Дэбес ёросысь Удмурт Льӧм гуртысь ансамбль «Битва хоров» конкурсын 2-тӥ инты басьтӥз

Удмурт Дунне
By Удмурт Дунне 13 октября, 2015 13:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Толэзь ортчиз ни Москваын ортчем «Битва хоров» конкурс йылпумъяськем бере. Нош Дэбес ёросысь Удмурт Льӧм гуртысь «Льӧмпу сяська» ансамбльысь песянайёслэн али но вань вераськонъёссы Москвае вуылэмзы сярысь. Отын соос кыкетӥ инты басьтӥзы!

«Льӧмпу сяська» ансамбльысь песянайёс Москвае но, «Битва хоров» конкурсэ но нырысьсэ ӧз сюре. Песянайёслы кылем ар пумын кылдӥз вал Москваын Удмуртилэн арезлы сӥзем концертэ, Кремль двореце, вуылыны. Концерт бере холлын эктӥллям-кырӟаллям, отысен ик соослы синмаськем «Битва хоров» проектэз кылдытӥсь Ольга Миронова. Шуэм, тулыс, пе, сыӵе конкурс ортчоз, лыктэ.

— Нылкышноосмылэн мылкыдзы ӝутскиз ук! Со конкурсэ мыныны ми кытысь но отысь 50 сюрс манет люкамы — ёрос администрация, райпо юрттӥзы, — вера Людмила Гаврилова. — Соку Россиысь 13 коллективъёс пӧлын вормим! Озьы милемыз сӥзьыл конкурсазы но чортӥзы.

1

«Льӧмпу сяська» ансамбль Москваын.

Таяз радэ «Битва хоров» конкурс кужмогес радъямын вал. Конкурс кыстӥськиз 2 нунал. Москваын пумиськизы дуннеысь 15 коллективъёс, 11-ез соос пӧлысь Россиысь, 4-ез — кунгож сьӧрысь. Нырысетӥ нуналаз ансамбльёс асьсэ дасям номеръёссэс возьматӥзы. «Льӧмпу сяськаос» тодматӥзы «Кен пылатон» сям-йылолэн. Песянайёс сое 2 толэзь ӵоже дасязы. Кен луиз Мария Белослудцева, нош егит карт — Артемий Гаврилов. Пияш дуннеысь тодмо артистъёсын ӵош бӧрысь нимысьтыз кырӟаз но.

Удмурт Льӧм гуртысь кенакъёс москваосты зол паймытӥзы. Та сярысь Интернетын ивор но потӥз: «Удмуртиысь «Льӧмпу сяська» учкисьёсты зэмос театре вуттӥз кадь. Соос возьматӥзы калыксылэсь «Кен пылатон» сям-йылолзэ, сое, пе, ортчыто, сюан бере ар ортчыса. Турнан дыръя кенэз пылато — озьы сое бызем кышномуртъёс пӧлазы пырто. Песянайёс ваньзэ лулысь-сюлмысь возьматӥзы зэмос улонын кадь, нош учкисьёс ӧз жалялэ кичабонъёссэс, залын кема «браво!» кесяськизы».

Жюри 15 коллектив пӧлысь 10-сэ гинэ конкурслэн 2-тӥ люкетаз пыриськыны лэзиз. 8-эз ансамбльёс Россиысь, 2-ез — кунгож сьӧрысь.

2

«Кенез пылатон» сям йылолэз возьматон.

Таяз радэ Россиысь коллективъёс, 4 паръёслы люкиськыса, ог-огзылы пумит кырӟазы — быдэстӥзы асьсэ кылынызы вордскем шаер сярысь кырӟанъёссэс. «Льӧмпу сяськаос» быдэстӥзы Н. Постниковлэсь «Нёжало шаере» кырӟанзэ.

— Жеребьёвка дыръя конверт кыскыны потӥ но, пыдъёсы сыр куалекъяло, — вера Людмила Львовна. — Воронежысь ансамбль гинэ парлы медаз шедьы, ас поннам малпасько. Соослы соку ик келясалмы но залэ пуксьысалмы. Шедиз Белгородысь ансамбль. Ух! шумпотӥ. Белгородысь ансамблен кивалтӥсь ӟыгырскиз бордам. Соос но воронежъёслэсь кышкало вал.

Тани одӥг парысь одӥг ансамбль залэ пуксе, мукетыз… Людмила Львовна песянайёссэ лӧпкытъя: «Милемды татчы нокин сюлоен ӧз улля, асьмеос лыктӥм».

Ӝоген сцена вылэ кылизы 4 тужгес устоосыз ансамбльёс. Огез басьтоз Гран-при, мукетъёсыз — 1-тӥ, 2-тӥ, 3-тӥ интыос.

— Шуизы: 2-тӥ интыын — «Льӧмпу сяська» ансамбль. Сыӵе шумпотӥм! — шуэ Людмила Гаврилова. — Йырме вылэ ӝутыса, сценаетӥ кузьымлы вамыштӥ — ми Удмуртиысь ансамбль! Кузьымзэс — ноутбукез — киям басьтӥ но шумпотэменым интыям ик тэтчи.

DSC_0587

Конкурсэ пыриськиз Россиысь 15 коллектив но кунгож сьӧрысь 4 ансамбль.

Концерт йылпумъяськем бере «льӧмпу сяськаосты» ӟечкыланы трос адямиос вуылӥзы, тросэзлы возьматэм сям-йылол тунсыко потэм, учкисьёс песянайёслэсь пыр-поч юалляськизы.

— Вань коллективъёс туж золэсь вал, образцовоесь, калык ним нулло, ми гинэ самодеятельной, — вера Людмила Львовна.

Озьы Воронежысь «Донские зори» ансамбль Гран-при утӥз, 1-тӥ интые потӥз Курск улосвылысь «Напев» коллектив, 3-тӥе — Липецкысь «Собольские посиделки» ансамбль. Кунгожсьӧр ансамбльёс пӧлысь тужгес устоез луиз Сербиысь «Абрашевич» хор.

Кин соос, «Льӧмпу сяська» ансамбле ветлӥсьёс? Гуртысь огшоры калык. Кивалтӥсьсы — Людмила Львовна Гаврилова — клубын ужа. Надежда Александровна, Зинаида Валентиновна, Екатерина Вениаминовна но Эльфрида Егоровна Жуйковаос, Любовь Николаевна, Галина Меркурьевна, Нина Леонидовна Докучаеваос. Али соос пенсиын ни, корка котыразы бергало, внукъёсынызы пуко. Сьӧразы ветлӥзы Дэбесысь арганчиоссы но — Николай Кардапольцев, Алексей Тронин но Сергей Богданов.

DSC_0580

Удмурт гуртысь песянайёслы 2-тӥ инты басьтэмзы понна ноутбук кузьмазы.

Али песянайёслэн нош ик огыр-бугыр нуналъёссы кутскизы. Ӵапак та арняе Дэбесын концерт ортчоз, отчы песянайёс асьсэ номеръёссэс дасяло. «Битва хоров» конкурсэ но матысь дыре дасяськоно луоз ни, соосты вормисьёсты сямен отчы вуоно арлы но чортӥзы.

— Туннэ ми вормим, ӵуказе келялом, — верало песянайёс. — Йырмес вылӥе ӝутыса, ум ветлӥське. Ми шаермылэсь данзэ быдэс Россиын утим, асьмелэсь улонмес узырмытӥм. Со нунал котьку сюлэмъёсамы кылёз.

Мария Векшина

Туспуктӥз В. Нуриахметов

Удмурт Дунне
By Удмурт Дунне 13 октября, 2015 13:01