«Выль куара» проект выль егитъёсты дышетӥз

Удмурт Дунне
By Удмурт Дунне Октябрь 27, 2015 14:09
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

23-тӥ коньывуонэ филармония учкисьёсты пумитаз «Выль куара 2015» ужрадэн. Dart газет отын аслэсьтыз вормисьсэ пусйиз.

Туэ быдэс толэзь ӵоже 9 егитъёс «Шулдыр ӝыт» ансамбльысь кырӟасьёслэн дышетэмзы улсын быгатонлыкъёссэс кыдатӥзы. Нош отчёт концертын тодмо луиз тужгес но устоез.

DSC_5734 (1)

Настя Ивановаез DART газет но пусйиз.

«Выль куара» шоу кутскиз — быдэс зал крезьгуро омыре зымиз. Ӝытэз нуисьёс, задор мылкыдо Анатолий Галиханов но ненег куараё Эльвира Панченко, учкисьёслы мӧзмыны ӧз сётэ. Концертэз Юкаменск ёросысь крезьгуръя дышетӥсь Ольга Ипатова усьтӥз. Со бере Владимир Окунев «Чебер нылаше» кырӟанэныз быдэс заллэсь мылкыдзэ ӝутӥз. Озьы огез бӧрсьы мукетыз вожвылъяськонэ пыриськисьёс асэнызы тодматӥзы. Лякыт сюлэмо Надя Даниловаез ӝытэз нуисьёс Золушкаен ӵошатӥзы. Нош Дэри ёросысь Татьяна Русских зол куараеныз учкисьёсты паймытӥз. Вавожысь пияш Максим Матвеев вань нылъёсты, луоз, аслыз синмаськытӥз. Алёна Зянкулова, Настя Иванова но Настя Сапожникова — «шундыкар» нылъёс — зол быгатонлыкъёссэс возьматӥзы. Нош арганчи Владимир Князев залын пукись анайзэ туж шумпоттӥз.

Конкурсэ котькуд пыриськисьлэн аслаз, аспӧртэмлыко кырӟан амалэз адӟиськиз. Лирической гуръёс вошъяськы-лӥзы шулдыр, мылкыд ӝутӥсьёсыныз. Азьло аръёсы та ужрадэ пыриськем нылашъёс но «10 гужем нунал» группа гуръёссэс кузьмазы. Дыр шӧдтэк ортчиз. Егит кырӟасьёсын тодматскон люкетэз йылпумъяськиз. Антракт куспын котькудӥз учкись яратоно кырӟасезлы куаразэ сётыны быгатӥз. «Сыӵе куара удмурт эстрадаын ӧвӧл на», «сюлэме пыӵась куара» — котыр малпанъёс кылӥсько. Нош кин вормоз, али валантэм на.

Кыкетӥ люкетаз егит кырӟасьёс асьсэ дышетӥсьёсынызы парен кырӟазы. Залын золгес но золгес кичабонъёс кылӥсько. Ӝоген кузьым сётон минут матэктӥз. Алнашысь Анастасия Сапожникова 3-тӥ инты басьтӥз, Эгра ёросысь Зураысь арганчи Владимир Князев 2-тӥ луиз, нош чылкыт куараё вавож пияш Максим Матвеев — 1-тӥ! Со сяна, «Шунды» огазеяськон бырйиз яратоно кырӟасьсэ — Вова Князевез.

— Мон туж шумпотӥсько 2-тӥ луэмелы, — шуэ Володя. — Будэмын кырӟасьёс пӧлын, пичи дырысен та ужез яратӥсько. Нош али асме элькун ужрадын эскерыны луонлык кылдӥз. Анна Плотниковаен ӵош ужам. Сыӵе лякыт сюлэмо, валась кышномурт. Огкыл ӝоген шедьтӥм. Кӧня ке час концерт кутскон азьын гинэ тодӥ, Зураысь дышетӥсьёсы мон понна висьыны лыкто шуыса. Конечно, со но мыным кужым сётӥз.

Со сяна, интернет-куара сётонын вормисе потӥз Алнаш ёросысь егит бард Настя Иванова. Сое ик DART газет но пусйиз. Котыр ласянь усто луэменыз — кырӟанэзлы кылбур но крезьгур ачиз гожтӥз, сцена вылын, ачиз ик гитараен шудыса, кырӟаз. Dart газет солы ӝыны арлы гожтӥськон кузьмаз. Оло тунсыко бамъёсты лыдӟыса, Настялэн гожъяськыны мылкыдыз эшшо но пуромоз. Ми кемалась солэсь выль ужъёссэ возьмаськом ни.

— Призовой инты ӧй ке но басьты, туж шумпотӥсько, — шуэ Настя. — Мон трос выльзэ аслым басьтӥ. Дуэтэн ноку но кырӟаме ӧй вал на. Секыт сётӥськиз, но малпасько, ваньмыз усто пӧрмиз. Бадӟым тау дышетӥселы Владимир Мальцевлы но ваньзылы, кин мон понна висиз. Мыным конкурсэ вань пыриськисьёс кельшизы. Но малпасько, Вова Князев залэз тужгес но ӝуатӥз.

Оскисько, та ӝужась кизилиосты бадӟым сцена вылысь но матысь дыре адӟыны луоз!

Евгения Корепанова

Туспуктӥз Наталья Сметанина

Удмурт Дунне
By Удмурт Дунне Октябрь 27, 2015 14:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<