Ижын ортчиз «Огъя Россия» партилэн Удмурт ёзэзлэн 25-тӥ конференциез

Удмурт Дунне
By Удмурт Дунне 12 октября, 2015 10:23
конференция

Республикамыя оглом 147 депутат мандат вал, та пӧлысь 113-ез — «Огъя Россия» партилэн кандидатъёсыз киын.

Конференцилэн нырысетӥ люкетаз йылпумъянъёс лэсьтэмын 13-тӥ сентябре ортчем быръёнъёслы. Элькунысьтымы 5 город Думаосы выль депутатъёс быръемын. Калык властьлэн партиезлы оскемзэ вераз.

Республикамыя оглом 147 депутат мандат вал, та пӧлысь 113-ез — «Огъя Россия» партилэн кандидатъёсыз киын. Озьы Иж город Думаысь 42 депутат пӧлысь 34-ез «Огъя Россие» пыремын, Воткаын — 25 депутат пӧлысь 22-ез, Сарапулын — 28 пӧлысь 22-ез, Можгалан — 28 пӧлысь 18-эз, Глазовын 26 пӧлысь 19-эз.

— Ми — республикаен ӵош, асьмеос — ӵошен, — таӵе ӝутӥськем мылкыдын веранзэ кутскиз «Огъя Россия» партилэн Глазов ёзэзлэн секретарез Андрей Ушаков. — Бырйисьёс пӧлысь 57,7 процентэз оскемзэс веразы «Огъя Россилы», КПРФ понна — 28 процентэз.

Глазов город Думае 2010-тӥ арын быръёнъёс дыръя КПРФ ог 40 процент куара люказ вал, «Огъя Россия» — ог 33 процентсэ. Но табере югдур воштӥськиз.

— Таин ӵош ик ми валаськом: калык оскиз милемлы, осконзэ медаз ышты ни — та понна уката гижысь-пиньысь тыршоно луом, — азинтӥз веранзэ А. Ушаков. — Глазовын улӥсьёс оско «Огъя Россия» партилэн Удмурт ёзэзлэн секретарезлы, Удмуртилэн Тӧроезлы А. Соловьёвлы но. Городын 117 иськем сюресъёс, со пӧлысь 42 иськемез тупатъямез кулэ каро — Глазовын улӥсьёс оско, та ужпум быдэстэмын луоз шуыса. Городын ӟеч ужа «Огъя Россилэн» общественной приёмноез — та но шӧдӥськиз быръёнъёс вакытэ.

Вераськизы Ижысь Индустриальной ёросысь но Сарапул городысь ёзъёслэн секретарьёссы Л. Зайцева но А. Наумов. Кыксы но пусйизы: партилэн ёзчиосыз, бырйисьёслэсь куронъёссэс лыдэ басьтыса, ужаны дасесь!
Конференцилэн кыкетӥ люкетаз «Огъя Россия» партилэн Удмурт ёзэз ӵектӥз Иж город йырлы но Иж город Думалы тӧрое кандидатъёсты. Куара сётон лушкем ортчиз. Озьы нырысетӥ пуконын соос адӟо Юрий Тюринэз, «Ижсталь» заводысь валтӥсь энергетикез, кыкетӥ интыын — Олег Гаринэз, Иж город администрацилэн аппаратэныз кивалтӥсез.

Та кандидатураос понна дурбасьтыса, вераськиз Удмуртилэн Тӧроез Александр Соловьёв:

— Кыксэс но туж умой тодӥсько: оскымонэсь, нокыӵе ужлэсь уг кышкало, калыкез кылыны быгато. Юрий Тюрин 30 ар ужа ни «Ижстальын», огшоры электрикысь будӥз валтӥсь энергетикозь, город Думае депутатэ 4 пол бырйылэмын ни — иське, калык солы оске. Оскисько мон но.

«УД»

Туспуктэм: udmurt.er.ru

Удмурт Дунне
By Удмурт Дунне 12 октября, 2015 10:23