Шаерысьтымы 44,5 процентаз гуртъёсын газэн шунтӥсько

Удмурт Дунне
By Удмурт Дунне 12 октября, 2015 10:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
057107,удмуртгаз,рабочий

Туэ шаерамы газ гумыос лэзьыны «Газпром» 300 миллион манет висъяз.

Берло дыре арлы быдэ ог 3-4 процентлы та лыдпус йылэ.

Дас ар талэсь азьвыл «Газпром» Россиысь улосвылъёсы газ кыскыны кутскиз. Шаерысьтымы вань ёросъёсын со вань ни. Зэм, ваньмыз гуртъёс дорозь черод ӧзгес вуы на. Тужгес шумпото Алнаш ёросын улӥсьёс. Татысь 5 гурт гинэ пуэн эстӥське на, соос но туж пичиесь.

Туэ шаерамы газ гумыос лэзьыны «Газпром» 300 миллион манет висъяз. Соин сэрен октябрь кутсконын бадӟым шумпотон вуиз Красногорск ёросысь Дёбы гуртэ. Табере татын шунтӥськыны быгатоз 638 корка, библиотека, клуб, школа. Зэм, бызьылонэз трос на. Гуртоослэн уго ӧвӧл коньдонзы котёл басьтыны, радиатор пуктыны но проект лэсьтыны. Туала вакытэ та туж дуно усе. Газ пыртыны нимысьтыз капчиятэм кредит висъясалзы ке, уноез адямиос пуэн эстӥськемысь, оло, дугдысалзы ни. «Газпром межрегионгаз Ижевск» огазеяськонлэн кивалтӥсез Алексей Вершинин верамъя, газ кыскон программая чакламын: бюджетысь уксё мыноз гумыосты ураметӥ но коркаос дорозь кысконлы. Но улонын ӵемысь ульча кузя гинэ соосты кыско, юртъер дорозь вуттыны коньдон уг тырмы ни. Соин но гуртоос понна доразы шуныт пыртон туж дуно усе.

Но пуэн эстӥськон но каньыл ӧвӧл. Ярам, гуртын хозяйство вань ке, техникаен юрттэ ке. Нош ваньзэ аслыд утчано-бызьылоно ке, арлы быдэ бадӟым йыр висён луэ ук. Соин но, лэся, Можга ёросысь Удмурт Пычасысь (Мельниковоысь) калык гуртэтӥзы газ кыскыны уксё бичано кариськиз. Зэм, Школьной урамзы ӝыныез газэн улэ ни. Таослэн майбыр улэмзылы ик вожъяськыны ӧдъязы мукетъёсыз но.

Учконо ке, Удмурт Пычас бадӟым ӧвӧл. Татын 81 юртъер. Отын 320 мурт улэ, лыдъяське, но ӝыныез, каньыл улон утчаса, кемалась городэ я мукет азе выжизы ни. Артысь гуртъёс но воксё бырон калэ вуэмын ни. Ӟуч Пычас гинэ йыг-йыг сылэ на. Таиз 2 арзэ ни быдэсак газэн шунтӥське. Нош мукетъёсаз шуныт, оло, ноку уз ик вуы ни. «Мельниково» гурт поселениен кивалтӥсь Геннадий Шуклин верамъя, адямиос, пу дасяса, туж жадизы ни. Эшшо 56-ез корка газтэк кылемын на. 37 мурт соглаш луэмзэ гожтӥз ни ульчаосазы гумыос кыскон вылысь уксёзэ сётыны. Котькудӥзлэсь кулэ 30 сюрс. Матысь дыре мукетъёсыныз но та пумысен вераськыны медо. 80 процентэз соглаш кариськизы ке, газ гуртазы ӝоггес вуоз. Уксё люказы ке, гурт поселенилэн бюджетысьтыз 25-30 процент уксёез шыръяны луоз. Таӵеез проект шаерамы ӧй вал на.

14173,Карашурское УПХГ,газовая промышленность

Соин сэрен октябрь кутсконын бадӟым шумпотон вуиз Красногорск ёросысь Дёбы гуртэ.

— Уксё ӧм бичалэ ке, ӧйтӧд, кӧня пуэн эстӥськоно луомы на, — лулӟе Мельниковоысь почта ёзэн кивалтӥсь Татьяна Дмитриева. — 30 сюрс — гуртоос понна ӧжыт ӧвӧл. Но пу басьтон но дунтэм уг сылы. Толзэ потон вылысь ог 15 кубометр кулэ. Пуклёен басьтоно ке, 18-20 сюрс манет кошке. Ачид дасяд ке, дунтэмгес луоз. Но ми дорын хозяйство но рос-прос ӧвӧл ни. Кытысь техника карод? Пу ӧжытгес мед кошкоз шуыса, электрокотёл но юнматӥмы ни. Коркамы кык этажъем бере, кема шунтоно луэ. Соин ик огпол уксё висъялод но отӥяз газэн улод, малпасько. Зэм, калык пӧлын пумитъяськисез но сюре. Куд-огезлэн уго коркаез туж вуж ни. Коркаедлэсь дуно газ пыртонэд усиз ке! Эшшо ке арлы быдэ курдатъяло, школамес пытсалозы шуыса. 40 пинал сяна отын уг ни дышетскы уго. Нылпи садэз но отчы ик выжтӥзы ни. Гурт быре ни шуыса, куд-огез газ пыртыны кышка. Но сыӵеос ӧжыт. Ӵемысь озьы пересьёс малпасько. Но газ пыремен гурт пушйыны но быгатоз — татын магазин но, медпункт но вань.

Мельниковое гуртоосын валче газ кыскыны пӧрмиз ке, шаерысьтымы мукет гуртъёсын но та амалэз пыџатозы.

Удмурт Дунне
By Удмурт Дунне 12 октября, 2015 10:07