько анай кылыным ик вераськыны, тужгес но аслам округам — Юкаменск, Яр ёросъёсы — калыкен пумиськонъёсы потӥсько ке. Отын дорам ӵем гинэ лыкто удмурт песянайёс. Соослы ваньзэ асьсэ кылынызы рос-прос валэктӥськод ке, мылкыдзы каньылгес луэ. Ачим но шумпотӥсько огкыл шедьтэммылы, югдурез сэрттыны быгатэмелы.

Нош Кун Кенешын тросгес вераськоно луэ ни ӟуч сямен, уноез депутатъёс удмуртсэ уг валало. Озьы ке но ар ӵоже парламентын радъяськизы удмурт кылэз дышетонъя курсъёс. Отчы 30 пала адями ветлӥз. Валамон, ваньзы ик удмурт сямен вераськыны ӧз дыше, но удмурт кыллэсь чеберлыксэ, аспӧртэмлыксэ валазы. Нош Кун Кенешлэн Тӧроезлэн нырысетӥ воштӥсез Светлана Кривилёва вераськыны но пӧрмытэ ни, пумиськыку но котьку удмурт сямен вазе, туж тырше. Мон шумпотӥсько со понна.

Вуылыны тыршисько бадӟым удмурт ужрадъёсы, концертъёсы. Тани али гинэ ветлӥ Удмурт театре «Вуж Мултан» спектакльлэн премьераяз. Туж бугырес мылкыд кылиз. Шумпотӥсько: асьмелэн вань луонлыкмы анай кылын кырӟанъёс кылзыны, книга-газет лыдӟыны, спектакльёс учкыны. Нош удмурт кыл, удмурт кырӟан Россиысь бадӟым сцена вылысен чузъяське ке, быдэс мугор данъяськонэн пыӵа. Мон адӟи, макем шуныт мылкыдын пумитазы асьме Брангурт песянайёсмес Кун Думаын но Федерация Кенешын. Удмурт Элькунлэн нуналъёсыз отын туж зол ортчизы.

— Чаклано ке, берло дыре республикамы федералъёс азьын ассэ ялан юнгес но яркытгес возьматыны тырше. Туэ Москваын Удмуртилэн арез ортчемъя со тужгес ӟеч адӟиськиз. Кызьы дунъяськоды пичи гинэ шаермылэсь огъя Россиын интызэ?

— Кунмылэсь картазэ чаклано ке, Удмурт музъем зэмзэ но туж пичи. Но паймоно солэн котыр ласянь аспӧртэм луэмезлы. Пичи шаерамы 300-лэсь трос бадӟым предприятиос ужало. Россиын лэсьтӥськись вань пыӵал тӥрлык пӧлысь 95 процентэз поттӥське Удмурт Республикаын!

Гурт хозяйствоын но луонлыкъёсмы бадӟымесь. Та удысысь 350 пала бадӟым но шоро-куспо огазеяськонъёс республикамес быдэсак сямен сюдыны пӧрмыто, эшшо вуззэс палэнэ вутто на. Шаерамы поттэм сиён-юон Россиысь 60-лэсь ятыр регионъёсы вуэ, мукет кунъёсы кошке. Юнме ум шуиське ук: Удмуртиын йӧл поттонэз араз 1 миллион тоннаозь вуттоно. Сыӵе ужпум пуктэ элькунмылэн Тӧроез Александр Соловьёв. Малпасько, та уж быдэстымон.

Удмурт шаермы данъяське быдэс дуннелы тодмо Михаил Калашников конструкторен но Пётр Чайковский композиторен. Ма, вань быгатэммес, данъяськонмес веран понна трос гинэ дыр кулэ луоз. Ваньмыз со туж ӟеч возьматэмын вал Россиысь Кун Думаын но Федерация Кенешын Удмуртилы сӥзем нуналъёс дыръя нимысьтыз вӧл-вӧл адӟытонын. Федералъёс паймемзэс веразы: кризис вакытэ но вуз поттонмес ӧм кулэстэ, ӝожтӥськыса ум ветлӥське.

Пусйысал на: Россиысь парламентын пумиськонъёслы Кун Кенеш но Правительство туж зол дасяськизы. Ужамы огъя командаен. Пыриськимы федерал парламентысь комитетъёслэн заседаниосазы. Оскытӥм, республикамылы ватсаса юрттэт кулэ шуыса, возьматӥм инвестициосъя пӧртэм проектъёсмес. Малпасько, куд-ог дэмланъёсмы федерал законъёс но луозы, нош федерал парламентэн ӟеч кусыпъёсмы республикамес азинтыны юрттозы.

Удмурт Элькунлэн Москваын нуналъёсыз сӥё-дано ворсаськозы 12-тӥ ноябре. Соку Кун Кенеш но Москва городлэн Думаез ӵош ужан сярысь ватсаса огкыл гожтозы на.

— Берытскомы историе. 1938-тӥ арын, Удмуртилэн парламентаз нырысетӥ быръёнъёс ортчыку, депутат луиз 142 адями. Ӝыны палаез — крестьянъёс. Тодӥськомы, 1990-тӥ аръёсы парламентамы 200 депутат вал, бӧрысь — 100, али — 90. Вераськонъёс мыно, та лыдпусэз но кулэстоно шуыса. Тӥляд малпамдыя шонер-а со?

— Та малпанлэн ӟеч но, урод но палъёсыз вань. Одӥг ласянь, али котькуд депутатлэн тыбыр сьӧраз 30 сюрслэсь трос бырйисьёс, соослэсь кулэяськонъёссэс тодон но ужпумъёссэс сэрттон понна депутат толэзьлы быдэ приём нуэ, вазиськонъёсты быдэстыны тырше. Нош парламентэ ӧжытгес адями быръёно ке, округъёс бадӟымалозы, калыклы секытгес луоз ни асьсэ депутатсы дорозь вуыны. Мукет ласянь, депутатъёслэн лыдзы кулэсмиз ке, законъёсын герӟаськем ужпумъёсты ӝоггес сэрттыны, йылаз-пумаз вуттыны луоз.

Та ужпумез эскеронлэсь ми ум палэнскиське, но со борды кутском, дыр, ар ортчыса гинэ.

— Кемалась ӧвӧл федералъёс малпанзэс веразы: асьсэ доходъёссэс шараяны пумит луись депутатъёслэсь мандатъёссэс басьтоно. Кызьы та шоры учкиськоды?

— Ӵапак кык арня талэсь азьло Кун Дума та сярысь законэз куинетӥ лыдӟонъёсын кутӥз. Малпасько, шонер лэсьтӥз. Депутатъёсты калык оскыса быръе, озьыен, соос калык азьын шара луыны кулэ. Асьмелэн Кун Кенешын доходъёссэс ватӥсь депутатъёс вал, но берло дыре ваньзы тыршо шара луыны.

— 2000-тӥ арысен тӥ ужады шаермылэн Правительствояз, Правительстволэн Тӧроезлэн воштӥсез но вал. 8 арзэ ужаськоды Кун Кенешын. Законъёс бордын тыршон-а, быдэсъясь властьын ужан-а тунсыкогес?

— Огинтыяд медад лёгаськы шуыса, уж интыдэ, пе, ӵемгес вошъяно. Та веран шонер, дыр. Выль интыын азьвыл сюлмаськонъёсыд шоры но воксё мукет синмын учкиськод, оскем удысэз выль кужымен, выль мылкыдын быдэсъяны кутскиськод.

Гурт удысъя но сиён-юонъя министерствоен кивалтыкум, тросгес выроно луиз коньдон ужпумъёсын: кытчы кӧня но малы висъяно. Нош Кун Кенешын мон тросгес ужасько адямиосын. Ӵем пумиськылӥсько ветеранъёсын, студентъёсын, заводъёсын но гуртын тыршись огшоры калыкен. Валэктӥсько соослы республикамылэсь огъя политиказэ. Адямиос трос верало асьсэ сюлмаськонъёссы сярысь, дэмланъёссэс сёто. Мон тыршисько соосты кылзыны но кылыны. Законъёс кутыкумы, бырйисьёслэсь малпанъёссэс лыдэ басьтыны выриськомы.

Мон яратӥсько аслэсьтым ужме, тау шуисько оскемзылы. Ӵукна 5 но ӝыны часын султӥсько, бускеленым ӵош 2 но ӝыны иськем бызьылӥсько, зарядка лэсьтӥсько. Нош 8 часын мон уж дурын ни. Мынам ваньмыз минутъёсын гожъямын: кенешъёс, пумиськонъёс, документъёсын ужан, командировкаос… Ужан нуналы ӝыт 8 час котырын йылпумъяське, куддыръя солэсь но бергес.

— Владимир Петрович, тӥляд быдэс улонды Удмурт шаерен герӟаськемын: «Трактор» колхозысь огшоры механик бордысен кутскыса, будӥды республикаысьтымы парламентлэн Тӧроез дорозь. Оло, мукет сямен уг но луы вал: вордӥськиды Элькунмылэн нуналаз, 4-тӥ ноябре. Туэ та нуналэз кызьы пусйиды?

— Семьяеным ӵош. Матысь адямиосын одӥг ӝӧк сьӧрын гань-гань пукыны, вераськыны ӵем уг кылдылы: кузпалы, пие, нылы, пичи внучкае… Ӝӧк выламы тросгес вал бакчаысьтымы сиёнъёс, емышъёс. Кузпалыным ми ваньзэ асьме киосынымы будэтӥськом. Ма, гурт ужлы пичи дырысен дышемын, 4-тӥ классысен арлы быдэ гужем ужай колхозын, пудо сиён дасяй, уриськи… Малпасько, пичи дырысен ик уж дышетӥз монэ улонэз, адями кусыпъёсты валаны, аслэсьтыд вордӥськем интыдэ яратыны, гуртысь ужась калыкез гажаны.

Котькыӵе кун, котькыӵе улос кужмо луэ аслаз адямиосыныз. Удмурт Элькунлы 95 ар тырмемен валче мынам калыкмылы тау кареме потэ: тӥляд нуналмысь тыршемды бордын Удмуртилэн азинсконэз.

Елена Миннигараева

 

Удмурт Дунне
By Удмурт Дунне 9 ноября, 2015 11:44