Удмуртиын ортче калыккуспо форум

Удмурт Дунне
By Удмурт Дунне Октябрь 12, 2015 08:07
фин-угор

Туала амалъёсты кутыса, луиз герӟаськыны Германиысь, Америкаысь, Эквадорысь ӧнерчиосын.

Со улсын Удмурт кун университетын мынэ калыкъёслэн кусыпъёссылы сӥзем  арня.

Арня усьтӥськиз кӧтырес ӝокен. Отын вераськизы студентъёслэн кунгож сьӧрын дышетскемзылэн пайдаез но кулэлыкез сярысь. Тодмо луиз: сыӵе студентъёсты ужаны но мыло-кыдогес куто.  Удмурт кун университет ачиз но кунгож сьӧрысь студентъёсты дораз кыскыны выре — угось вань университетъёс пӧлысь устооссэ бырйыку, та курон лыдэ басьтӥське. УдГУ-лэн ректорез Галина Мерзлякова верамъя, кунгож сьӧрысь студентъёсын но дышетӥсьёсын зол ужа Удмурт филологияя, финноугроведениея но журналистикая институт. Венгриысь, Финляндиысь, Эстониысь университетъёсын кусып возе, соосын валче конференциос но пӧртэм ужрадъёс ортчытъя. Дышетскон удысын пӧртэм университетъёсын кусып возёнлы сӥземын вал Интернет конференция но. Туала амалъёсты кутыса, луиз герӟаськыны Германиысь, Америкаысь, Эквадорысь ӧнерчиосын.  Конференциын трос пумо юанъёс ӝутэмын вал. Кылсярысь, кызьы пӧртэм культураосты тодон адямилэсь асваланзэ ӝутэ. Мар кароно, университетъёс дышетскисьёссэс кунгож сьӧры лэзьяны мед быгатозы шуыса. Кыӵе амалъёсты кутыны луэ, кунгожсьӧр кылъёсты дышетыку. Зэм но, туала дыре кунгож сьӧры потытэк но кылэз дышетыны луэ. Кылсярысь, вотэс пыр Германиысь эш шедьтод но, соин скайп пыр  вераськыса, немец кылдэ волятод.

Визьмо вераськонъёс сяна, УдГУ-лэн лыдӟиськон юртаз ортчиз фин-угор дуннелы сӥзем концерт. Фин кылын кырӟанъёс быдэстӥзы егит кырӟасьёс Ирина Яковлева но Влада Митрофанова. Удмурт кыл чузъяськиз «Чипчирган» ансамбльлэн, Альбина Беспаловалэн но Олеся Дыдыкайлэн кырӟанъёсазы.  Со сяна, туала удмурт мода возьматӥзы MADEMOISELLE OUDMOURTE агентствоысь нылъёс, калык адӟиз Вера Кузнецова но Дарали Лели дизайнеръёслэсь дӥськутъёссэс. Фестивальлэсь кунооссэ нылъёс чылкак паймытӥзы, ужрад бырем бере дышетӥсьёс гинэ но тузӥ нылъёсын туспуксьыны дыртӥзы.

финугор1

УдГУ-лэн лыдӟиськон юртаз ортчиз фин-угор дуннелы сӥзем концерт.

Фестивальлэн 2-тӥ нуналаз УдГУ-ын венгер кыллы дышетӥсь Жофия Сираки дуннелы тодмо венгер тодосчиос но соослэн ужъёссы сярысь лекция лыдӟиз. Жофия УдГУ-э 2014-тӥ арын вуиз. Студентъёсты венгер кыллы дышетэм сяна, со гожтэ удмурт калыклэн фольклорезлы сӥзем диссертация, архивын бугыръяське, удмурт ужрадъёсы но пыриськыса вуэ. Жофия сярысь вераны луоз, со — мультилингв шуыса. Со кадь студентъёс  дышетско УдГУ-ысь Кылъя но литературая институтын. Татын мультилингвлэсь нуналзэ котькуд ар пусъё. Туэ тунсыко возьматон лэсьтӥз  2-тӥ курсын дышетскись Италиысь Гвидо. Со адӟытӥз, кызьы ӟечбуръясько пӧртэм кунъёсын адямиос: Франциын, Испаниын, Англиын, Италиын, Германиын. Ӝытсэ калык люкаськиз дуннеысь сиён-юонъёсын тырмем ӝӧк сьӧры. Пӧртэм кунъёсысь лыктэм студентъёс пӧразы калык сиёнъёссэс, веразы солэсь кылдэмзэ но кызьы пӧрамзэ. Пӧртэм кунъёсын тодматскон азьлантӥськиз кино учконэн.

Таӵе ужрадъёс тодмато пӧртэм калыкъёслэн культураосынызы. Озьыен, эшъяськыто университетын дышетскисьёсты.

 

Удмурт Дунне
By Удмурт Дунне Октябрь 12, 2015 08:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<