ЧОПъёслэсь лыдзэс кулэстозы

Удмурт Дунне
By Удмурт Дунне 19 октября, 2015 08:55
025890,охрана

ЧОП-ёс шаерамы кылдӥзы ог 20 ар талэсь азьло.

Шаерамы ужало нимаз адямиослэн 200 пала охранной предприятиоссы (ЧОП). Матысь аръёсы та лыдпус 50 котыр кылёз.

Та дырлы республикаямы ог 4 сюрс адями охранник луыса тырше. Трос соос бадӟым вуз карон, дышетон интыосын, пӧртэм офисъёсын но складъёсын. Ужзы адӟем карымон уг пӧрмы. Югдурез утёнъя министерствоысь координацияя кенешлэн ёзчиез, утёнэн вырись «Рунд» огазеяськонлэн кивалтӥсез Виталий Башкиров вера:

— ЧОП-ёс шаерамы кылдӥзы ог 20 ар талэсь азьло. Отчы пыриськылӥзы Югдурез утёнъя министерствоын тыршем воргоронъёс. Соин ужзылэн ӟечлыкез вылӥын вал. Кадръёс ласянь но шугъяськонъёс ӧз кылдылэ. Туннэ охранае лыкто законъёсты тодӥсьтэм, йыртэмасез ӝог кырмыны быгатӥсьтэм пиосмуртъёс, арлыдоос.

Башкировлэн мылкыдэныз соглаш луиз министерствоысь ож тӥрлыклы лицензия сётонъя центрлэн кивалтӥсез Николай Мерзляков но. Ӝот-ӝот шуиз: та удысэ лыктӥсьёсты сӥс пыр поттоно. Угось 34 огазеяськонысь пиосмуртъёс пистолетэн ужаны ветло.

Калык малпа, охранниклэн ужез — пукон вылын телевизор учкон. Дорамы пиосмурт ужаны лыктӥз. Нырысетӥ нуналаз ик милемыз онгромытӥз: валес, пе, ӧвӧл-а — кытын мон шутэтском?! Яке мукетыз учыр. Алигес гинэ та удысэ вуэм пиосмурт магазинын пересь воргоронэз наручникен кульчоям. Нокыӵе мугъёстэк!

Со дыре ик охранникъёс лэсьтоно ужзэс уг лэсьто. Ижысь огаз магазинысь 1 миллион 500 манет тыр ваньбур капыртэмын. Йыртэмасьёсты ӝог кырмыны луэ вал — магазинын сигнализация ужаны кутскиз. Но охранаысь воргоронъёс… азьтэмскизы — магазинэ ӧз потэ.

— Вань та учыръёсъя уголовной ужъёс ӝутэмын, — валэктӥз Николай Мерзляков. — Азьланяз пичи ЧОП-ёсты огазеяломы. Мугорез кыдатонъя, калыкен кусып тупатонъя, законъёсты тодонъя дышетонъёс радъяломы. Уждунэн но лӧпкытъяно вылэм. Туннэ соос уксё ӧжыт басьто — 1 час тыршемзы понна тыриське ог 100 манет.

Ярам коть, утиськисьёс пӧлын вань йӧно воргоронъёс но. Таосыз, ас ужзэс быдэстэм сяна, юрттӥсько югдурез утисьёслы. Соослэн тыршеменызы туэ кырмемын 72 йыртэмась, 384 мурт административной кыл кутон улэ кыскемын.

Ольга Корепанова

Туспуктӥз А. Горбунов

Удмурт Дунне
By Удмурт Дунне 19 октября, 2015 08:55