Пичи Пурга ёросысь Выль Мӧнья гуртын лычсузьмонозь лыдӟисько

Удмурт Дунне
By Удмурт Дунне 5 октября, 2015 11:52

Пичи Пурга ёросысь Выль Мӧнья гуртысь лыдӟисьёс милемыз, газетын ужасьёсты, кемалась ӧтьыны малпало ни вал. Таяз радэ соос доры мыныны дыр шедьтӥмы ик.

«Выль ӟардон» ансамбльын кырӟась нылкышноос, 12 кузя соос, гуртазы вуэм кунооссэс котьку ик пукон корказы пӧсь табанен, пе, пумитаськом. Мылкыд карисьёслы куд ке дыръя пӧсь мунчозэс но, пе, эстӥськом. Вашкалаоссылэсь сям-йылолъёссэс соос утьыса возё.

Выль мӧньяос ӟеч кусып возё Москваысь нылпи творчествоя но культурая академиен — ог-огзы доры куное ветло. Туэ академилы 20 ар тырме, отчы но выль мӧньяосты ӧтизы. Озьы «ӟардонъёс» та вие кузь сюрес вылэ потыны дасясько. Удмуртъёслэсь сюанзэс но турнан дырзэс возьматон понна сюрло но, кусо но, сарба но шедьтӥзы ини. Юри, пе, отчы мынон понна бадьпу ньӧрлэсь кенер но керттыса дасямы ини.

17-2-1

Гуртысь лыдӟисьёслы газетчиос «Удмурт дунне» энциклопедиез кузьмазы. Библиотекаын ужасьёс сое туж дуно кузьымез кадь кутӥзы, угось «Удмурт дуннеез» лэсьтӥзы соослэн гуртооссы но.

Соос кузь сюрес вылэ потаны но пукон корказылы бадӟым юрттэт сётэмзы понна тау каро колхоз кивалтӥсьёссылы.

Выль мӧньяослэн пукон корказылы паймыса быриськом вал, со зэмос узыр музейлы укша. Вуж нылпи садзэс соос такем усто пӧрмытӥллям, кесяны сётӥллямтэ, азбарысьтыз кирпичлэсь ӝутэм складэз мунчо кариллям. Корка шорын ик гурзы сылэ, отын соос пыжисько. Вашкала арбериос но дӥськутъёс маке мында люкамын. Эсьмаса, бызьыны дасяськись нылашлэн сандыкысьтыз куэм дэра басмаоссэ, дэремъёссэ, керттэм чулкаоссэ но пӧзьыоссэ, киосынымы кутылыса ик, учкылӥмы. Юртлэн шораз ик, пичи гинэ висъетын, гуртысь данэ потэм адямиоссылэн туспуктэмъёссы но соос сярысь гожъямъёс люкамын.

Газет уж сярысь мадиз валтӥсь редактормы Зинаида Рябинина. Со буре вайиз «Советской Удмуртия» («Удмурт дунне») газетэн кема аръёс ӵоже кивалтэм Василий Михайлович Михайловез но та газетын ик тыршем журналистэз Вячеслав Михайловез. Та дано воргоронъёс кыкназы ик Выль Мӧнья гуртын вордскемын.

«Выль ӟардон» ансамбле ветлӥсь нылкышноос ваньзы «Удмурт дунне» газетэз басьто вылэм. Нунал вордске ке, почтальонлэсь лыктэмзэ гинэ, пе, возьмаса пукиськом. Сыӵе кельше газетты, шуо соос.

— Газет бамысь котьмае луэ шедьтыны, со котыр ласянь милемыз улыны дышетэ, — вера ансамблен кивалтӥсь Юлия Ильина. — Лычсузьыса но яратыса ми сое лыдӟиськом.

— Милемлы, гуртын улӥсьёслы, тужгес тунсыко но матын потэ пичи гуртъёс сярысь гожъямъёсты, — Юлия Ильина борды итӥсько дышетӥсьёс Тамара Николаева но Лидия Воронцова.

— Нош мон, егитъёслы потӥсь «Дарт» газетэз лыдӟыса, ачим егитомисько кадь, — шуэ гуртысь библиотекарь Алевтина Ильина. — Шумпотоно, туала егитъёсмы туж дӥсьтӥсесь шуыса.

Пумиськонэ 7-тӥ классын дышетскись нылпиос но лыктӥллям. Соос но милемлы пӧртэм пумо юанъёс сётъязы. Гуртысь лыдӟисьёслы газетчиос «Удмурт дунне» энциклопедиез кузьмазы. Библиотекаын ужасьёс сое туж дуно кузьымез кадь кутӥзы, угось «Удмурт дуннеез» лэсьтӥзы соослэн гуртооссы но.

Любовь Тихонова

Туспуктӥз А. Горбунов

Удмурт Дунне
By Удмурт Дунне 5 октября, 2015 11:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<