Шуныт но пӧсь ву сётымтэен прокуратурае 400 пала ӝожтӥськонъёс вуэмын

Удмурт Дунне
By Удмурт Дунне 27 октября, 2015 12:57

Иж городлэн выль быръем йырыз Юрий Тюрин нырысетӥ пресс-конференцияз вераськиз толлы дасяськон пумысен.

imgs-196219

Нырысетӥ ужан нуналэз Ю. Тюринлэн кутскиз Барышников но Молодёжной урамъёсысь юртъёсты котыръянэн, отын улӥсьёс соку шуныт ӧвӧллы ӝожтӥсько вал.

Выль быръем йыр шуиз: нырысетӥ ужан нуналэз кутскиз Барышников но Молодёжной урамъёсысь юртъёсты котыръянэн, отын улӥсьёс соку шуныт ӧвӧллы ӝожтӥсько вал.

— Шунытэз дыраз сётымтэлэн мугъёсыз пӧртэмесь: шуак кезьытскиз, уг тырмо ужась киос, кивалтӥсьёс ужез дыраз радъяны ӧз быгатэ но мукет, — пусйиз Юрий Тюрин. — Но али янгыш муртъёсты утчанэн вырыны дыр ӧвӧл. Ижын улӥсьёслы сокем ик тунсыко ӧвӧл, малпасько, кӧня бригада ужа теплотрассаосты тупатъян бордын, соослы тодоно: ку луоз шуныт?

Ю. Тюрин верамъя, шоркарын та нуналлы кынмись коркаос ӧвӧл.

Но пӧсь вутэк кылемъёс вань на.

— Пӧсь ву сётонэз радъян бордын 27 бригада ужа, ваньзылы вазиськемын: 25-тӥ октябрёзь ужъёссэс йылпумъяно, вань коркаосы пӧсь ву сётоно, — ватсаз Ижлэн йырыз.

Нош 25-тӥ октябрь бере, пе, чурыт вераськонъёс кутскозы ик. Ю. Тюрин уг ваты, куд-ог кивалтӥсьёс пуконтэк но кыльыны быгатозы. Угось прокуратурае, янгыш муртъёсты административной кыл кутон улэ кыскыны курыса, 400 пала актъёс вуэмын.

 

Ижысь шуныт сётон гумыос пӧлысь ог 70 процентэз вужмемын, ярантэм луэмын. Удмуртилэн Тӧроез Александр Соловьёв куриз ни: шоркарлэсь вуоно арлы бюджетсэ кутыку, тае лыдэ басьтоно. Выль быръем йыр но вала: югдурез воштытэк, вуоно арын сӥзьыл Ижын улӥсьёс уката шуге-леке вуыны быгатозы. Но бюджетын коньдон бусьтыр ӧвӧл, гумыосты тупатъян сяна, зор ву кошкон гумыос лэсьтоно, азбаръёсты тупатъяно, куд-ог сюресъёсты паськытатоно.

— Соин ик ваньзэ радызъя лэсьтоно, — шуиз Ю. Тюрин. — Теплосетьёсты выльдонлы бюджетын коньдон чаклалом, оскисько, коньдонэн юрттоз элькун но, кыскыны быгатоно на инвесторъёсты. Но валаны кулэ: коньдон тырмыт луиз ке но, вань сисьмем гумыосты вакчи дыр куспын воштыны уз луы: уз тырмы дыр но, ужась киос но, техника но, со понна городын улӥсьёсты палэнэ поттоно луоз — урамъёстӥ-азбаръёстӥ вамыштон инты уз луы.

Шоркарлэн азьвыл кивалтӥсьёсызлэн ужамзылы Ю. Тюрин дунъет сётонлэсь палэнтӥськиз. Шуиз: улоно ӵуказе нуналэн, котькуд нунал городлы маке пайдаёзэ лэсьтыны тыршоно.

Элина Кумачёва

Туспуктӥз Ю. Стерхова

Удмурт Дунне
By Удмурт Дунне 27 октября, 2015 12:57