Малы кышномурт кияз кутэ пурт? Солы уг тырмы… яратон

Удмурт Дунне
By Удмурт Дунне 15 октября, 2015 14:21

Берло дыре кышномуртъёс законъёсты ӵемгес тӥяны ӧдъязы, пусъё югдурез утисьёс, следовательёс.

Эн юы!

Кылем аръёсы чагыр экран пыр ӵем возьматъязы дискотекаын егит нылъёслэсь жугиськылэмзэс. Та вакытэ нылмуртъёс эшшо керӟег луэмын, шӧдске — лушкаськем, адямиез тышкам сяна, кизы пыре мурт улонэз уретыны. Следовательёслэсь кышкыт учыръёссэс кылзыса, йырси пежыр ӝутӥське. Детективъёс соос вӧзын бездыт адско. Валаны луэ: вир кисьтонъёсты ӵемысь пуромытэ кудӟытӥсьсэ юон.

Глазовысь 64 аресъем кышномурт аслэсьтыз 20 арлы пиналгес туганзэ пуртэн бышкалтэм. Со нуналэ таос кыкназы но пезь-пезь юэмын вылӥллям. Воткаысь нокытын ужасьтэм 46 аресъем кышномурт кузпалзэ быдтэм. 2-тӥ группаысь инвалид воргоронлы уг кельшы вылэм кышноезлэн курытэныз эшъяськемез. Ялан тазэ визьманы вырем. Пиосмуртлэн нукыртэмез акыльтэм — кышномурт сое 10 пол пуртэн бышкам.

Шаерысьтымы Следствиея управлениысь тужгес кышкыт йыружъёсты эскеронъя 1-тӥ ёзлэн кивалтӥсезлэн воштӥсез Сергей Фёдоров валэктэ: экономикаысь кризис, семья вискын кылдэм шуг-секытъёс кышномуртлэсь лулсэрзэ лябӟыто. Соин пӧртэм йыружъёс сярысь иворъёс огкадь вуо ёросъёсысь но, городъёсысь но. Сергей Семёнович чакламъя, кышномурт таӵе вамыш лэсьтэ кӧтӝожзэ пушказ кема воземез бере. Туала арын соослы туж уг тырмы яратон но гажан.

— Берлоез учыр калык пӧлы паськыт вӧлмиз, — вера Сергей Фёдоров. — Шоркарысь Ленин ёросысь вуз карись луыса ужась 38 аресъем Касимова шӧмаськем йырын кузпалзэ вииз. Пытьыоссэ соку ик утялтыны кутскиз: дусымзэ ӧтьыса, вирен наштаськем диванэз ӵошен сэрттӥзы но куштӥзы. Шӧез Касимова юдэсъёслы вандылӥз. Городысь пеймыт интыосы сое туганэныз сэрпалляса ветлӥз. Мукет нуналаз кышномурт полицие вазиськиз. Но йыруж сярысь со пал кыл но ӧз поттылы. Югдурез утисьёсты сюлвориз: ышем картме, пе, утчалэ-шедьтэ вал. Эскерон ортчытэм бере кырсь уж ӝогак шарае потӥз. Мугор люкетъёсты шедьтӥз Ижысь огаз автосервисын ужась пиосмурт. Та бӧрсьы кышномурт ӧз танӥськы ни: 2 ар, пе, картэным тупатэк улӥмы, ӧй чида ни… Касимовалэн туганэз 2 арлы пытсэт сьӧры шедьыны быгатоз. Кышномуртлы кемагес пуконо луоз — ог 15 ар.

Якшур-Бӧдья ёросысь Тыло гуртысь огаз коркан курытсэ юиллям кузё воргорон, 27 аресъем туганэз но эшшо одӥг пиосмурт. Яратон, матысь кусыпъёс сярысь лабыртыны ӧдъяллям. Ӵапак соку кузё воргорон нылмуртлы сюлэмзэ усьтоно кариськем: мукетсэ, пе, шедьтӥ. Кышномуртлэн йырыз кур луэм. Валаса ик вуттымтэ пиосмуртэ пуртэн бышкалтэмзэ.

Ижысь 45 аресъем кышномурт но калыкез онгромытӥз. 3 пол пытсэт сьӧры шедьылэмын. Берлозэ пукиз адямиез жугыса виемез понна. Но кечат-вамат укно сьӧрын солы визь пырымтэ, лэся. Эрике потыса, улыны интыяськиз атаез вӧзы. Юиз, калгиз, бускельёсыныз ӵаш поттылӥз. Одӥг нуналэ атайзэ но курытэныз куноятӥз. Соку ик керетон потӥз. Кышномурт кема ӧз малпаськы — атаезлэн сюлэмаз пурт мертчытӥз…

Малы кышномурт шеде кечат кенер сьќры?

Малы кышномурт шеде кечат кенер сьќры?

Кӧтӝож — кышкыт

Шаерысьтымы семьяослы улон-вылонын юрттэт сётонъя «Шуныт корка» огазеяськонын ужасьёс нылмуртлэсь лулпуш дуннезэ нуналысь нуналэ эскеро. Берло дыре соос но асьсэлы юан сётъямысь уг дугдо: кызьы ненег киос адямиез быдто?

— Со трос мугъёсын герӟась-кемын, — малпанзэ усьтэ огазеяськонлэн кивалтӥсезлэн воштӥсез, психолог Светлана Мерзлякова. — Нырысь ик: ӵуказе нунал сярысь сюлмаськонъёс адямилэн лулсэрыз вылын зол шӧдӥсько. Та вӧзы ватсаське на кыкетӥез: азьвыл малпаллямы, пиосмурт кышнозэ тышка ке, озьыен, яратэ. Соин ик кышномурт жугиськись кузпалзэ ялан чидаса улӥз. Туннэ тросэз нылмуртъёс мукетэсь — юись, калгись картсылы уг сётско, кулэ дыръяз асьсэос тыш сётъяло. Но пӧлазы шедё лябъёсыз но: урод мылкыдзэс, кӧтӝожъёссэс аръёсын люкало. Кудӟытӥсьсэ юо. Озьы чиданзы пӧсьтэ — кышкыт йыруж лэсьто.

Огазеяськонлэн кивал-тӥсез, психолог Надежда Кокшарова шуэ: семьяын котьку шуг-секытъёс кылдыло. Соосты вормыны 2 амал вань: яке жугиськыса-черекъяса, яке ог-огеныд кенешыса. Зэм, берлоез секытэнгес сётӥське. Тужгес но — ченгешисьёс сач-сач юэмын ке.

— Асьмелэн янгышмы — кӧтӝожъёсмес пушкысьтымы поттыны ум быгатӥське, — вера Светлана Мерзлякова. — Соосты вормыны туала арын трос амалъёс вань. Тужгес огшорыез — карт пумысен кӧтӝожъёсты матысь эшлы веран. Сюлэмын соку капчи луэ. Йыркурез сылмытыны юрттозы на крезьгур, спортэн я киужен вырон, уж пӧлы выён. Та амалъёс но пайда уг ваё ке, вазиськоно психологлы.

Янгыш воргорон?

Элькунысь Югдурез утёнъя министерстволэн координацияя кенешысьтыз ёзчи, Дышетонэз азинтонъя институтлэн (азьвыл нимаськиз Дышетӥсьёслэсь тодон-валанзэс будэтонъя институт) ректорез, психология наукаосъя кандидат, доцент Владимир Байметов та ужпум шоры ас сяменыз учке.

— Калык пӧртэм сямен дунъя пиосмуртлэсь но кышномуртлэсь асьсэды воземзэс, — валэктэ Владимир Александрович. — Семья, социальной институтъёс пыр нылъёслы но пиослы валэктыны выриськомы, кызьы ассэ возьыны кулэ пиосмурт, нош кызьы — нылмурт. Соин ик, пи мунёен, дыды машинаен шудыны кутско но, анай-атайёс соку ик паймытско. Зэм, пиосмуртлэн инкуазез лекгес. Таин валче пиосмурт кыӵе ке йыруж лэсьтэ ке, сюлэммес со сокем юн уг позырты.

Чылкак мукет ужпум нылкышноосын. Соос ненегесь, лякытэсь, семьяез шунтӥсесь. Соин, нылмурт адямиез вие ке, калык абдра, озьы луыны кулэ ӧвӧл, шуэ. Мургес учконо ке, инкуазь куддыр нылмуртъёслы но пыӵатэ керӟег сямзэ. Но со сямез сайкатӥсь ӧз луы ке, та сярысь нокин уз тоды. Туала нылмуртъёслэсь лек мылкыдзэс ӵемысь бугырто асьсэос воргоронъёс. Малы кышномурт пушкысьтыз нунызэ вие, вордэм нылпизэ куштыса кельтэ? Та ваньмыз герӟаськемын пиосмуртлэн ассэ янгыш воземеныз.

Берло дыре кышномуртъёс гинэ лек луизы, шуыны уг луы. Социологъёс но психологъёс пусъё: дуннеын огыр-бугыр улон котькудмы вылын шӧдӥське. Но шуг-секытъёс золгес зӥбо кышномуртлэсь пуш дуннезэ. Солы угось трос куронъёс пуктэмын: корка, пудо котырын бергано, нылпиосты сюдоно-дӥсяно-дышетоно… Нош палэнысь юрттэт ӵем дыръя уг вуы. Соин, кышкыт учыръёс сярысь кылӥсько ке, соку ик жалян мылкыды пуроме: малы меда кышномурт вӧзын ӧй вал сое пӧртэм шуг-секытъёслэсь утись паськыт, кужмо пельпумъёс?

Воргоронъёсын ӵошатыса, кышномуртъёс трослы лекесь шуыса малпан шонер ӧвӧл. Кышкыт йыруж лэсьтыкузы, соосыз но, таосыз но адямиос огкадь сьӧсьлы пӧрмо, — лыдъя Владимир Байметов.

Ольга Корепанова

Туспуктӥз А. Горбунов

Удмурт Дунне
By Удмурт Дунне 15 октября, 2015 14:21