Вуоно арын феврале Ижын ортчоз вань удмуртъёслэн Бадӟым ӧтчамзы

Удмурт Дунне
By Удмурт Дунне 27 октября, 2015 13:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
И. Семенов

И. Семёнов

Вуоно арын феврале Ижын ортчоз вань удмуртъёслэн Бадӟым ӧтчамзы. Кыӵе мылкыдъёсыз туннэ «Удмурт Кенеш» огазеяськонлэн тӧроезлэн Игорь Семёновлэн?

— Игорь Николаевич, удмурт калык берло дыре кызьы учке «Удмурт Кенеш» шоры? Оске-а солы?

— Ятырез оскыса учке — та зол шӧдӥське. Адямиос доре вуо, телефон пыр вазисько, ульчаысен дугдыто. Котькудӥзлэн аслаз висёнэз, куронэз, валанэз. Унозэ сюлмаськытэ анай кылмы. Угось удмурт калыклэн вань азинлыкез кыл бордысь потэ. Со ӧз луы ке, калык но быроз. Лыдъян-чотан возьматэ: арысь аре лыдмы ичигес кыле. Та тужгес зол сюлмаськытэ дышетӥсьёсты, анай-атайёсты. Зэм, куд-огез кыдёке уг учкы. Ас азяз ужпум пуктэ: нылпиме будэто, сое дышетыны тыршо, ассэ улонын мед шедьтоз. Озьы удмурт кылэз палэнтэ, сотэк но улыны луоз, шуэ. Угось удмуртлык но удмуртъёс дорозь вуттӥськыны котькудӥзлы дыр кулэ. Ӵемысь 30 аресозь егитъёс удмурт луэмзылэсь кужымзэ но пуштроссэ уг валало на. Ӧд валэкты ке, 40 аресаз но кудӥз уз вала. Соин ик соосын пумиськылӥсько. Туж шумпотӥсько, туннэ «удмурт кенешчиослэн» радазы 20 процентэз егит азьветлӥсьёс шуыса.
Жаляса верано, 1960-тӥ-1970-тӥ аръёсы шаерысьтымы школаосын удмурт кылэз дышетэмысь тыпак дугдӥзы. Нокин ӧз малпаськы, кытчы со вуттоз. Нош лыдмы шуак усиз. Али сыӵегес ик югдуре вуиськомы. Кылсярысь, Вотка ёросын одӥг школаын но анай кылъя урокъёс уг нуисько. Эшшо ке удмурт ёросъёсысь школаосты Прокуратура удмурт кылъя урокъёслэсь планзэс одно ӟуче берыктыны куре. Кияса, Шаркан, Якшур-Бӧдья ёросъёс та пумысен туж ӝожомо. Сыӵе мылкыдын удмурт кылъя дышетӥсьёс уроксэс ортчытъямысь уз дугдэ-а?

Югдурез тупатон вылысь кӧнятӥ арзэ ни удмурт кылэз ӝутон бордын ужаськомы! 2001-тӥ арын шаерысьтымы кун кылъёс сярысь закон кутэмын. Со кылдэм дырысен отчы нокыӵе воштонъёс, ватсанъёс пыртэмын ӧвӧл. Соя школаос асьсэос чаклало: кылэз дышетоно я ӧвӧл. Та шӧлкын ик куд-огез анай кыллэсь палэнско. Кун Кенеш оскытэ, законэ воштонъёсты пыртон борды басьтӥськоз шуыса. Но возьмаса пукид ке, дыр эшшо ортчоз. Соин ик законэ воштонъёс пыртон ласянь асьмеос ӵектонъёсмес дасям. Али сое пӧртэм комиссиос эскеро. Депутатъёс дурбасьтӥзы ке, вань школаосын удмурт кылэз дышетыны луоз. Но дышетыны мылкыд карисьёс уногес мед луозы шуыса, гочатыны но кулэ. Соин ик ӵектӥмы: ужазы 2 кылэз кутӥсьёслы, уждун бордазы ватсаса, 15 процентозь уксё мед тыриськоз.

— Удмуртлыкез но коньдонэн мертаны дыр вуэмын ни шат?

— Дышетыны мылкыд карисьтэмзэ уксё но уз гочаты. Удмурт курсъёсы, уксё сӥзьыса, кыско шат? Уг. Туннэ Ижын гинэ 10 группа усьтэмын, отчы котькудаз шорлыдын 17-20 мурт ветлэ.

Но кылэз гинэ дышетоно ӧвӧл, сям-йылолъёсмес но утёно. Туж шумпотӥсько, шаерамы Гербер шулдыръяськонэз ортчытъяны бюджетысь уксё висъяны кутскизы. Туэ Кезын праздник радъяны нырысьсэ 2 миллион манет сётэмын. Вуоно арын но уксё вуоз. Азьвыл коньдон утчан ёросъёс вылэ усе вал.

Культурамес азинтыны тыршо ёросъёсысь ёзъёсмы но. Зэм, ваньзы Алнаш, Шаркан, Пичи Пурга кадь ужзэс бергатыны уг пӧрмыто на. Но ваньзылы тау кареме потэ. «Кенешчиос» сюлэм куремзыя воксё дунтэк тыршо. Сюлмасько, бызьыло но пӧрмыто.

Валче тыршиськом Нациосын ужан политикая министерствоен. Дэмен ортчытъяськом пӧртэм ужрадъёс. Эшъяськыса-тупаса улонэз радъян сярысь вераськиськом. Соин ик ёросъёсын Эшъяськон юртъёс усьтӥсько.

9-23-1

Берло дыре егитъёс пӧлын удмуртлык пала кыстӥськисьёс йылӥзы.

— Берло вакытэ «Удмурт Кенеш» выль ӧре выжиз — проектъёсын ужаны ӧдъяз…

— Калыклы эшшо но матэгес луыны, адямиослы юрттыны тыршоно. Гуртъёсысь шуге-леке вуэм семьяослэсь мылкыдзэс ӝутоно. Мылкыдзы луиз ке, нылпиоссылы но тросгес саклык висъялозы. Таин валче проектъёс гожтӥмы, грант утӥмы. Со проектъёс коньдон кыскыны луонлык сёто. Уксё ӧвӧл ке, ятырзэ уд лэсьты уго. Вавож, Грак ёросъёсын ужамы ни. Берлояз югдурзы тужгес секыт вал. Ёросысь 1 сюрс 17 семья пӧлысь 15-ез шуг-секытэ усемын. Таосын психологъёс, юристъёс ужазы. Тужгес куашкам мылкыдо 25 пиналэз Иж котырысь «Ласточка» лагере вайылӥмы. Таосын нимысьтыз специалистъёс ужазы. Смена йылпумъяськыку, тусъёссы ик пальышаны ӧдъязы. Дышетӥсьёс но пусйизы, пиналъёс школае выльмыса вуизы шуыса. Ёросъёсысь семьяослы юрттонэз азьланьтомы мукет ёросъёсын но.

— Игорь Николаевич, кыӵе мылкыдъёсын пумитаськоды удмуртъёслэсь Бадӟым ӧтчамзэс?

— Дыр туж ӝог ортче, али гинэ быръёнъёс вал кадь… Пумозяз вуттэме потэ удмурт кылэз дышетонъя ужпумез. Сюлэм вылын из кадь улэ со. Паймоно: удмуртъёсты фин-угор дуннеын кылзо, мылкыдзэс санэ басьто. Та туж зол шӧдӥське, Фин-угор калыкъёслэн ассоциацизылэн кенешаз пыриськыку но. Вуоно гужем Финляндиын ортчоно фин-угор калыкъёслэн конгрессазы но асьмелы одно ик кыл сётэмын луоз. Туж потэ, удмуртъёсты Удмурт шаерын но тросгес мед кылозы шуыса. Туннэ Удмуртилэн Тӧроез Александр Соловьёв сюлмаськонъёсмес вала. Бадӟым ӧтчаме но пыриськыны мылкыдзэ вераз.
Ӧтчаме котькуд 1 сюрс 400 удмуртлэсь 1 делегат пыриськоз. Со 370 делегат. Ужрад мыноз 2 нунал ӵоже — удмуртлыкмес азинтонъя ужпумъёс трос. Азьвыл 1 нуналскын ӧтчам ортчылӥз, но сыӵе дыръя уж комъяське, ӝожомисьёс но трос кылё. Быръёнъёс но усьтыр-табыр ортчылӥзы. Рос-прос кариськыны дыр вуэмын. Рос-прос верам кыл но кыдёкегес чузъяське.

Елена Сараматова

Туспуктӥз Александр Горбунов

Удмурт Дунне
By Удмурт Дунне 27 октября, 2015 13:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<