Сӥлы каризы устоосыз пӧлысь устооссэ дышетӥсьёсты

Удмурт Дунне
By Удмурт Дунне Октябрь 5, 2015 13:17
8-2-2

Туэ 13 визьнодась пусъемын Россилэн бюджетысьтыз быдэн 200 сюрс манетэн.

Резиденциын сӥлы каризы «Дышетон» нацпроектлэн конкурсаз вормисе потэмъёсты.

Дышетӥсьёс пӧлын таӵе вожвылъяськон туэ 10-тӥ ползэ ортчиз. Та дыр куспын шаерысьтымы уно дышетӥсьёс кужымзэс мертазы ни. Туэ 13 визьнодась пусъемын Россилэн бюджетысьтыз быдэн 200 сюрс манетэн но эшшо 100 визьнодасьёс — Удмуртилэн казнаысьтыз быдэн 50 сюрс манетэн.

Россиысь вожвылъяськонын вормемъёс пӧлын тросэз — дышетон удысын вазенгес тодмо луэм адямиос. Соос азьло но пыриськылэмын Россиын радъяськылӥсь пӧртэм вожвылъяськонъёсы, визьнодам пиналъёссы арысь аре возьмато ӟечесь тодон-валанъёссэс. Озьы Кез шор ёзо школаысь технологилы дышетӥсьлэн Ирина Трефиловалэн нылпиосыз Россиысь олимпиадаосын кышкатэк кужымзэс мертало, калыккуспо ӵошатсконъёсын, адӟытонъёсын вормонъёс басьто. Пусйыны кулэ, Ирина Валерьевна — 4-тӥ выжыысь дышетӥсь. Озьы со быгатыса азинтэ песянай-песятайёсызлэсь кутскем удыссэс.

Удмуртиысь вожвылъяськонын вормисе потэмъёс но — быръем удыссэс яратӥсь, дунъясь, ужазы ялан выль амалъёсты кутӥсь дышетӥсьёс.

— Та мынам нырысетӥ бадӟым вормонэ, — шуэ Ува ёросысь Мушковай школаысь ӟуч кылъя но литературая дышетӥсь Ольга Коновалова. — Но та вормонэлы луыса ик аслам быгатонлыкъёсылы осконэ уката будӥз. Озьыен, ваньмыз азьпалан!

Шаркан ёросысь нылаш Ува палъёсы вуэм Глазовысь пединститутэз йылпумъямез бере. Табере со 23-тӥ арзэ тырше одӥг школаын. Туж данъяське ӵош ужась эшъёсыныз, нылпиосын.

— Школамы бадӟым ӧвӧл, 33 сяна дышетскисез но ӧвӧл ни, — азинтэ веранзэ Ольга Васильевна. — Но сое пытсан ум сётӥське, угось коллективмы туж быгатӥсь. 10 дышетӥсьмы пӧлысь 5-ез, монэ но пыртыса ни, «Дышетон» нацпроектын вормемын. Кылем арын школамес 4 пинал йылпумъяз, 2-ез со пӧлысь — зарни медален, 3-тӥез азвесь медаль басьтысал, сое сётъямысь ӧй дугдысалзы ке, 4-тӥез но «4»-ёслы но «5»-ёслы гинэ дышетскиз. Мон классэн кивалтӥсьсы вал, соин ик та пиналъёслэсь вормонъёссэс но лыдэ басьтӥзы, вылды, монэ нацпроектлэн конкурсаз вормисьёс пӧлы бырйыкузы.

Дышетӥсьёсты сӥлы кариз Правительстволэн Тӧроез Виктор Савельев. Шуиз:

— Тӥляд тыршемыныды Удмуртиысь дышетон удыс одӥгез адӟем карымонэз луэ. Жадёнэз уд валаське, ялан выльзэ утчаськоды — Россилэсь ӵуказе нуналлы осконзэ юнматӥськоды.

Элина Кумачёва

Удмурт Дунне
By Удмурт Дунне Октябрь 5, 2015 13:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<