Россилы удалтӥз! Кин пумитъяське ӝутсконмылы?

Удмурт Дунне
By Удмурт Дунне 19 октября, 2015 08:48

Асьмеос улӥськом туж тунсыко но со дыре ик шурдыт вакытэ. Быдэс дуннеын ортчо бадӟым воштӥськонъёс. Россия потэ азьпал радъёсы. Мар возьма сое азьланяз? История наукаосъя кандидат, политолог Наталья Бармина шарая аслэсьтыз малпанъёссэ.

_DSC9736

Совето Союз вакытысь кылем туж зол оружимы.

— Дуннеын та воштӥськонъёс кутскизы Совето Союз куашкан вакытъёсы. Америка но солэн союзникъёсыз соку малпазы: соос вормизы, табере мар мылзы потэ, сое ик лэсьтозы. Кема аръёс ӵоже соос Россия шоры учкизы вормисьлэн синмыныз, шуылӥзы, Россия укыр ляб, мар соин вераськонэз. 1990-тӥ аръёслэн пумазы Америкалэн госсекретарез Мадлен Олбрайт шара вераз: Россилэн укыр бадӟым музъемъёсыз, нош калыкез ичи, соин ик ООН-ын та пумысен ужпум ӝутоно но сыӵе кунъёслэсь музъемъёссэс дуннеысь капиталлы усьтоно. Вакчияк вераса, сётоно.

Мар соку Россилы юрттӥз? Совето Союз вакытысь кылем туж зол оружимы. Сыӵе ожгар тӥрлыклэсь кышкаса ик, Россия вылэ ноку но нокин но шара уз урдӥськы. Кыкетӥез, юрттӥз асьме калыклэн туж секыт вакытъёсты чиданы быгатэмез.

Ма, али но куд-огез шуэ вал: Россиын санкциосын сэрен калык ульчаосы потоз, Путинэз палэнтоз. Соос уг валало — перестройка пыр потэм калык понна туала югдур секыт уг поты ни.
Россия ӝутӥське. 1990-тӥ аръёсы со пыдес вылаз сылӥсь ултӥям кун вал. Дасо аръёс ӵоже султыны, тупатскыны выриз. Ӟеч-а, урод-а — тыршиз. Луэ, дыр, вал ӟечгес но. Но, мар ватонэз, Россилэн ӝутсконэзлы пумитъяськисьёс кунгож сьӧрын гинэ ӧвӧл, асьме кунамы но тырмыт.

Али Россия ассэ возьматӥз, потэ-а, уг-а, но мынэсьтым мылкыдме лыдэ басьтоно, шуиз. Америкаысь, Британиысь, ӧжытгес — Франциысь, Германиысь, Италиысь, кивалтӥсьёс туж юн лекъясько, ма карыны уг ни валало. Соослы туж яра вал Россиез ултӥяны, отын ваньмыз урод, экономиказы, армизы куашкамын, шуыны. Но югдур чылкак мукет пала берытске. Россия, кызьы шуо, ваньзылы пӧлыпум возьматӥз. Яркыт Олимпиада паймытӥз. Нош шуо вал, асьмеос сое ортчытыны ик ум быгатэ, сборноймы возьытэ усёз. Собере — Крым. Америкаысь разведкаен кивалтӥсьёс но таӵезэ ӧз вите, уйвӧтазы но ӧз адӟе. Бӧрысь — санкциос. Соосты кутӥсьёслэн кузязы Россия ӧз мыны, политиказэ ӧз вошты. Валамон, шугадӟиськом пичияк, но та санкциос ик асьме экономикалы юртто, производствоез, гурт хозяйствоез улӟытыны луонлык сёто.

Западын Россилы пумит туж трос верасько ке но, пумен-пумен отын но Путинлы синмаськисьёс кылдо. Учке ай, Россия 2-3 арня ӵоже Сириын сомында террористъёсты быдтӥз ни, Америка 14 толэзь ӵоже озьы ӧз быгаты. Озьыен, яке США-лэн уг поты вал террористъёсын нюръяськемез, яке… соослэн тодон-валанзы, кужмо ожгар тӥрлыксы ӧз тырмы.

— Тӥ малпаськоды, Америкалэн армиез сокем кужмо ӧвӧл?

— Оло, ваньмыз со кыл вылын гинэ — супероружие, супертехника, супервизь. Учке ай, кӧня тыршизы Сириысь оппозициез дышетыны. Нош соос ваньзы сямен исламистъёс, террористъёс, борды кариськизы. Яке тани али гинэ Пентагон ачиз ик шараяз, Афганистанын, Иранын чакламъя ужзы ӧз пӧрмы шуыса.

— Но малы соку асьмеос сокем оскиськом США-лэн кужымезлы?

— Озьыен, пӧламы вань адямиос, кин уно аръёс ӵоже со малпанэз асьмелы пыӵатэ. Соос туж быгатыса куто СМИ-осты но калыклэсь асваланзэ — менталитетсэ — асьсэ пала берыкто. Россиысь трос калыкъёслэн вань сыӵе сямзы: асьсэды котьку но пичигес, начаргес каремзы потэ. Вот ми сыӵеесь, милям номыр уз пӧрмы, улӥськом туж начар кунын… Но Россия — туж узыр кун! Асьмелэн тазалыкез эмъянъя системамы дуннеысь устоосыз пӧлы пыре, дышетон удысмы но — тужгес ӟечез! Ӝожтӥськиськом: кыӵе начаресь пенсионеръёсмы. Но дуннеысь одӥг кунын но адямиос пенсие сыӵе вазь уг кошко! Шуо, калыкмы кема уг улы, 57-60 аресозь гинэ. Но со шоро-куспо лыдпус. Зэм, кин ке 19-20 аресказ улонысь кошке, нош кин ке — 90-аз.
Асьмеос выжыкыл кылдытӥмы: Западын улон майбыр, начаръёс ӧвӧл. Но ваньмыз со синпӧет! Пӧртэм кунъёсын улон пӧртэм. Котькытын вань узыръёс но, начаръёс но. Соин ик дугдоно ни асьмеды ултӥямысь. Ми бадӟым, узыр но туж чебер кунын улӥськом! Совето вакытъёсысен кутскыса, нырысьсэ асьмелэн сомында визьмо, быгатӥсь адямиосмы, процентъёсын учконо ке, одӥг кунын но вылӥ образованиен сомында адямиоссы ӧвӧл. Визь люкъёсмы трос, соин, дыр, соосты дунъяны ум валаське.

— Но визь но вордскем музъемдэ гажан куддыръя воксё ог-огенызы уг тупало…

— Озьы. Пӧламы трос гинэ адямиос, кудъёсызлы кужмо Россия кулэ ӧвӧл. Мон соосты кӧня ке группалы люкысал. Нырысь ик, К. Маркслэн терминэныз вераса, компрадор (компрадор — ас странаысьтыз рынокен но кунгож сьӧрысь ужбергатӥсьёсын кусып возись ужбергатӥсь) буржуазия. Соос байко, калыклэсь, кунлэсь ваньбурзэ вузаса. Сыӵе буржуазимы асьмелэн кылдӥз 90-тӥ аръёсы. Шуом, М. Ходорковский. Нефтеюганскысь мувӧй компаниосын ужасьёс пумитъяськон акциосы потӥзы но, олигарх шуиз: мыным соос кулэ ӧвӧл, мед кошкозы, мон китайёсты ваё… Компрадор буржуазилы кулэ ляб правительство, малпаськыны быгатӥсьтэм калык. Соослы ӝоггес вузано кунлэсь ваньбурзэ но кисызэс зӧкгес кароно.

Кыкетӥ группа — Запад шоры учкись интеллигенция. Таос Россиын трос. Ӵемысь — гуманитарий удысъя дышетскемъёс, писательёс. Асьсэ кунзэс ултӥям пыр чеберъяськыны выро, пӧртэм премиос, званиос басьяло. Кин ке зэмзэ но сыӵе мылкыдъёсын, малпанъёсын улэ, нош кин ке юромо та сюрес вылэ султэ, аслыз кыӵе ке пайда басьтон понна. Но сооссэ но, таоссэ но гажаны мон малы ке уг быгатӥськы.
Куинетӥез — грант сиисьёс. Таосызлэн возьытсы ӧвӧл. Соослы коньдон сётозы но ма кароно вералозы. Сыӵеос пӧлын А. Навальный. Солэн нокыӵе программаез, огъя малпанэз ӧвӧл. Кыӵе кылъёсын, ӧтёнъёсын калыкез ӝутыны косозы — озьы ик лэсьтоз коньдон понна.

Шумпотӥсько, 20 ар ӵоже калыкмы визьмаськиз. Россиез юромо бугыръясьёс, асьсэды либерал нимасьёс, али нокыӵе быръёнъёсын вормыны уг быгато, 2-3 процент сяна куара уг люкало. Сюрессы одӥг — ваче вуонъёс пыр власте шедён. Быгатоз-а Россиын майдан луыны? Матысь дыре — уз. Со понна тау Украиналы. Калык адӟиз: сыӵе ваче вуонъёс граждан оже вутто. Нош Россиын 100 пӧртэм калык улэ ук!

Туала политикаысь элитамы шоры мон ӝутскем мылкыдын уг учкиськы, куд-огзэ воксё уг гажаськы. Но Россилы, ӧйтӧд маиз понна, туж зол удалтӥз. Россилэн туала азьветлӥсез Владимир Путин кызьы ке быгатӥз бадӟым люкетсэ калыкез огазеяны. Сое Сталинэн, Грозныен, Пётр Первыен ӵошатыны выро, но со нокин кадь ӧвӧл. Со мукет, таӵеез асьмелэн ӧй вал на.

Путин — со партилэн азьветлӥсез ӧвӧл, со вылӥынгес. Али со котькыӵе партия мед кылдытоз, калык отчы мыноз, солы оскоз, быръёнъёсын вормоз. Путин — вань калыклэн лидерез. Тросэз паймо: кызьы озьы властьын сомында возиське ни, нош солы оско 82-83 процентэз адямиос.

— Сирия сярысь юатэк уг быгатӥськы. Ум-а кугӟалэ отчы?

— Сириысь ИГИЛ-лэсь базаоссэ пуштытъянэз ӵошатыны выро Афганистанын ожмаськонэн. Но отын но татын ожмаськон мугъёс туж юн висъясько. Афганистанэ Совето Союз вуиз социализм лэсьтыны, Сирие — террористъёсын нюръяськыны. Террористъёс пӧлын трос гинэ ожмасько Совето Союзысь потэмъёс. Соос асьме доры медаз берытске шуыса, сьӧсьёсты асьсэ музъемазы ик быдтоно. Кыкетӥез, Россия куашкатэ Запад коалицилэсь данзэ (сомында нюръяськизы но, толыкез ӧвӧл), куинетӥез, возьматэ аслэсьтыз кужмо туала техниказэ, ньылетӥез, берытске Ближний Востокысь политикае, витетӥез, дуннелэсь воштӥськемзэ возьматэ.
Сириысь терроризмен нюръяськись коалицие пыро Сирия, Россия, Иран но Ирак. Но тросэз уг тодо, Россилэн Сириысь базаосаз туннэ нуналлы сылэ Китайысь кык корабль, одӥгез — авианосец. Китайёс татчыозь ноку но асьсэ кунгожъёссы сьӧрын ӧз ожмаське. Сириын соос дышетсконъёсы пырисько, пе. Но инты но, дыр но юнме быръемын ӧвӧл, дыр…

Елена МИННИГАРАЕВА

Туспуктӥз А. Горбунов

Удмурт Дунне
By Удмурт Дунне 19 октября, 2015 08:48