Сальялась шаян песянайёс

Удмурт Дунне
By Удмурт Дунне Октябрь 5, 2015 11:59

Шунды улын пиштӥсь кильтро дэремъёссэс дӥсяса, Кияса ёросысь салья песянайёс великен тур! гинэ клубе васько. Таосыз «Задор мылкыд», «Тайвади» но «Бӧляк» ансамбльёсысь кырӟась-эктӥсьёс. Угось клубе вазьгес вуоно, ужрадлы дасяськоно на.

Шунды улын пиштӥсь кильтро дэремъёссэс дӥсяса, Кияса ёросысь салья песянайёс великен тур! гинэ клубе васько.

Каллен-каллен мукет песянайёс но клуб пала вамышто, котьку сямен дэмен.

— Марья апай вуиз, пуксьы ай, пуксьы, — Марья апаез песянайёс кунулто но пукон вылэ пукто. Концерт азьын арлыдоос пинал дыръёссэс тодазы ваё, Енька апай калыклы возьматэ, кызьы кут кутано.

— Адӟелэ кут кутанме! Ку ай тамында калыклы кут кутаса вуттод! Туэ ӧз ке, кайта кутэ вуоз, — шоккетэ 86 аресъем Енька апай. Солы пумит вазё:

— Шаплыгес, шаплыгес. Керосин ӝуатозь, куттэ быдэстоно.

16-2-4

Енька апай кут кута.

Клуб тыр серекъям куара чузъяське. Салья гуртын паймымон песянайёс уло: маскаръяськемысь уг дугдыло, арган чузъяськыны кутске, ох! экто, ох! такмакъёссэс кырӟаса лэзё ук. Тани «Бӧляк» ансамбль кытысь-марысь дышетыса вуттэм ни газетамы 2 арня талэсь азьло потэм Дэри ёросысь И. Альмакеевалэсь такмакъёссэ. Но кырӟан висказы песянайёс уж сярысь но уг вунэто. Сальяысь арлыдоослэн вань асьсэ огазеяськонзы. Соин кивалтэ Марина Морякова. Кылем арын ёросысь таӵе ик ветеран огазеяськонъёс пӧлын салья песянайёс кыкетӥ инты басьтӥзы, вазенгес — 1-тӥ. Огазеяськонысь арлыдоос ог-огзы доры, вордӥськем нуналэнызы, праздникъёсын ӟечкыласа, вуыло, школаын дышетскисьёсын ужрадъёс ортчытъяло, концертъёс пуктыло.

— Милям пересьёсмы кырӟаны, эктыны, вераны быгатӥсесь, — вера Марина Морякова. — Гуртамы 3 ансамбль вань — «Задор мылкыд», «Тайвади» но «Бӧляк». «Бӧляк» алигес калык ансамбль ним басьтӥз. Пересьёс эшшо гимнастикаен выро, великен ворттыло, скандинав амалэн ветло. Ёросысь вормонэн берто. Спортэз быгатыса радъя Зинаида Павлова.

Арлыдоос маскаръясько.

Арлыдоос маскаръясько.

Туннэ Марина Морякова котькуд ужасьсэ кузьымъёсын пусйиз. Кыџеосыз гинэ вылӥллямтэ соос пӧлын — Мария Беляева шашкиен шудэ, Алевтина Иванова — дартсэн, Екатерина Гереева — теннисэн, шаплы бызьылэ, Екатерина Фёдорова лулчеберет понна кыл кутэ.

— Ой, шулдыр улӥськом, — вера Зинаида Павлова. — Концертлы дасяськыны шуыса клубе потӥськом но зарядка лэсьтӥськом, маскаръяськиськом. Антонида Наумова мугормес куасалляны дышетэ. Пудоосмес келяськом но великен ворттылыны потӥськом, ӝытсэ, вань ужъёсты быдтэммы бере, скандинав амалэн ветлыны потӥськом. Мугорлы дото куанык луэ. Пӧламы асьме маскарчиосмы вань — Аля Иванова но Маня Григорьева. Куддыр соослэсь верамъёссэс кӧтмес ик кутыса серекъяськом. Собере концертлы но серемес сценка пуктӥськом.

16-2-1

Мыло-кыдо почтальон Н. Лазарева.

— Гуртоос милемыз шолды-болдыос нимазы вал, — серекъяло песянайёс. — Озьы ик ансамбльмы но нимаськиз. Али «Задор мылкыд» ним нуллэ ни ке но, ми асьмемыз весь шолды-болдыос шуиськом.
Юрмалай муниципал кылдытэтлэн йырыз Фёдор Охотников арлыдоосты туж шуныт кылъёсын њечкылаз, куд-огзэ кузьымъёсын пусйиз. Кылсярысь, татын арлы быдэ ортчылэ «Салья базар» конкурс.

— Ми котырским вань азбаръёстӥ. Тужгес учкымон корка луиз Елена Поляковалэн выльдӥськись юртэз, — йылпумъян лэсьтӥз кивалтӥсь.

Шумпотымон мукетыз но: Сальялан туж лыдӟиськись калык, «Удмурт дунне» газетлы гожтӥськисез татын 80 пала, лыдӟисез — эшшо тросгес.

— Ма, кызьы «Удмурт дуннетэк»! — чабкиське Семён Богданов. — Ми та газеттэк улыны ум быгатӥське.

Со понна тау шуыны кулэ мыло-кыдо газет нуллӥсьлы Наталья Лазаревалы. Газетэз, зор-кот, сильтӧл шоры учкытэк, лыдӟись доры ӝог вуттэ. Сыӵе мыло-кыдо луэмез понна «Удмурт дуннелэсь» со пичи кузьым басьтӥз.

«УД»

 

Удмурт Дунне
By Удмурт Дунне Октябрь 5, 2015 11:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<