АБДРА-фест: кинлы кулэ удмуртъёслэн чувашъёсын кусыпъёссы?

Удмурт Дунне
By Удмурт Дунне Октябрь 15, 2015 11:58

артара17-тӥ коньывуонэ Чебоксарыын аспӧртэм ужрад ортчоз. Нимыз «APTӐRA-fest: удмурт но чуваш андеграундлэн фестивалез». Малы ӵапак андеграунд но кызьы со герӟаськемын калык культураен?

Вожъяськон

Чувашие мон нырысьсэ туэ гужем вуылӥ. Отын чуваш кылэз дышетонъя «Хавал» лагерь ортчиз. Белоруссиысь, Каталониысь, Швейцариысь, Япониысь но Удмуртиысь вуэмъёс мыло-кыдо тодматскизы чуваш культураен, кырӟанъёсын, историен, литератураен. Пӧламы уно вал палэнын улӥсь чувашъёс но. Мускоысь Александр Савельев Мария кышноеныз, Татьяна Прокопьева, Франциын улӥсь Ольга Николаева — та адямиос сюлмасько чуваш кыллэн ӵуказе нуналыз, туала дуннеын интыез понна.

— Тӥ, удмуртъёс, шудоесь! — мылкыдзэ аратэ Александр Савельев, дышетскон бере ӝыт вераськонъёс пуромыку. — Тӥляд вань Silent Woo Goore группады! Тӥляд вань Garuda! Удмурт фолк-металл! Милям, чуваш эстрада сяна, номырмы но ӧвӧл.

— Нош тӥляд сыӵе рос-прос дышето чуваш кылэз. Милям мылкыд карисьёслы удмурт лагерьмы ӧвӧл… — пумитаз вожъяськыса верасько солы.

— Нош кыӵе тунсыко тӥляд интернет кылбуретты, шуом, Богдан Анфиногенов, — ватса Маша. — Мода удысты но сокем азинскемын ни. Полина Кубистады, арт-пространствоосты вань.
— Удмуртъёс, Россиысь фин-угор калыкъёсты ӵошатоно ке, тужгес туалаесь, — йылпумъя Савельев.

Тае кылыса, малпаськонэ уси. Шумпотӥ. Зэмзэ ук! Асьмелэн удмуртлыкмы ялан выль кабъёс, выль амалъёс утча. Оло, Ижкарлэн туала шӧмыз шӧдӥське-а? Кармы электронной крезьгурлэн шоркарез вал, озьы ик со Интернетэз тужгес но трос уже кутӥсь городъёс пӧлы пыре, ресторан сервисмы но зол. Оло, Эстонилэсь, Финляндилэсь, Венгрилэсь адӟем кариськом… Таиз ласянь тюрк калыкъёс мукетэсь — соослэн Европаын «фортъёссы» ӧвӧл. Нош пичи Чувашиез тюрк дуннее пырто ке но, со ваменъяське…

1980-тӥ аръёсы удмуртъёслэн но чувашъёслэн кусыпъёссы кужмоязы. Чуваш кылэ трос берыкъязы удмурт литератураез, асьме доры вуылӥзы дано муртъёс: Мишши Юхма, Атнер Хузангай, Раиса Сарпи, Светлана Азамат, Роза Петрова. Берло та кусыпъёс, огъя берыктон уж сямен ик, тэшказы. Огпол Роза Петрова кӧтӝожен телефон пыр вераз: удмуртъёс монэ вунэтӥзы… Чувашъёс удмуртъёс борды кыстӥсько, нош ми ялан чигнаськом кадь, эстонъёс пала учкиськом.

DSC0038-1024x680

Dukes выллем проектъёс городысь учкисьлы удмуртсэ матэгес карон понна кылдытэмын.

Абдран

Чувашъёслэн туала культураез азинтыны дышетскемзы потэ. Та мылкыдлы луыса ик «АБДРА-фест» вордӥськиз. Чувашъёс витё выль омыр. Мае чуваш егитъёслы возьматыны быгатӥськом? «Чудья промолэсь» ужъёссэ: Чудья Женилэсь но Чималилэсь арт-фильмъёссэс — этнофутуристъёслэн симпозиумъёсазы ветлыса, соос куаш-куаш видео ӧре зымизы; Dukes фолк-группаез — таяз учыре Жени кубызэн шудэ, нош Таня Тихонова но Лилия Леонтьева вашкала кырӟанъёсты кырӟало. Вераны кулэ: Dukes выллем проектъёс городысь учкисьлы удмуртсэ матэгес карон понна кылдытэмын. Мукет ласянь, соос удмурт адямиез удмурт сямъёс пала берен берыкто. Калык гуръёсты егитъёс быдэсто ке, со котьку синмаськымон.

Мукетыз проект — «Мурӝол Underground». Нимаз «андеграунд» кылыз вань ке но, со массовой культуралэн пытьыез луэ. Озьы ке но со кылдэмын вал удмурт эстрадалэн андеграундэз сямен. Удмурт крезьгуре хип-хоп, рэп амалъёсты пыртэ Богдан Анфиногенов. Со ик капчиен сура удмурт улон реалиосты Западысь вуэмъёсыныз. Богдан лэсьтӥз зэмос популярной продукт, угось али туала дуннеын мукет югдур: андеграундэ кылемын вашкала культура. Пусйыны кулэ мукет рэперез но — Алексей Пикулев — MORT — гожъя мур пуштросэн пыӵам текстъёс. Таӵеез эстрадаын уг пумиськы.

Чувашъёс ӝожтӥсько, соослэн кырӟанъёссы ваньзы одӥг ӧръя кошко но, совето вакытысь попса пӧрме шуыса. Та выллемгес ик югдурзы поръёслэн но, бигеръёслэн но. Удмуртъёс висъясько. Удмуртъёс туалаез сьӧры уйиськонзэс олокызьы но нимало ни: постколониализм, постэтнофутуризм. Западысь кыскемзэ удмуртэз вылэ мерттэм сямен.

— Со постколониализм шуонды, мон малпасько, весяклы пыӵам удмурт кӧтӝожен герӟаськемын, — шуак вера Александр Савельев.

— Кыӵе кӧтӝож? — юасько мон.

— Вуоноезлы уд оскиське. Тӥ асьтэды колонизировать карыны лэзиды ни.

— Нош тӥ?

— Нош ми оскиськом на Чуваш кунлы.

Сыӵеесь чувашъёс. Соос азинто кылзэс, нюръясько правооссы понна. Нош ми туала культура сьӧры ватскиськом. Абдрамон.

Дарали Лели

Туспуктӥз А. Горбунов

Удмурт Дунне
By Удмурт Дунне Октябрь 15, 2015 11:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<