Школае ветло тракторен

Удмурт Дунне
By Удмурт Дунне 9 октября, 2015 13:44

Удмурт шаерын школа автобусъёслы чакламын 887 иськем сюрес. Пиналъёсты нуо-ваё 317 маршрутъя.

Жаляса верано, куд-ог пичи гуртъёсы автобус уг вуы. Шаркан ёросысь Сильшурын улӥсьёс зоръёслэсь кышкало. Куазь уродме гинэ, гуртэ уд но пыры, уд но поты.

— 1-тӥ сентябре школа автобус тайиз но, нылпиос празднике мыныны ӧз быгатэ, — сюлэмшугзэс кисьто сильшуръёс. — Тракторе пуктыса гинэ, пиналъёсмес школае келяны пӧрмытӥськомы.

Сильшуръёслэн сяна, таӵе ик сюлмаськонзы вӧзысьтызы Петухи починкаын но Гырдым гуртын. Татысь Зюзя школае оглом ветлэ 8 пинал. Зюзяе вуон понна соослы 8-10 пала иськемез ортчоно луэ.

— Сюресъёс — милям висёнмы, — вера Зюзя школалэн кивалтӥсез Лидия Кожевникова. — Али куазь чебер улӥз. Автобус та гуртъёсысь пиналъёсты капчиен вайылӥз. Понедельнике нылпиосты кутӥськомы, субботае доразы нуиськомы. Арня шорын пиналъёс интернатын уло. Кытӥ-отӥ сюресэз тупатъязы. Но выро-гопо интылы та тырмыт ӧвӧл. Кӧльыен ке но шобыртоно вылэм сое.

Дышетонъя но наукая министерство валэктэ: гуртъёсысь школа сюресъёсты чакланы-эскерыны кулэ муниципал кылдытэтъёс. Та ужлы министерство котькуд ар висъя ог 90 миллион манет. Но сильшуръёслы, гырдымъёслы юрттэт вуоз-а, уз-а — туннэ тодмо ӧвӧл.

— Та сюресъёсты программае пыртыны ум быгатӥське, — валэктон сётэ Зюзя муниципал кылдытэтлэн йырыз Василий Кожевников. — Малы ке шуоно улӥсез ӧжыт — 49 адями котыр. Программае шедён понна ичизэ 100 луыны кулэ. Озьы ке но та югдурез сэрттытэк-пертчытэк кельтэммы уг поты. Шобырты вал сюресъёсты изэн — бадӟым машинаос сое ӝогак горд сюе ныркозы. Угось Сильшурын фермазы вань. Ог 150 йыр скал вордо. Йӧл нуись-вайись машинаос ӟеч сюресэз ӝог уродмыто. Но ӧйтӧд, пудозы но бырон калэ, оло, вуоз — та рад сиён дасяса ӧз вуттэ. Вуоно арын сюресъёслы одно ик коньдон шедьтыны тыршом.

Сильшуръёслэн выллем сюлмаськонзы вал Пичи Пурга ёросысь Починка гуртын улӥсьёслэн но. Отын 37 коркан 130 адями улэ, дышетскыны ветлэ 15 пинал. Вуж Мӧнья школае вуон понна соослы, дэри-маялэз коласа, пыдын ог 5 иськемез ортчоно луылӥз. Со понна покчиос 6 часын ӵукна султылӥзы.

Туннэ улонзы чутрак воштӥськиз. Чильк-вальк кисьтэм асфальт сюрес вылтӥ школа автобус гуртэ 7 час но ӝыныен пыре. Нуназе бере, 2-3 часын, пиналъёсты доразы вуттэ. Пусъёно: автобус, школае сяна, садике но пыра на. Сюресэз лэсьтон ужъёс татын кутскемын вал ини 1999-тӥ арысен ик. Йылыз-пумыз вуиз туэ гинэ — кылем арняе сюресэз сӥё-дано усьтӥзы.

Умой пала воштӥськонъ-ёслы шумпотэм та гуртысь 78 аресъем Людмила Фёдоровна Михайлова. Чабкиське:
— Мар та, мар та! — шуэ. — Гуртмы быроз ини шуыса, малпасько вал. Синъёсы ик уг оско: коркаос ӝутӥсько.

Урамамы выль юбоос пуктӥзы. Шур вамен выжмес гинэ но выльдӥзы. Ма, гуртэ пыронысь меӵ гурезьмес но нялмыт каризы. Нылпиос но, автобусэз возьмаса, зор улын уз сылэ ни — возьмаськон интыез липет улэ пыртӥзы. Сюресмы табере вольыт, чебер. Ӵужыса-утялтыса гинэ возёмы на сое!

Ольга Корепанова

Удмурт Дунне
By Удмурт Дунне 9 октября, 2015 13:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<