Парлы пар сюлэм

Удмурт Дунне
By Удмурт Дунне 21 октября, 2015 14:40

Пичи Пурга ёросысь Пуро-Можга гуртысь Зоя но Василий Окороковъёс котыр ласянь адӟем карымонэсь: кырӟаны-вераны устоесь, таза улонэн эшъясько.

Ог-огзэс яратӥсь адямиос соку ик син шоры йӧто: укыр мусоесь, ӝикытэсь но чебересь соос.

Кыксы но соос та гуртын ик вордскемын, ӵош шудыса, будэмын, одӥг парта сьӧрын пукемын. Яратӥсь сюлэмъёсты армия гинэ люкылэм. Отысь бертыса, Вася соку ик Зоязэ кураны шӧтам. Нош кыӵе сюан шудӥллям! Огазе луэмзы бере Окороковъёс шудон корка кадь ик ӝик-ӝик юртъер пуктӥллям.

Зоя но Василий Окороковъёс пичи дырысен ӵошен.

Зоя но Василий Окороковъёс пичи дырысен ӵошен.

— Ми ай соку пичиесь вал, — кузпалъёс сярысь ӟеч кылъёс вера та гуртын ик улӥсь Екатерина Байсарова. — Быдэс школаен тодӥськом вал: 7-тӥ классын дышетскыкузы, Вася Зоялы яратэмез сярысь гожтыса сётэм.
Зоя Михайловна совхозын учётчикын но ужаз, столовойын калыкез но сюдӥз. Шутэтскыны магазинысь потӥз ини. Ӟеч ужамез понна ужысь ветеран луиз.

Парлы пар сюрем: Зоя но Василий Окороковъёс клубе ӵошен кырӟаны-вераны потало, сценкаосты но быгатыса шудо. Кыкназы но соос шоккетыны ярато, хоккеен шудыны потало, гуртысь калыкен ӵош удмуртлыкез утьыса возё.

Зоя Михайловналэн туж потэ на вылэм ужамез. Но Василий Зоязэ жалям, тырмоз, пе, тыныд ужаны, дорын но берганэд тырме. Кузпалъёслэн пудозы гид азбар тыр.

Ачиз Василий Николаевич ялан руль сьӧрын ворттылэ на — нылпиосты Брангурт шор ёзо школае нуэ-вае. Со та удысаз егит дырысеныз тырше ини. Нырысь-валысь УАССР-лы 10 ар нимо совхозын тыршиз, гурт калыксэ автобусэн райцентре но музон интыосы нуллӥз. Ужзэ воргорон яратэ, быръем удысаз мыло-кыдо тырше.

Кузпалъёс 3 пинал вордӥзы. Табере ваньзы быдэ вуизы ни, нош шутэтскон нуналъёсы анай-атайзы доры одно берто.

— Нылпиоссы но асьсэос кадесь ик котьмар карыны мыло-кыдоесь, — одӥг ымысь кадь верало гуртоос. — Котькыӵе уж борды рос-прос басьтӥсько, котькинлы юрттыны дасесь соос.

Зоя Михайловна но Василий Николаевич егит дырысенызы ини эшъясько «Удмурт дунне» газетэн.

— Нуналлы быдэ почтальонмылэсь лыктэмзэ возьмаськом, — лыдӟиськемзы сярысь верало кузпалъёс. — Газет киямы вуэ ке, кин нырысь ик лыдӟоз шуыса, ӵемысь споръяськыны кутскиськом. Э, собере нокыӵе уж кулэ уг луы ни, газет пушкы быдэсак выйиськом.

Любовь Тихонова

Удмурт Дунне
By Удмурт Дунне 21 октября, 2015 14:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<