Ххозяйствоос бусыосы арысь аре ӧжытгес удобрение потто

Удмурт Дунне
By Удмурт Дунне 27 октября, 2015 12:44
13192,старая монья,поля,удобрения,космическая техника для строительства,сельское хозяйство

1 сюрс гектаре изваска поттыны ог 5 миллион манет кулэ.

1990-тӥ аръёсы гектарлы быдэ 97 килограмм усе ке вал, миым 16 килограмм сяна ӧз люкаськы.

«Удмуртский» агрохимцентрен кивалтӥсь Николай Кычанов верамъя, изваска сярысь куд-огез воксё вунэтӥзы ни. Нош чырс бусыысь кыӵе урожай басьтод?

— Куд-ог хозяйствоос музъемъёссэс но уг эскеро. Азьмынӥсь хозяйствоос гинэ ог 5 арлы огпол, мар бусыосазы уг тырмы шуыса, анализ лэсьто ик, — шуэ Николай Кычанов.

Зэм, эскеронъёс ортчытон понна уксё кулэ. Изваска но бусые нокин дунтэк уз потты. Кылсярысь, 1 сюрс гектаре изваска поттыны ог 5 миллион манет кулэ.

Адӟем карытэк уг луы Киров улослэсь. Удмуртиын сярысь, отын гыроно бусыоссы 3 поллы паськытгес. Соос гектарысьтыз 22 центнер калто, асьмеос шорлыдын 17 центнер люкаськомы. хозяйствооссы азе чурыт куронъёс пуктэмын. Асьсэлэн фосфоритной пызь лэсьтонъя заводзы но вань. Таид музъемез туж умоятэ. Со пызьлы кылем арын гочалляз Шаркан ёросысь «Агрохимен» кивалтӥсь Александр Кононов. Но туэ кировъёс дӥне ӧз мыны ни, фосфоритной пызь уго туж дуно усе.

— Киров улосын ас вакытаз ляб хозяйствооссэс воксё быдтӥзы, юнъёссэ гинэ кельтӥзы. Соин ик соослы азинскыны капчи: урожай но уногес басьто, йӧл но тросгес кыско, — вера Гурт удысъя но сиён-юонъя министерствоысь будосъёсъя но музъем кусыпъёсъя управлениен кивалтӥсь Николай Широбоков. — Но лябъёссэ хозяйствоосмес быдтӥм ке, гурт но кысоз. Та сярысь вунэтоно ӧвӧл.

Озьы Удмуртия Киров улос шоры учкылэмысь уг дугды. Но асьмелэн но кировъёслы вань мае возьматыны. Фермаосмылы ик кыӵе-кыӵе синмасько! Собере, пызь, сӥль, йӧл но солэсь лэсьтэм сиён берло дыре тросгес но тросгес Кирове кошке. Бускельёсын вуз карон 2012-тӥ арысен 31 процентлы йылӥз. Азьланяз ужан кусыпъёс сярысь вераськыны элькунысьтымы Гурт удысъя но сиён-юонъя министерствое алигес вуылӥзы Киров улосысь кивалтӥсьёс.

Елена Сараматова

Туспуктӥз А. Горбунов

Удмурт Дунне
By Удмурт Дунне 27 октября, 2015 12:44