Шаерамы йылӥзы полицейскойёс вылэ омырскылон учыръёс

Удмурт Дунне
By Удмурт Дунне Октябрь 15, 2015 14:26
пахомов

ГИБДД-ын ужасьёс Юкаменск палъёсын воргоронэн дугдытӥзы. Талы пиосмуртлэн йырыз кур луэм — югдурез утисьлэсь чиньызэ куртчем.

Туннэлы 185 уголовной уж ӝутэмын.

Эгра ёросысь воргорон кудӟытӥсьсэ юэмез бере пери кадь луиз. Дораз жугиськыны ӧдъяз. Полициын ужасьёс вуэм бере но ӧз шыпыта. Югдурез утисьёс вылэ мыжыкъёсыныз омырскиз. Воргоронэз машинае пуктӥзы. Отын но со гань-гань ӧз кариськы — полицейскойлэсь макессэ куаӵак куртчиз.

Воргоронъёслэсь пӧртэм ӧвӧл кышномуртъёс. Ижысь кафеын одӥг уллё шулдыръяськем. Юэмзы бӧрсьы керетон пуромем. Соосты зӥбломытыны вуизы югдурез утисьёс. Но таослы асьсэлы юрттэт кулэ луиз — шӧмаськем нылмурт полицейскойлэсь йырзэ ӟене-ликен пасям.

Ува ёросын сюрес вылын югдурез чакласьёс дугдытӥзы машинаез. Руль бергатӥсь — азьвыл пытсэт сьӧры шедьылэм пиосмурт — документъёссэ возьматыны пумит кариськиз. Нырысь жоб кылъёсын черекъяз, бӧрысь отвёрткаен полицейскойлэсь кизэ мертчалтӥз. Озьы пиосмурт нош пытсэт сьӧры шедиз. Та выросэз понна солы 3 ар сётӥзы.

Юкаменск палъёсысь пиосмурт шӧмаськем йырын машинае пуксем. ГИБДД-ын ужасьёс сое дугдытӥзы. Талы пиосмуртлэн йырыз кур луэм — югдурез утисьлэсь чиньызэ куртчем.

— Полицейскойёс вылэ ӵемгес омырскыло ёросъёсын, — вера Югдурез утёнъя министерствоысь кышкытлыклэсь утиськонъя оперативно-розыскной частьлэн кивалтӥсез, полициысь полковник Фанис Зарипов. — Малы ке шуоно гуртоос уг тодо, полицейскоез вӧсь карем, соин урод кылъёсын вераськем понна уголовной уж ӝуто шуыса. Таӵе учыръёс ӵемысь лэсьтӥсько кудӟем йырын.

Туннэ нуналлы Уголовной кодексысь 319-тӥ статьяя — полицейскойёсты жугонэн-виёнэн кышкатон, жоб кылъёс веран — ӝутэмын 106 уголовной уж, 318-тӥ статьяя — полицейскойёсты вӧсь карон — 79. Югдурез утисьёслэсь кылзӥськисьтэмъёс вылэ 393 протокол гожтэмын, административной кыл кутон улэ 368 адями кыскемын. 318-тӥ статьяя янгыше уськытэмъёслы 200 сюрс манет, 319-тӥ статьяя 40 сюрс манет тыриськон тупатэмын.

— 3-4 ар талэсь азьло югдурез утисьёслы ӝот-ӝот курон пуктэмын — семьяын пуромем керетонъёсты сэрттыны-пертчыны одно ик пистолетэн потоно, — шуэ Ф. Зарипов. — Угось ӵем дыръя урмем адямиосты, пистолетэн кышкатытэк, зӥбломытыны уг пӧрмы. Но полициын ужасьёслы сак луоно — ыбоно валаса. Та понна толэзьлы быдэ радъяськомы дышетонъёс. Комиссия пыр-поч эскере: малы но кыӵе мугъёсын полицейской ыбиз, кинэ вӧсь кариз, шонер-а со лэсьтӥз?

Алигес Ижын кылдэм учыр пумысен но эскерон ортчиз. Полицие жингыртӥсь луиз: 5-6 кузя нылъёс-пиос коркась укно-осты пильылӥллям. Юрт кузёлэсь юалляськыса, югдурез утисьёс тодӥзы, йыртэмасьёс кызьы дӥсяськемын вал. Озьы ульчаын сылӥсь егитъёсты тодмазы. Тае шӧдыса, лэся, укылтэмъёс асьсэос полицейскойёс вылэ мыжыкъёссэс урдӥзы. Огез полицейскоез кекатыны выриз, мукетыз пистолетсэ таланы ӧдъяз. Но кобураысь кышкыт арбериез огшоры гинэ уд потты. Полицейской ачиз кышкатон вылысь омыре ыбиз. Лӧптэмъёс ӧз кышкалэ. Соку кыкетӥзэ ыбиз. Пуля шедиз кекатӥсь пиосмуртлэн пыдаз. Озьы йыртэмасьёс кырмемын вал.

Ольга Корепанова

 

Удмурт Дунне
By Удмурт Дунне Октябрь 15, 2015 14:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<