Ляб возёсъёты ӝутозы кужмоосыз

Удмурт Дунне
By Удмурт Дунне Октябрь 21, 2015 09:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кызьы азинске шаерысьтымы гурт удыс? Мар возьмано азьланьын? Та но мукетыз сярысь Гурт удысын ужасьёслэн нуналзы азьын кенешим гурт удысъя но сиён-юонъя министрен Александр Прохоровен.

— Александр Аркадьевич, гужем туж зоро возиськиз. Таин сэрен хозяйствоос шуге-леке вуизы. Тужгес секыт югдур пуромиз уйпалан. Туннэ буйгатскыны луоно?

— Жаляса верано, берло 60 ар ӵоже туэ кадь кот ар ӧй вал на. Соин сэрен уборкаез радъян понна технологиосты но воштоно луиз. Гуртоос азе ужпум пуктэмын вал: котькуд йырлы 25 центнер пудо сиён дасяно. Секыт ке но вал, хозяйствоос та куронэз быдэстӥзы: котькуд йырлы 25,4 центнер дасямын. Куд-огезлэн кылем арын дасям пудо сиёнэз но кылемын на.

Prohorov_2-mdf5g3buocurbm45n876ugdj226hpo5vi1y1sioumk

Туэ августысен Элькунысьтымы Гурт хозяйствоя но сиён-юонъя министерствоез валтэ А. Прохоров.

Зэм, куд-ог ёросъёсын кӧня ке шымырсконо луозы. Куд-ог ыштонъёс вань уго, государство но та ласянь юрттэт сётыны уг быгаты — бюджетын уксё ӧвӧл. Кылсярысь, ю-нянез утялтыны ваньмыз ӧз вуттӥське. Ог 10 сюрс гектар вылысь ю тысь лымы улэ кылиз. Но со бусы кесэгъёс гинэ, зоръёсын сэрен отчы комбайнъёслэн пыремзы ӧз луы. Та понна кинэ ке янгыше уськытыны уг яра. Зэм, ужзэс рос-прос радъяны быгатӥсьтэмъёсыз но сюризы: Эгра, Кез, Балезино но Красногорск ёросъёс.

Сюлмаськытэ кидысъёсын югдур. Туннэ со кулэяськеммылэсь 97 процент люкамын. Но ӟечлыкез начар. 20-30 процентсэ бусыосты уго утялтӥзы ни ю тысь зол-зол котмем бӧрсьы. Вылаз ик салкым возиськиз. Соин ик кидыс ляб, тулыс со ӟеч уз уда. Куд-ог ёросъёсын кидыс воксё но тырмыт дасямын ӧвӧл на. Туннэ ужпум пуктэмын кидыс утчаны, воштыны, басьтыны. Тулыслы али ик дасяськоно.

— Зоро но кезьыт улэмен, скалъёс йӧлзэс кулэстӥзы, нош Удмуртилэн Тӧроез Александр Соловьёв гуртоос азе ужпум пуктӥз: йӧл кысконэз 2020-тӥ арозь 1 миллион тоннаозь вуттоно.

— Йӧл, зэмен ик, синылӥз. Но али уногес но уногес кыскиськом. Кылем арын сярысь, 12,5 сюрс тонналы тросгес йӧл потэ. 1 миллионозь уг тырмы 372 сюрс тонна. Лыдъямы-чотамы но таӵе малпанэ вуимы: скал уллёез 41 сюрс 300 йырлы будэтоно. Тамында пудоез интыян понна кулэ 120 выль ферма. Вуоно арын 7 сюрс 200 сюролы уллёез йылтыны кулэ ни. Республикалэн бюджетэз пыдэстэм ӧвӧл ке но, туннэ вераськонъёс мыно, гурт удыслы уногес коньдон висъяны кулэ шуыса. Субсидия производствоез йылтыны мылкыдэз мед ӝутоз, со юрттэт гинэ, ыштонъёсты берыктон амал гинэ медаз луы. Зэм, кинлэн туннэ производствоез бадӟымгес, кин бусыосты уногес кизе но уногес урожай басьтэ, со ик бадӟымгес юрттэт но басьтэ.

— Йылтоно ке, ӟеч выжыысь пудо басьтоно, нош вань-а хозяйствоослэн сыӵе луонлыксы?

— Умой пудоез нокин уз быдты. Туннэ шаерамы но солэн палэназ ӟеч выжыысь пудо вузасьёс басьтӥсьёслэсь уногес. Но хозяйствоос, уксёзэс шыръяны вырыса, пудо уг басьто. Вуоно арын ик та ласянь ӟеч иворъёс луыны кулэ.
Хозяйствоослэн кивал-тӥсьёссылэн производствоез йылтыны мылкыдъёссы бадӟымесь. Та туж шумпоттэ.

— Кыӵе ёросъёс вылэ усёз пудо йырез йылтон но фермаос ӝутон?

— Азьмынӥсь хозяйствоослы оскиськыны капчи, соос тазэ но ныпъетэз вормозы. Но кытын производствоез золгес азинтыны луэ, Вавожын я Юкаменскын? Азьмынӥсь Вавож ёрос туннэ сотэк но вань кужмысь ужа. Юкаменск та ласянь лябгес. Зэм, сое вырӟытыны трос ӟигар но уксё кулэ. Но татын сомында буш музъемъёс, ужась калык! Хозяйствоослы шокчон понна инвесторъёсты утчано. Гочатыны быгатоно. Ужбергатӥсьёс туннэ дась луо ни гурт удысэ уксёзэс поныны. Вуз каронэн вырисез уго сотэк но лачак ни. Нош гурт удысын омыръянэз туж трос на, инвесторен со эшшо но пушйысал.
Туннэ котькуд хозяйствоын утчано, кызьы со золгес азинтӥськыны быгатоз. Шаерамы 314 хозяйство, котькудӥзлэсь луонлыкъёссэ чаклаломы. Котькудзэ нимысьтыз эскеромы, учкомы, макем со 1 миллион тонна йӧл кысконэ кужымзэ поныны быгатоз шуыса.

— Мар кароно воксё начаръёсызлы?

— Вань хозяйствоос пӧлысь 131-ез араз 24 миллион манетлэсь ичи барыш поттэ. Соосты бадӟымъёсыз борды, оло, юнматоно. Зэм, со капчи ӧвӧл. Пичи хозяйствоос нимаз адямиослэн лыдъясько, отчы уд пыры. Котькудӥз кузё кариське. Но улон ачиз косэ валче ужаны. Сотэк выль гид пуктыны, пудо йырез йылтыны уд пӧрмыты. Туала куронъёслы тупась техника но пичи хозяйство басьтыны шугъяськоз. Озьыен, ялан бере кылись луоз. Туннэ котькуд ёросын сыӵе хозяйствоос вань. Ёросъёслы та пумысен малпаськыны косэмын. Сотэк азинскон уз луы.

Туннэ бадӟым оскон сёто фермеръёс. Соос дасесь вуз поттонзэс йылтыны. Соин ик, кутскисьёсызлы юрттон вылысь элькун бюджетэ уногес уксё висъяно шуыса, ужпумез ӝутӥськомы. Зэм, ужамдэ возьматӥсь отчётъёсын бызьылонэз трос. Та вылэ фермеръёс туж ӝожтӥськыло. Но мар луоз, бумага ужен выронэз капчиятӥмы ке? Адямилы уксё сётомы, нош кисыяз кылиз ке? Кескичъяськисьёс ӧжыт ӧвӧл. Ужамзэс эскеремысь дугдӥмы ке, та удысэ чуртнаськыны но узырмыны одно ик амал шедьтозы.

Али мукет секыт ужпум вань: крестьянлэсь визьзэ берыктыны кулэ. Фермер кариськыны дӥсьтонмы уг тырмы уго, ум пӧрмытэ шуыса кышкаськомы. Соин но фермере кутскисез ичигес. Нош басьтӥськисез берга. Куд-огзэ фермер шуыны но ым уг пыры. Кылсярысь, Шаркан ёросысь Николай Собин зэмос хозяйство кадь ужа.

— Но ваньзы Собин уз луэ ук…

— Соиз зэм. Но дыр вуиз ни, лэся, фермеръёсты хозяйствоослэсь висъяны — соос шоры огкадь учконо. Фермер туннэ гурт удысын валтӥсь кужым луыны уг быгаты на. Огъя производствоын фермеръёс 6 процентсэ лэсьто. Но кызьы ужамзэс учконо ке, соос хозяйствоослэсь бере воксё уг кылё. Озьы ик гыро, кизё, пудо вордо но скал кыско. Быдӟалазы гинэ пичи. Соослы азинтӥськыны сюрессэс пытсаны уг яра.

— Хозяйствоосты юнматыны, гуртъёсты азинтытэк, луоз меда? Социальной объектъёс ӝутытэк, улон сэрег висъятэк, туала арын егит специалистъёслэн гуртэ мынэмзы уг поты ни.

— Гуртъёсты азинтон шаерамы урод ӧй шуысал. Со сярысь отӥяз но ум вунэтэ. Но хозяйство азинтӥське ке, котыр улосэз со ачиз ик ӝутэ-шулдыртэ. Вавож ёросысь «Колос» хозяйствоен кивалтӥсь Владимир Красильниковез басьтэ ай! Гуртаз сюресъёс чебересь, спорткомплексэз ужа, уждунзы бадӟым. Гуртаз кыстӥськисез йылэ но йылэ.

— Тӥ дас вить арлэсь кема Шаркан ёрослэн йырыз вал. Табере — министр. Шӧдӥськоды-а хозяйствоослэн кивал-тӥсьёссылэсь тӥледлы дурбасьтэмзэс?

— Вазь на, дыр, кыӵе ке йылпумъянъёс лэсьтыны. Но огзэ адӟисько: туннэ гурт удыслэн азинтӥськыны кужымез бадӟым, гуртоослэн ужаны мылкыдзы вань. Бизнес но гурт удыслэсь уг кышка ни. Та туж шумпоттэ.
Министерствоын коллектив умой. Со туж трос лэсьтыны быгатоз, ужез умой пуктӥд ке. Мон егит ӧвӧл ни. Азьвыл но тодӥсько вал, кызьы ужез радъяно. Шарканысь потатэк ӧй улы. Куронъёс чурыт пуктӥсько.

Елена Сараматова

Удмурт Дунне
By Удмурт Дунне Октябрь 21, 2015 09:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<