Кыӵе кичӧлтонъёс юрттозы элькунамы уксё кыскыны

Удмурт Дунне
By Удмурт Дунне 27 октября, 2015 12:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Экономикаын шуг-секытъёс кылдыку, та удысэз куашканлэсь утьыны но азинтыны юртто инвестициос. Пӧртэм проектъёсты пыӵатыны луонлык усьтӥське, палэнысь юрттэт кыскыса.

Россилэн Президентэз В. Путин курон пуктӥз: 2020-тӥ арозь улосъёсын поттэм вуз пӧлысь 25 процентэз быдэстэмын луыны кулэ инвесторъёс чотын. Озьы регионъёс куспын «пӧсь» вакыт кутскиз: гочатоно зӧк кисыё компаниосты, сюлмаськоно инвесторъёслы ӟечесь условиос кылдытон сярысь.

f_ZG9yaW5mby5ydS91cGxvYWQvaWJsb2NrLzIxNi84ZGJjNmY5NjdkYzYyZjkwNWU1NTQyNjFjN2Y1MWEwOC5qcGc_X19pZD01ODg2OQ==

Кунлэн но инвесторъёслэн уксёенызы быдэсмись проект — Кам шур вамен выж.

Уж борды ӝегатскытэк басьтӥськиз Удмуртия но. Инвестициосты кыскон ласянь тырше котькуд министерство, отын кылдытэмын нимаз ужась группаос. Тужгес но бадӟым уж нуэ элькунысьтымы Инвестициосъя кун агентство. Озьы кылем арын улосысь ваньбур пӧлысь 20 процентэзлэсь ятырез поттэмын, инвесторъёсын ӵош кариськыса. Соосты кыскыны юртто шаерамы ортчись куд-ог ужрадъёс: кылем арня вискын, кылсярысь, радъяськиз Инвестициосъя калыккуспо форум.

— Та ужрадэ палэнысь компаниосты кыскыны туж секыт, — форумлы йылпумъянъёс лэсьтӥз Инвестициосъя кун агентстволэн кивалтӥсез Антон Орлов. — Угось мукет улосъёс но та вакытэ ик радъяло та выллем пумиськонъёсты. Соин ик азьланяз выль амалэн ужаны чакласькомы: асьмеос поталомы палэнэ — проектъёсынымы тодматом Москваысь, Санкт-Петербургысь, кунгож сьӧрысь инвесторъёсты.

Инвестициосъя кун агентстволэн шыкысаз та вакытэ люкамын пӧртэм удысъёсын герӟаськем 424 проект. 10 процентэз али ик дась ни пыӵатыны, кылемъёссэ йылозяз-пумозяз вуттоно на.

— Такем бадӟым ужрад бере уноез киоссэс посыны кутско: табере, иське, проектъёс син куспын быдэсмозы, — веранзэ азьланьтэ А. Орлов. — Но экономикаез пичи ке но валась адями тодэ: малпанъёс-кичӧлтонъёс трос, но мын но тод ай, соос пӧлысь кудӥз зэмзэ ик туж кулэ но кудӥзлы сӥзем уксё бӧрысь 2 поллы пайдаен берытскоз. Ӵапак таӵе форумын тодыны быгатӥськомы пӧртэм экспертъёслэсь мылкыдзэс. Басьтом Ижысь ипподромез выльдонъя проектэз. Отын чакламын шутэтсконъя бадӟым инты кылдытыны. Бен, проектмы кемалась дась вал ни, но палдурогес — солы дунъет сётэмын ӧй вал на экспертъёс ласянь. Та ужез радъяны луиз ӵапак форумын. Озьы мастер-план дасямын, отын ваньмыз чакламын ни: кыӵе объектъёсты пуктоно та зонаын, кыӵе инвесторъёс ӝоген басьтӥськозы соиз я таиз уж борды. Тодмо ӧвӧл на, одӥг инвестор радъялоз та зонаез яке отысь объектъёс пӧртэм кие люкылэмын луозы.

Инвестициосъя форуме пыриськизы Россиысь, озьы ик кунгож сьӧрысь бадӟым компаниос. Китайысь, Австриысь, Словакиысь инвесторъёс чаклазы, кыӵе удыслы уксёзэс сӥзёно. Австриысь компания, кылсярысь, поттэ автотрассалэн дуръёсаз пуктӥськись бетон пыкъетъёс: продукцизы вылӥ ӟечлыко, куронъёслы тупа. Австриецъёс малпаськыны кутскизы та производствоез асьме дорын усьтон но татын поттэм вуззэс бускель улосъёсы вӧлмытон сярысь. Калыклы ужан интыос кылдозы, кунгожсьӧр компанилэн но, шаермылэн но кисыязы табыш люкаськоз. Ноябрь пумозь та проектъя огкыл кутэмын луоз.

Елена НИКИТИНА

Туспуктэм: udmurt.ru

Удмурт Дунне
By Удмурт Дунне 27 октября, 2015 12:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<