Ёросъёсысь иворъёс: чибориё мучоло, тупатъян толэзь но секыт вторник

Удмурт Дунне
By Удмурт Дунне Октябрь 16, 2015 13:06

Глазов

Секыт вторник

Кылем арняысь вторник вунонтэм кылёз Глазов ёрос понна.

Та нуналэ ёросысь сюресъёс вылын 3 шуккиськон учырын 2 мурт быриз, 10 аресъем нылаш сӧсырмиз. Глазов городын, ульчаез выжыкуз, 76 аресъем кышномурт машина улэ шедиз. Нош 78 аресъем кышномуртэ Пӧчи Лудошур гурт вадесысен машина шуккиз. Арлыдо кышномуртлэн бордаз пиштӥсь арбериез вылымтэ, сюрес вамен потӥсез водитель синйылтымтэ. Инспекторъёс ало: город яке гурт сьӧрысь сюрес вылэ потыку, адямилэн бордаз одно ик луыны кулэ пиштӥсь лентаез. Сотэк 500 манет тыриськон тупатэмын. лентаез басьтыны луэ лавкаысь.

Балезино

Эмъяськон даур

Балезино ёросысь Голёгуртысь участковой больницалы туэ 100 ар тырмысал.

Та эмъяськон юрт интыяськемын вал Юнда но Голёгурт куспын, сое «калык больница» гинэ шуылӥзы. 1937-тӥ арозь отын эмъяськиллям быдэс ёросысь висисьёс. Нош аръёс ортчыса, больницаез но, гуртэз но быриз. Эмъяськон юрт сярысь тодэ ваёнъёс кылемын на Юндаысь музейын гинэ. Та музейлэн кивалтӥсез Ангелина Урасинова, Голёгуртысь эмъяськон юртлэн 100 ар тырмонэзлы сӥзьыса, нимысьтыз стенд дася. Отчы люказ на гуртысь арлыдоослэсь тодэ ваёнъёссэс.

Кез

Мӧзмонэз уг тодо

Туэез гужем Чепца муниципал кылдытэтэ пырись гуртъёсын улӥсь арлыдоос понна кемалы вунонтэм кылёз.

Чепца черкогуртысь арлыдоос шаермылэн тунсыко интыосыныз тодматскыны малпазы. Ветеранъёслэн огазеяськонэнызы кивалтӥсь Людмила Иванова бурдъямъя соос вуылӥзы Глазов ёросысь Иднакаре но Воткаысь П. Чайковскийлэн музей-юртаз. Тросэз песянай-песятайёс та дырозь шаерысьтымы музейёсы вуылымтэ на вылэм.

Дэбес

Бадӟым вуз карон

Дэбес черкогуртын сӥзьыллы быдэ ортче бадӟым вуз карон.

Туэ отчы пыриськизы 15-лэсь ятыр предприятиос. Куазь зол лымыяз ке но, басьяськыны лыктӥсьёсты со ӧз кышкаты. Тужгес трос вал чечы вузасьёс: Уйвай, Варни, Тыловай, Ӟаногурт но Котёшур гуртъёсысь. Пуэз вӧлӥсьёс но ас ужъёссэс калык азе поттӥллям. Нош тужгес кузь черод люкаськиз ю тысь но кеньыр вузасьёс доры. «Темп» фермер хозяйство, «Труженик» но Калинин нимо хозяйствоос ас будэтэм ю-няньзэс дунтэм дунын вузазы. Мукет ёросъёсысь лыктэмъёс но вал: кин нянь сукыриен, кин парсьпиен вузаськиз.

Шаркан

Армие — 20 кузя

Сӥзьыл призыв дыръя Шаркан ёросысь 20 мурт армие мыныны кулэ.

Та вакытэ армие басьто 1988-тӥ-1997-тӥ аръёсы вордскем пиосты. Соосты армие дэмен басьтыны кутскозы октябрь толэзь пумын. Пиослы сётӥське сиёнэн песьтэр но шуныт дӥсь. Кызьы ивортӥз Вотка городъя, Вотка но Шаркан ёросъёсъя военной комиссар Алексей Парифонов, пиосты нырысьсэ басьтозы воздушно-космической войскоосы. Удмуртиысь 2-3 муртэ гинэ кутозы ке но, пӧлазы Шаркан ёросысь пиос но шедьыны быгатозы. Озьы ик та сӥзьылэ пиосты келялозы спортъя яке наукая ротаосы. Вылӥ образование басьтэм пиосты но армие кутозы.

Вотка

Зарезе потозы

Воткаысь кадет корпусын дышетскись пиос Санкт-Петербурге вуылӥзы.

Кадетъёс Санкт-Петербурге кыкетӥзэ ветлӥзы ни. Шаермылэн палэназ потаны луонлык сётӥське устоосыз пӧлысь устоосызлы. Озьы 10-тӥ-11-тӥ классъёсысь «5»-лы дышетскись 18 пиос 12-тӥ-14-тӥ октябре Санкт-Петербургысь Н. Кузнецов адмираллэсь нимзэ нуллӥсь военно-морской институтэ вуылӥзы. Пиос понна пӧртэм экскурсиос радъямын вал, дышетскон судноен зарезе потазы. Удмурт кадет корпуслэн кивалтӥсез Татьяна Караваева верамъя, зарезь службаен тодматсконзы пиослы иназ мынэ. Кылсярысь, кылем арын вань выпускникъёс пӧлысь 90 процентэз дышетсконзэс азьланьтӥзы Россиысь военной вузъёсын.

Можга

Чибориё мучоло

Можга ёросысь Черёмушки гурт вадьсысь федерал сюрес вылын тол но гужем мучолоосын вузасько вал, ёрос администрация талы пум поныны малпаз.

Ёросысь кивалтӥсьёс уг вато, можгаосты тросэз тодо ни сюрес вылын вузаськись мучолоосъя. Россиысь машинаос сяна, доразы дугдылӥзы кунгож сьӧрысь «фураос» но. Но табере соос понна нимысьтыз базар кылдытыны малпало. инты понна 100 манет, пе, тыроно луоз. Вузаськисьёс талы пумит. Но мукет ласянь учконо ке, та сюрес Можга ёросысь тужгес кышкыт интыен лыдъямын, арлы быдэ шуккиськон учырын бырисьёс луо, соин но татын вузаськонэз алӥзы. Куронэз быдэсъясьтэмъёсты 5 сюрс манет штраф вите.

Юкаменск

Тупатъян толэзь

5-тӥ октябрьысен 5-тӥ ноябрёзь ёросысь гурт хозяйствоосын ялэмын техникаез толлы дасянъя толэзь.

Сӥзьыл бусы ужъёс йылпумъяськизы гинэ, гуртоос тулыс сярысь малпасько ни. Бусыын ужам техниказэс мисько, тупато. Кызьы ивортӥз ёрос администрациысь гурт хозяйствоя управлениысь валтӥсь инженер Виктор Ситников, корт вал но кузяз ветлэмез яратэ. Нимысьтыз саклык висъяло татын выль техникалы. Ёросын кылдытэмын нимысьтыз комиссия, толэзь куспын со ёросысь вань предприятиосысь гаражъёсты эскероз но дунъет сётоз.

Удмурт Дунне
By Удмурт Дунне Октябрь 16, 2015 13:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<