Сӥзьыл медаз люкеты улыны

Удмурт Дунне
By Удмурт Дунне 28 октября, 2015 08:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

иринаКотькуд адямилэн аслаз пуш дуннеез, соин ик котькудӥз бордысь потэ: сӥзьыл вуэмен сюлмаз мӧзмон пыроз-а, уз-а?

Малы сӥзьыл сюлэме каръясько тулкымъяськись мылкыдъёс? Нырысь ик, адями асэныз лэсьтэм «шуныт дуннеяз» яратэ улыны. Нош бер сӥзьыл вуэ ке, котыр дунне кезьыт луэ, тӧлъёс кузёясько, дэри. Соку ини «шуныт дуннее» витьымтэ кезьыт куазь пыре. Мон верасько бер сӥзьыл сярысь, малы ке шуоно куарусён толэзе кезьыт ӧвӧл на. Кыкетӥез, адямиос гужемзэ отпуске пото, шутэтско, нош сӥзьыл соослы нош ик уж дуре потыны кулэ. Инкуазен ӵош бӧрдэ мылкыд но. Кутске нырулон вакыт: нош ик ужлы дышоно. Кинлэн потоз шуныт гужемез лэземез? Куинетӥез, 1-тӥ куарусёнэ пиналъёс мыно школае. Пичи дырысенызы адямиослэн йыразы пыремын: та нуналысен кутске выль улон. Нош выльзэ адямиослэн улоназы пыртэмзы туж ик уг поты — озьы соослэн «шуныт дуннезы» нош ик сӧриське. Валамон, вань весь выльзэ утчась, улонзэс воштыны турттӥсь адямиос. Таосыз сярысь мон уг вераськы. Ньылетӥез, адямилэн улоназ витьымтэ урод учыръёс луыло. Но тодосчиос верало: стресс 20 минут гинэ кыстӥське. Собере пушмы урод кужымъёслэсь ассэ утьыны кутске. Но адями ассэ кутыны ӧз быгаты ке, депрессия кырмиськытозь кема ӧвӧл: со зэмос улонлэсь палэнске, вераськемысь дугдэ. Депрессия дыръя адями диван вылаз бӧрдыса пуке, но номыр каремез уг луы. Кылсярысь, мон доры вуылӥз нылаш, шуэ: «Мынам весь бӧрдэме потэ — котькуд нунал бӧрдӥсько. Мар каром?» Ойдо, шуисько, лэсьтом «бӧрдон сэрег». Пушкыд тыриз ке, тон отчы мынӥськод но бӧрдӥськод, но нокинэн уд вераськиськы, телефондэ кысӥськод. Таӵе амал ӵемысь юрттэ, малы ке шуоно адями малпаськыны кутске, малы солэн бӧрдэмез потэ. Мӧзмыку но укно азе пуксёно, аслыд шуоно: «Мон укыр мӧзмисько!» Таӵе учыръёсы но адями малпаськыны кутске, малы солэн сыӵе мылкыдыз.

Ас азяд ужпум пуктон котькыӵе валантэм учырысь тонэ поттыны быгатоз - адями цельтэк улыны уг быгаты.

Ас азяд ужпум пуктон котькыӵе валантэм учырысь тонэ поттыны быгатоз — адями цельтэк улыны уг быгаты.

Мар эшшо кароно на мӧзмонлэсь куштӥськон понна?

Нырысь ик, астэ дугдытӥськод: «Тырмоз!» Собере аслыд ачид валэктон утчаськод: «Мар монэн луиз?» «Марлы мыным мӧзмыны кулэ?» «Мар мынам али потэ?» «Мар со понна кароно?»
Озьыен, мар монэн луиз? Кылсярысь, мынам уж доры мынэме уг поты, кырын кезьыт, сюлмын мӧзмыт. Тодӥм. Табере, марлы мыным та мылкыд кулэ? Яке мынам уг поты ужаме, яке мынам уже понна кыл кутэме уг поты. Соин адямиос та вакытэ ӵемысь шуо: «Мон уг ужа, мынам йыры висе!» Кескич сям. Нош мар потэ? Мылкыдме ӝутэме (котькудӥзлэн та юанлы аслаз валэктонэз луэ)! Мар со понна кароно? Шедьтоно аслыд кельшымон уж, цель, шуом. Ас азяд ужпум пуктон котькыӵе валантэм учырысь тонэ поттыны быгатоз — адями цельтэк улыны уг быгаты. Кылсярысь, адямилэн сьӧросэ потӥз ке, сое нокыӵе мӧзмон (хандра) уз дугдыты, со мыноз «ужзэ лэсьтыны». Но юанъёслы валэктон шедьтыны шуг луэ, угось адями ас пушказ бугыръяськыны кулэ. Татысь гинэ но ми адӟиськом, макем ӧжыт дыр ми висъяськом асьме мылкыдъёсмылы, ӵемысь асьмеос асьмеды валамысь дугдӥськом.

Психологиын вань сыӵе малпан: адямиын ӝыныез йырвизь, ӝыныез — мылкыдъёс. Мылкыдъёс пӧзьыны кутско ке, йырвизь ужамысь дугдэ. Нош астэ кияд кутон понна кулэ йырвизьдэ ужатыны: малы мынам сюлмы бугыръяське? Шедьтӥськоды ке та юанлы валэктон, улонады нош ик гармония кылдэ.

Зэмзэ ке, мӧзмон мылкыдлэн умой палыз но вань. Тӥляд эшты, шуом, ышиз. Тӥ солы жингыръяны кутскиськоды, юалляськыны, мар луиз. Адямилы огшоры саклык но кулэ. Мукет ласянь, адями озьы шутэтске. Шобретэ биняське но гань-гань лыдӟиськыса пуке, яке, быгатӥсь адямиез басьтӥм ке, творчествоен выре, мукет ужъёслэсь палэнске. Озьы ик та вакытэ адямиос улонлэсь выль палъёссэ, выль мылкыдъёс утчало. Котькуд арберилэн вань умой палыз но, уродэз но. Хандралэн но озьы ик. Шедьтоно гинэ соосты. Нош улонады яратоно ужды луиз ке, нокыӵе кезьыт сӥзьыл но мӧзмон мылкыд сярысь тодады уд вайылэ ни!

Туспуктӥз Евгений Ардашев

 

Удмурт Дунне
By Удмурт Дунне 28 октября, 2015 08:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<