Пӧртэм калыкъёс йырзэс сыназы «Что? Где? Когда?» шудонын

Удмурт Дунне
By Удмурт Дунне 28 октября, 2015 13:59
чтогдекогда

6 команда нюръяськиз кубок понна.

Ижысь Эшъяськон юртын шаерысьтымы национально-культурной огазеяськонъёсы пырисьёс йырзэс «тӥязы» — татын ортчиз «Что? Где? Когда?» ӵошатскон.

Шудонлы туэ 40 ар тырме. Та дыр ӵоже со Россиын гинэ ӧвӧл, кунгож сьӧрын но тодмо луиз — визь люкъёс кылдытъяло асьсэлэсь клубъёссэс.

Ижын улӥсь азербайджанъёслэн «Достлуг» огазеяськонзы озьы ик туж синмаське визьмо адямиослы — вить ар талэсь азьло соос шаерысьтымы выжы калыкъёслэн огазеяськонъёссылы ӵектӥзы араз одӥг пол ке но визь сыналляны. Туэ шудон тужгес яркыт вал, угось сое нуизы «Что? Где? Когда?» клубысь чемпионъёс, «Хрусталь кучыран» призэз басьтэмъёс Ровшан Аскеров но Дмитрий Авдеенко.

Асьсэлэсь тодон-валанзэс возьматыны люкаськиз 17 команда: ӟучъёс, удмуртъёс, бигеръёс, поръёс, мордваос, крашинъёс, еврейёс, белорусъёс, немецъёс, азербайджанъёс, армянъёс. Нимаз командаен вожвылъяськонэ пыриськизы Удмуртиысь калыкъёслэн ассамблеязылэн но Нациосын ужан политикая министерстволэн командаоссы.

Шудон азьын ваньмыз тулкымъяськизы. Но нуисьёс буйгатӥзы: тӥ школае ветлэмын ке, валэктон шедьтыны кулэ! Сыӵе кылъёс бере буйгатскизы. Но кӧня ке юан бӧрсьы валан вуиз: школае ветлон ӧжыт — отын тодон-валан басьтоно, сое йырын бергатыны быгатоно на. Юанъёс герӟаськемын вал историен, культураен, искусствоен, киноен. Ровшан Аскеров, кыллы етӥз усточи, шудонэз туж капчи нуиз. Кытӥ-отӥ валэктонъёсты серем карылӥз ке но, нокин ӧз ӝожомы. Со понна уго со, зэм, туж капчи юанъёс, нош мукетъёслы шуг потэ. Кылсярысь: Василий Шукшин аслаз кузпалэзлы Лидия Федосеевна Шукшиналы сыӵе кушем ним сётӥз, кудӥз понна сое мукет режиссёрлэн ӵыжы-выжыез шуыса малпасалзы. Кыӵе? Яке: одӥгаз балын Мария-Антуанетта кузпалэзлы, француз корольлы Людовик ХVI-лы, ӝожтӥськиз: монэ кин ке но донгиз… Кин дӥсьтӥз? — юаз король. Уг тодӥськы, мон сое ӧй адӟы, — шуиз королева. Балын донгаськись муртэ тодӥзы, ӝыны ар ортчыса. Кин вал со? Таиз капчи: кыӵе городэ 2012-тӥ арын сюрес усьтӥз удмурт нылкышно йырпонон?

чгк

Удмуртъёслэн куинь командазы пӧлысь («Удмурт Кенеш», «Шунды», «Камсьӧр удмуртъёс»), жаляса верано луэ, огез но кыкетӥ туре но ӧз потэ.

Юанъёслы тужгес шонер валэктонъёс сётъяны быгатӥзы бигеръёс — соос мукетъёссэ кыдёке азьпалтӥзы — 15 луоноез пӧлысь 10 балл люкаса, кыкетӥ туре (брейн-ринге) потӥзы. Соос сьӧры кыстӥськизы ӟуч, еврей, крашин, азербайджан, белорус огазеяськонъёслэн командаоссы но Миннац. Озьы 6 команда нюръяськиз кубок понна. Жаль, ваньмыз пӧлысь тужгес усто шудӥсь, бигер визь люк Рустем Юсупов, дыртэменыз янгышаса, ӵошатсконысь потоно луиз. Командаез соку ик куашказ. Секыт нюръяськон бере кубок сюриз еврейёслэн «КипИж» командазылы. Кыкетӥ луизы Нациосын ужан политикая министерствоын ужасьёс, куинетӥ — крашинъёслэн «Всё по ГОСТу» командазы. Удмуртъёслэн куинь командазы пӧлысь («Удмурт Кенеш», «Шунды», «Камсьӧр удмуртъёс»), жаляса верано луэ, огез но кыкетӥ туре но ӧз потэ.

Вормисьёсты ӟечкылазы нациосын ужан политикая министр Лариса Буранова но «Достлуг» огазеяськонлэн кивалтӥсез Зульфигар Мирзаев.

Таӵе шудонъёс, тодон-валанэз паськытатыны, визез бергатыны сяна, юртто калыкез огазеяны, ваньмон дырез тунсыко но пайдаё ортчытыны, шуизы ужрадэз ортчытӥсьёс.

Ольга Зорина

Туспуктэмъёс: Эшъяськон юрт

Удмурт Дунне
By Удмурт Дунне 28 октября, 2015 13:59