Надежда Лопатина: кивалтон — пиосмурт уж

Удмурт Дунне
By Удмурт Дунне 15 октября, 2015 14:05
Н. Лопатина

Н. Лопатина

Та нуналъёсы 60 арессэ пусъе «Ӟечбур!» газетлэн валтӥсь редакторез, Удмуртиысь дано журналист, гожъяськись Надежда Лопатина. Туннэ со шарая лушкем малпанъёссэ.

— Надежда Серафимовна, кыӵе мылкыдъёсын пумитаськоды вордӥсь-кем нуналдэс?

— Сое котьку возьмано. Но 60 арес тырмыку, медаз чаляк вуы кадь потэ, малы ке шуоно сомында лэсьтымтэ ужъёс ай. Адямиослэн шуэмзы потэ кадь: арлыдыз вуэмын ни, мар уг буйга на, егитъёслы инты мед сётоз. Нош мылкыдэз нокин уг юа. Тужгес бадӟым вӧсе — газетмылэн тиражез усе. Малызэ валаны луэ. Кылсярысь, Якшур-Бӧдья ёросысь одӥгаз школаын азьвыл аръёсы ай 600 пала пиналъёс вал. Отын 300 мурт газетэз басьтӥз. Но пумен дышетскисьёс 2 поллы кулэсмизы. Али 100 пала пинал визь люка. Собере, адямиослэн уждунзы но пичи, сиён-юон пунэмен басьто. Кызьы гожтӥськозы соос газетлы? Нош сое поттыны кужымез озьы ик сётӥськомы. Али малпасько: кыӵе меда амалъёс вань на тиражез йылтыны? Ваньмыз уксё борды пыкиське. Кыӵе ке ужрад ортчытон понна но коньдон кулэ уго. Азьвыл возьдаськон но сокем ӧй вал, спонсор утчаськод вал. Али шуозы кадь: та быдӟа арлыдаз но та кышномуртлэн номыриз но ӧвӧл шат? Нош ик кураськыны лыктэм кадь.

Ас вакытаз гожъяськыны быгатӥсь пиналъёсты шумпоттыны малпамы. Куд-огез нуналлы быдэ выль «пӧрамъёсыныз» гожтэт ысъя уго. Котькуд номерын коть печатла. Озьы кылбуръёсынызы 13 книга потӥз. Отӥяз дышетӥсьёс вазиськыны ӧдъязы, ужъёсынызы бичетъёс поттыны курыса. Али но кыӵе ке выль проект борды басьтӥськем потэ.
Льӧль малпанэ: потэ Герман Ходырев нимо премиез улӟытэме. Ачим ик сое, «Дэменлэн» правленияз ужакум, кылдытӥ вал. Но берло дыре уксё ӧвӧлэн премия люкылон кысӥз. Нош нылпиосты гожъяськыны бурдъян, дышетӥсьёсты бугыртон понна со туж кулэ.

— Асьтэос но гожъяськытэк улыны уд быгатӥське…

— Ужъёсы туж трос люкамын. Берлоезлы «Кин кызьы кӧтсэ тыре?» удмуртэн-ӟучен книгаелы 7 ар люкай материал. Со дышетӥсьёслы но анай-атайёслы пособие выллем луиз. Уйёсы, шутэтскон нуналъёсы лэсьтэм маке. Нош дунзэ вераськод ке, адямиос берытскыса кошко. Дышемын ӧвӧл соос книга басьтыны.

Гожъяськеме потыса ик, кун службаысь но кошки. Отын интые шуныт ке но вал, ӝоканы кутски. Нырысь малпасько вал: чиновник луыны дышо, адямиос быгато ук. Кылбур гожъямме но лушкем возьыны тырши. Творчествотэк ӝокан вакытам ик «Ӟечбур!»-е ӧтьыны ӧдъязы. Соку Президентлэн но Правительстволэн администрациенызы кивалтэ вал Александр Горяинов. Юа: малы кошкиськоды? Бадњым уждун сӥзизы шат? Уждунзэ ӧй ик юа вал. Но кошкон сярысь малпан но шуак ӧз лыкты — 5 толэзь малпаськи.

«Ӟечбур!»-е вуэме бере одӥг адямилэн верамез но вань: уралтыса кадь, пе, ужаськод. Творчестволэсь мӧзми, лэся. Но мон уг жаляськы чиновникысь кошкеме сярысь. Сотэк книгаосы но, оло, ӧй кисьмасалзы. Туннэ соос 10 ни. Соосты кутсконысеныз пумозяз ачим лэсьтӥсько. Нылы юрттӥське на. Огвакытэ издательствоын но ужай уго. Соин но тодӥсько, кытчы мае пуктоно.

IMG_5990

— Нош тужгес лушкем малпанды кыӵе?

— Мон адӟи яратонэз. Яратыса бызи. Зэм, Коляен кема ӵош улыны ӧз кылды — люкиським. Но мон сыӵе яратонэз ӧй ни шӧды. Котьма ке но, туж потэ сыӵе адямиез шедьтэме. Мон весь малпасько, ӧсэтӥ пыроз шуыса. Но татчыозь ӧз пыры. Мон ачим но ас улонме шулдыртыны быгатӥсько. Семинаръёсы, пумиськонъёсы ветлӥсько. Пӧртэм удысъёслы сӥзем лекциосты кылзӥсько. Отын адӟиськод: адямиос кӧня пол усьылӥзы, но соос ӧз тӥялске, азьлань мыно. Сыӵе учыръёсты, адямиосты адӟыса, юскиськемысь дугдоно. Котькуд пумиськон тылгизьы куштэ, тазьы но ужаны луэ вылэм шуыса.

Газет уж пӧлы ӧй выйысал ке, оло, семья кылдытыны быгатысал. Но семьялы асме сӥзьысал ке, уже, оло, вужере кыльысал. Но мон туж шумпотӥсько: нылъёсы, соослэн нылпиоссы вань. Мӧзмисько ке, соос доры мынӥсько. Ас нылпиослэсь будэмзэс валатэк кылёно. Весь ужын я кытын, маке бергаськод — улонысь чыры-пырыос маза чик уг сёто. Ыштэм аръёсме но пушкам кылем шунытме сётӥсько внукъёсылы. Ролик вылэ но султылӥсько соосын ӵош. «Бабуш» шуыса вазисько ке, быдэс мугор ик небӟе кадь, кивалтӥсь луэмысь дугдӥсько, командир куарае лябӟе.

Секыт мылкыдылэсь бушатӥськон вылысь кутӥсь-ко но бакчае кошкисько вал. Жадьыса бертӥсько но нылъёсылэсь юасько: шыд пӧзьтӥды-а? Ӧм, шудӥм, шуо. Ярам, иське, мон но шудыса бертӥ бере, изьыны выдо, шуисько вал. Озьы ик шыд пӧзьтыны дышизы. Мон соосын барышня кадь улӥ. Соос коркаез но чылкыт возё вал. Соин но, лэся, мон пиосмурт ужез быдэсъясь луи. Мон пиосмуртъёсын янгышалляй. Соин но, лэся, соослы уггес оскиськы. Аслым ачим оскисько. Гаражез љутыку но, лэсьтћськисьлы цементсэ но ачим сурай, кирпичсэ но ачим ик утчай. Кышномуртэз ачиз улон косэ кужмо луыны, куддыр ляб но ненег кариськем потэ ке но. Секытэсь мылкыдъёс-малпанъёс асьсэос кошко, киос-пыдъёс ужало ке. Уж йӧнатэ адямиез. Нош ужамедлэсь емышсэ адӟиськод ке, макем шумпотӥськод!

Музъем участокысьтым нюлэс погыръямы. Сое нуозы кожаса, 2-3 ар зор улын котмемзэ учкыса улӥ. Кулэ ӧз каре но, соин мунчо ӝутӥ. Быгатэмелы туж шумпотӥ. Гожъяськыса-лыдӟиськыса гинэ пукысал ке, ужам, оло, чырсасал. Пиосмурт ужез быдэсъяса, мон дыши кинэн кызьы вераськыны, кыӵе ӧсъёсты кулэ дыръяз усьтыны. Кивалтон — со пиосмурт уж. Кыӵе но ужпумез вырӟытоно ӧвӧл уго! Мон али интыям пиосмуртэз пуктыны ӵектысал. Куд-ог егит пиосты вераськыны ӧтьылӥ ни. Но нылпи газет шуыса, лыктэмзы уггес поты. Телевидение сярысьгес уйбырто.

Елена Сараматова

Удмурт Дунне
By Удмурт Дунне 15 октября, 2015 14:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<