Элькунамы кылдозы дунын сюресъёс

Удмурт Дунне
By Удмурт Дунне 21 октября, 2015 12:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
2-16-1

Ижез Эгра каргуртэн герӟась автотрассаез ӝутон — таизлы кулэ луоз 41 миллиард манет.

Кӧня сюресъёс ӝутэмын-выльдэмын туэ, кыӵе ужъёс чакламын азьланезлы? Та сярысь ивортӥз элькунысьтымы транспортъя но сюрес хозяйствоя министр Виктор Вахромеев.

— Сюресъёсъя элькун фондын туэ ужъёслы висъяськиз 4 миллиард 828 миллион манет. Со чотын ӝутэмын я тупатъямын 646 иськем сюресъёс. Выльдэмын, кылсярысь, Ува каргуртысь Сьӧлта пала нуись сюрес — 5 иськемез, Уваысь Сюмсие кошкись сюрес — 2 интыын быдэн 7 иськемен но трос мукет. 881 миллион висъяськиз сюресъёсты-урамъёсты югдытонлы. Палэнэ ӧз кыле гурт сюресъёс но: туэ выльдӥськиз 110 иськемез. Со сяна, туэ 50 миллион манет висъяськиз сад-бакча массивъёсы нуись сюресъёсты тупатонлы — талы саклык висъяны куриз Удмурт Республикалэн Тӧроез Александр Соловьёв.

Но куд-ог чаклам ужъёсты лэсьтӥськисьёс йылозяз-пумозяз вуттыны ӧз пӧрмытэ. Кулэ луись документъёсты кема бичамен но Иж город администрацилэн азьвыл кивалтӥсьёсыз гызмыльтэмен, ӧз выльдӥськы Иж тымет вылысь Дерябин нимо проездысь выж — та ужез йылпумъяны чакламын вал туэ 1-тӥ сентябрёзь. Нялтас вераса, солэн оглюкетэз куашказ вал ини кылем арын апрель толэзе. Министр В. Вахромеев верамъя, та выж йылозяз-пумозяз вуттэмын луоз вуоно арын май толэзе гинэ. Та вакытэ лэсьтӥськисьёс отчы юбоос но корт конструкциос ӝуто, но таосты асфальтэн шобыртыны кулэ луоз на. Нош тазэ лэсьтыны луоз шуныт куазь дыръя гинэ. Но транспорт со вылтӥ ӝеганъёстэк ортчыны быгатоз ни: асфальт интые, огдырлы пуктылэмын луозы бетон плитаос. Зэм, таин сэрен лэсьтӥськон дуногес усёз. Выжез тупатон 114 миллион манет пала усе ке, ӝынызэ ас вылаз басьтэ Иж город, кылемзэ — элькун.

KAR_1970   фото Карипов Э

Кам шур вамен выж усьтӥськоз вуоно арын сентябрь толэзе.

Кам шур вамен выжез ӝутон чакламъя радъяське. Лэсьтӥськисьёс та вакытэ йылпумъяло шур вылэ корт конструкциосты ӝутонэз. Министр ивортэмъя, выж усьтӥськоз вуоно арын сентябрь толэзе. Та дано ужрадэ одно ик ӧтемын луоз Россилэн Президентэз Владимир Путин. Нунал куспын выж вылтӥ ортчыны быгатозы 15 сюрс пала машинаос — соослы котыр сюрес утчаса, паромен потаса курадӟонэз уз лу ни. Проектлэн дуныз — 15 миллиард манет: куиньмос люкетсэ ас вылаз басьтӥз кунмылэн бюджетэз, кылемзэ — ужбергатӥсьёс. Выжез пуктыны висъям уксёзэс берыктон вылысь инвесторъёс со вылтӥ ортчисьёслэсь дун курыны чаклало.

Кам шур вамен выж бере шаерамы пыӵатыны чакламын мукетсэ проектэз: Ижез Эгра каргуртэн герӟась автотрассаез ӝутон — таизлы кулэ луоз 41 миллиард манет. Со 89 иськем кыстӥськоз но, со вылтӥ, уксё тырыса гинэ, ортчыны луоз. Алиез сюрес, кудӥз герӟа шоркармес Эграен, исамын уз лу: проект куке-соку быдэсмиз ке но, калык бырйыны быгатоз, кудӥз вылтӥ ширтыны. Виктор Вахромеев ивортӥз: та проект борды басьтӥськыны мылкыд каро 2 огазеяськонъёс: Китайысь лэсьтӥськонъя предприятие но «Автодор» кун компания.

Элькунысьтымы транспортъя предприятиос Правительстволы вазиськизы, общественной транспортын ветлон дунэз 17 манетысен 20 манетозь ӝутыны курыса. Эстӥськон но воштос ёзъёс дуноямын, азьвыл басьтэм кредитъёссыя тыриськонъёссы но йылэмын — трос ыштонъёс адӟиськомы, пе. Та ужпумез эскеромы октябрь ӵоже, но решение кутоз элькунмылэн Тӧроез Александр Соловьёв, пусйиз В. Вахромеев.

Елена НИКИТИНА

Туспуктэмъёс А. Горбуновлэн но Э. Кариповлэн

Удмурт Дунне
By Удмурт Дунне 21 октября, 2015 12:20