Пӧсь гурысь — выль машина

Удмурт Дунне
By Удмурт Дунне 5 октября, 2015 14:21
веста

«Лада Веста» машина туж учкымон пӧрмем — чик но бере уг кыльы кунгож сьӧрын поттэм нимо-дано машинаослэсь.

Ижысь автозаводын поттыны кутскизы «Лада Веста» машина. Конвейерез усьтонэ пыриськизы вылӥ кивалтӥсьёс, заводын тыршисьёс.

Выль машинаез ас синмынызы адӟыны лыктӥзы Удмурт Республикалэн Тӧроез Александр Соловьёв, Россилэн Президентэзлэн Приволжск федерал округъя оскем муртэз Михаил Бабич, Россиысь промышленностья но вуз каронъя министрлэн воштӥсез Александр Морозов, «Автоваз» концернлэн президентэз Бу Инге Андерссон, «Камаз» огазеяськонлэн кивалтӥсез Сергей Когогин.

«Лада Веста» машина туж учкымон пӧрмем — чик но бере уг кыльы кунгож сьӧрын поттэм нимо-дано машинаослэсь: вылыз — чебер, пушкыз — туала куронъёслы тупась. «Автоваз» огазеяськонлэн президентэз Бу Андерссон азьвылгес ивортӥз вал, машиналэн дуныз 400 сюрс манетлэсь кӧнялы ке гинэ ятыргес луоз шуыса. Но экономикаын шуг-секытъёсын йырин производство дунояз, таин валче машиналэн дуныз ӝутскиз 600 сюрс манетозь. Сое басьтыны луоз туэ 25-тӥ ноябрьысен «Автовазлэн» 22 городысь вуз карон интыосаз — пӧлазы, кылсярысь, Ижевск, Москва, Казань, Тольятти. Россиысь кылемъёсаз городъёсын машина вӧлмоз вуоно арысен.

Михаил Бабич, конвейерез усьтыку, лыдӟиз Президентлэсь Владимир Путинлэсь гожтэтсэ. Отын пусъемын: «Шумпотӥсько «Лада Веста» машинаез поттыны кутскемдылы. Та дано учыр, тужгес но та вакытэ: производство паськытамен, кылдозы ужан интыос, калык ӟеч уждун басьтоз, нош таин валче азинскоз Удмурт Республика но». Михаил Бабич шараяз аслэсьтыз но мылкыдзэ:

— Ижысь автозаводэ вуылӥ кӧня ке ар талэсь азьло. Соку син шоры пуктыны ик секыт вал, вакчи дыр куспын татын выль машина поттыны кутскозы шуыса. Тау кареме потэ заводын тыршисьёслы. Зэм но, син кышка, ки лэсьтэ вылэм.

Люкаськемъёсты ӟеч-кылаз Удмурт Республикалэн Тӧроез Александр Соловьёв но. Со пусйиз: кивалтон ёзъёслэсь вужмем транспортсэс выльдоно асьме дорын бичам машинаосын — та пумысен «Автовазэн» огкыл тупатыны чакламын. Ижысь автозаводын радъямын луоз машинаослы 25 пумо воштос ёзъёсты поттон но — соосты палэнысь ворттонэз уз лу ни. Ар ортчыса, Ижысь автозаводын бичаны кутскозы «Лада Веста Гросс» машина.

Елена Тугашова

Удмурт Дунне
By Удмурт Дунне 5 октября, 2015 14:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<