Якшур-Бӧдья ёросысь пӧйшурасез гондыр куртчылӥз

Удмурт Дунне
By Удмурт Дунне 19 октября, 2015 09:00
067600,животные,выставка охота,рыбалка

Гондыр бадӟым ке но, тэлетӥ шыпыт поръя. Сьӧсь азяд сылэ ке ини, бызьыса кошкыны уг яра! Синъёсаз пыр-пыр учкон но — мултэс.

Шаерысьтымы Роспотребнадзорлэн эпидемиологияя ёзэзлэн кивалтӥсез Вера Данилова верамъя, пиосмурт ёросысь тэльын пӧйшура вылэм. Ӵапак соку гондыр вылаз омырскем. Таӵе пумиськонын ӵем дыръя адями улэп уг кыльы. Та рад воргоронлы удалтэм.

Инкуазез утёнъя но инкуазь узырлыкъёсъя министр Александр Нестеров ивортэ: та вакытлы шаерысьтымы нюлэсъёсын улэ-вылэ 1 сюрс 155 гондыр. Та лыдпусъя Приволжск федерал округын асьмеос 4-тӥ интыын сылӥськом. Сьӧсь пӧйшур трос Глазов, Балезино, Сьӧлта, Красногорск, Юкаменск ёросъёсын. Ярато соос сезьы бусыосты, муш бакчаосты. Гондыръёсты лыдъяло-чотало август пумын, сентябрь кутсконын. Ӵапак соку пӧйшуръёс сикысь бусые дырто. Кӧтсэс тырыкузы, небытгес карисько — адями но пудо вылэ уг омырскыло. Пӧйшурасьёс ар ӵоже 50-60 гондырез кырмыны пӧрмыто.

Мар кароно, сикын сьӧсь вылэ медад ӝимы шуыса? Министерствоысь Инкуазез чакланъя, пӧйшуръёсты лыдъян-чотанъя управленилэн кивалтӥсез Максим Пластинин валэктэ:

— Нюлэскы оген потанлэсь возиськоно. Уйин сике пырано ӧвӧл. Кырал интыостӥгес ветлоно. Котьку адӟыны мед быгатод: ог 20-30 метр азяд-берад пӧйшур ӧвӧл-а? Гондыр бадӟым ке но, тэлетӥ шыпыт поръя. Сьӧсь азяд сылэ ке ини, бызьыса кошкыны уг яра! Синъёсаз пыр-пыр учкон но — мултэс. Ньыльпыдолы кышкамез возьматоно ӧвӧл. Чир черекъяно, киосын-пыдъёсын шонаськоно. Кияды тӥр я боды луиз ке но, пӧйшур доры эн матэктэ. Соосын йырзэ пильыны уд быгатэ, вожзэ гинэ поттоды. Ог 600 килограммъем пӧйшур син куспын вылады омырскоз. Умойгес луоз, тӥрдэс я бодыдэс вылӥе ӝутӥды ке. Озьы тӥ гондырлэсь ӝужытгес адскоды. Сьӧсь кышкатскоз. Пӧйшурлы тыбырын сылыны уг яра.

Максим Евгеньевичлэн малпамезъя, Якшур-Бӧдья ёросын луэм учырын янгыш ачиз пӧйшурась. Угось ыбыса сќсыртэм гондыр 2 полэс кышкыт луэ. Пиосмурт уйиськонъяз ачиз но валатэк кылиз, кызьы сӧсырмем сьӧсь сое погыртӥз. Ярам коть, таӵе учыръёс шаерамы туж шер луо.

«УД»

Удмурт Дунне
By Удмурт Дунне 19 октября, 2015 09:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<