Дэмен дасяськыса, вормыны капчигес. Малы могӟо ёросъёс?

Удмурт Дунне
By Удмурт Дунне 14 октября, 2015 13:59

элькуно«Мынам Удмуртие» телекомпания сюлмаськемъя ортчылӥсь «Элькуновидение» вожвылъяськонын куронъёс туэ чурытэсьгес каремын. Соин сэрен 20 куриськисьёс пӧлысь юнматэмын 14-ез гинэ.

Мар ласянь куронъёс чурытэсьгес луизы? Кырӟанлэн авторъёсыз но, кырӟась но одӥг ёросысь луыны кулэ. Со сяна, кырӟан та дырозь «Мынам Удмуртие» радиолэн эфираз чузъяськыны кулэ ӧвӧл. Тросэзлы та могӟет луиз. Со сяна, азьвыл аръёсы ёрос но ёрос центр понна нимаз кырӟасьёс пыриськизы ке, туэ сыӵе луонлык ӧй вал ни. Ёрослэсь данзэ одӥг адями уте.

Озьы Кияса ёрос, кылсярысь, туэ конкурсэ 2 кырӟасьсэ ыстэ вал. Огзылэн но кырӟанзы конкурслэн куронъёсызлы ӧз тупа — кырӟанлэн огез авторез Киясаысь ӧй вал. Нош выльзэ гожтыны киясаослэн луонлыксы ӧвӧл. Паймод, Эгра ёрослэн но кырӟанэз тупамтэ — нош кӧня аръёс ӵоже соос «Элькуновидениын» азьпала потылӥзы, тодамы ваём шансон кырӟась Денис Чирковез ик.

Сыӵе ик югдурен пумиськиз егит кырӟась Валерий Мадазимов. Со Ижкар понна кырӟаны малпа вал, но кырӟанэзлы Ижын улӥсь авторез ӧз шедьты. Пичи Пурга но Дэри ёросъёслэн нырысь ӵектэм кырӟанъёссы ӧз тупалэ — соос радиоын чузъясько вал ни, таосыз ӝогак гинэ мукет кырӟан шедьтӥзы.

— Мон «Элькуноведение» «Пырдэм яратон» кырӟанэным пыриськыны малпай вал. Но «Мынам Удмуртие» эфирын чузъяське ни шуыса, кырӟанме ӧз кутэ, — вера Дэри ёросысь кырӟась Лиана Корепанова. — Кулэ луиз чаляк гинэ выльзэ гожтыны. Таиз «Яратон» нимаське.

Лиана Корепанова азьвыл «Шунды» огазеяськонлэн «Куарагур» крезьгуро проектаз вормиз вал. «Элькуновидение» кадь бадӟым конкурсэ нырысьсэ пыриське, соин кӧня ке кышкытгес, шуэ. Вала: вормоз кужмоез, но аслыз но оске. Нош юрттӥськиз меда Дэриысь культурая, туризмъя но егитъёсын ужан политикая управление выль кырӟанзэ гожтыны? Лиана шуэ, ӧз!

— Тросэзлы кырӟасьёслы ёрос культурая юртъёссы конкурсэ дасяськыны уг юрттӥсько, — вера «Мынам Удмуртие» ТРК-ысь журналист Светлана Пикулева. — Сыӵе ёросъёсын, кытын рос-прос дасясько, кырњасьёслы трослы капчигес конкурсэ пыриськыны но вормыны. Шаркан ёросын тани арлы быдэ асьсэлэсь быръён люкетсэс радъяло — отын вормисе потэмъёс ёрослэсь данзэ «Элькуновидениын» утё. 2013-тӥ арын отысь Наталия Юферова но Владимир Иванов жюрилэн дунъямезъя нырысетӥ интые потӥзы, 2014-тӥ арын «Тулкым» ансамбль вормиз. Туэ «Забава» ансамбльысь воргоронъёс прослушивание дыръя ик куараосынызы паймытӥзы ни.

— Кызьы, конкурс ортчытытэк, «Элькуновидение» кырӟасьёсты лэзёд? Соос элькунын ёрослэсь данзэ утё ук, — вера Шаркан культурая юртын ужась Людмила Широбокова. — Зэмзэ ке, ёросамы ми «Элькуновидение» быръён концертэз нырысь ик калык понна лэсьтӥськом. Отчы пыриське ёросысьтымы котькуд муниципал кылдытэт. Вань кырӟасьёс авторской кырӟан быдэстыны уг быгато бере, туэ, кылсярысь, 5 коллективъёс но кырӟасьёс гинэ вожвылъяськизы. Быръем коллективлы юрттӥськом я кырӟан гожтыны, я костюм вурыны яке номер пуктыны.

кезысь пияш

Кез ёросысь Юрий Князев.

Ёросъёсы ыстэм положениосъя быръён этап ортчытыны косэмын ке но, вань культурая юртъёс соосты уг быдэсъяло. Кылсярысь, Кияса ёросын.

— Милям удмурт гуртъёсмы туж ик трос ӧвӧл. «Ёросовидение» выллем ортчытыны кутскид ке, 3-4 коллектив я кырӟась сяна уз вуы, — вера Кияса культурая юртысь чеберлыкъя кивалтӥсь Юрий Камашев. — Соин сэрен кырӟасьёсты ми асьмеос утчаськомы. Ёрос фестивальёсы пыриськись егитъёсты синйылтӥськомы но соослы вазиськиськомы. Туэ дасяны медӥськомы вал Нюнюк починкаысь Миша Егоровез. Кырӟанзэ дасям, но фонограмма гожтыса ӧм вуэ — уксёмы ӧвӧл.

Но киясаос оскыто: вуоно арозь кырӟан одно ик дась луоз. Куд-ог ёросъёс нош воксё но «Элькуновидение» пыриськоно шуыса уг малпало. 4 ар ӵоже одӥг пол но куаразэс ӧз потталэ Камбарка, Каракулино но Красногорск ёросъёс. Пусйыны кулэ, вожвылъяськонэ туэ нырысьсэ пыриське Сарапул ёрос. Вордӥськем палъёсызлэсь данзэ утёз 76 аресъем Анна Дмитриевна Девятова.

Туэ конкурслэн куронъёсыз чурытэсьгес луизы, нош луозы-а меда ӟечгес кырӟанъёс? Быръем кырӟанъёслэсь нимзэс лыдӟиськод ке, умоезлы оскон куашка — Вавож ёрослэн «Тӧдьы льӧмпуос», Пичи Пурга ёрослэн «Льӧмпу сяська», сарапулъёслэн «Чырткем-а, быратэ!», Ижысь «Задор мылкыд» ансамбль Ленин ёрослэсь гимнзэ быдэстоз. Зэмзэ ке, оло таӵе юан пуктыны ик кулэ ӧвӧл. Павел Поздеев продюсер верамъя, ёросъёс асьсэос ужпумъёсты валаны но эстрадазы понна кыл кутыны кулэ. Нош «Элькуновидение» соос понна данъяськымон ужрадлы но брендлы мед пӧрмоз.

Конкурслэн нырысетӥ этапез ортчоз 17-тӥ коньывуонэ «Аксион» культура юртын.

14 кырӟасьёс но ансамбльёс пӧлысь 12-ез гинэ потозы «Элькуноведение» конкурслэн финалаз, телеверсияз. Сое возьматозы 4-тӥ шуркынмонэ «Мынам Удмуртие» ТРК-ысь «Светӥ дорын куноын» передачаын. «Аксионын» кырӟасьёсты жюри дунъялоз ке, кыкетӥ люкетаз вормисьёсты, смс куара ысъяса, быръёзы асьсэос учкисъёс. Баллъёсты ватсаса, тодмо луоз тужгес устоез кырӟась. 12+

Мария Векшина

Удмурт Дунне
By Удмурт Дунне 14 октября, 2015 13:59