Кыло-буро пӧраськись, кылбур лыдӟись пиос но шудӥсь эмъясь

Удмурт Дунне
By Удмурт Дунне Октябрь 27, 2015 12:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Красногорск

Шудон юрттэ эмъяськыны

Ёрос больницалэн кузьымез понна шашкиен шудонъя ӵошатскон ортчиз.

Тӧдьы халатэн ужасьёс оскыто: шудон но эмъяськыны юрттэ. Арлы быдэ радъяськись вожвылъяськон понна кыл кутэ ёрос больницалэн валтӥсь врачез Татьяна Сушенцева. Ӵошатсконын вормисе потӥсьёсты кузьымен пусъё. Медаль басьтонэ 57 мурт пыриськиз. Пиналъёс пӧлын вормисе потӥзы Алла Волкова, Анна Виноградова, Мария Захарова, Даниил Варфаламеев, Евгений Ромашин, Владимир Виноградов. Бадӟымъёс пӧлын — Галина Захарова но Анатолий Семёнов.

Юкаменск

Кыло-буро пӧраськись

Ёросысь нылпи садъёсын вань пӧрасьёс пӧлысь шараязы тужгес устозэ.

Ӵошатсконэ пыриськон понна нылпи садын ужасьёслы трос пӧсяно луиз. Жюриын пукисьёс, пӧраськыны быгатэмзэс эскерем сяна, ужазы кутӥськись сиён-юонлэн ӟечлыкез сярысь но юалляськизы. Жюриын пукисьёсты паймытӥз Юкаменск черкогуртысь «Ладушки-1» нылпи садысь пӧраськись Людмила Лазаревич. Ас ужзэ ӟеч быдэстэм сяна, кыланы-бураны но усточи вылэм.

 

Глазов

60 пӧлысь 3-ез — милям

Кун Кенешысь Егитъёслэн парламентазы Глазов ёросысь 3 мурт сюриз.

Парламентэ 60 мурт юнматэмын, со пӧлысь 30-эз — ёрос но город парламентарийёс ӵектэмъя. Глазов ёросысь егитъёс отчы ӵектӥзы азьветлӥсьсэс Алексей Мелехинэз. Со сяна, Глазов ёрослэсь данзэ утизы но шаерысьтымы усточи егитъёс пӧлы шедизы на В. Короленко нимо пединститутын дышетскисьёс Алина Шубина но Руслан Юркин.

Эгра

Кылбур лыдӟо пиос

Ёросын арлы быдэ кылбур лыдӟонъя вожвылъяськон ортче.

«Удмурт Кенеш» огазеяськонлэн Эгра ёросысь ёзчиосыз ӵектэмъя октябрь пумын кылбур лыдӟонъя толэзь кутскиз. Туэ со сӥземын Эгра каргуртлэн 400 ар тырмонэзлы. Вожвылъяськонлэн нырысетӥ люкетэз гурт клубъёсын я школаосын радъяське. Кылсярысь, Чумой гуртын вормисе потӥзы Кирилл Гаврилов, Данил Поторочин но Дмитрий Перевощиков. Та пиос гуртсылэсь данзэ утёзы ёрос вожвылъяськонын.

 

Можга

Медальёс омыртӥзы

Казань городын ортчиз Приволжск федерал округысь пинал спортсменъёс пӧлын кобудо амалъя нюръяськон.

Та вожвылъяськонэ пыриськизы Нижний Новгородысь, Самараысь, Татарстанысь, Оренбургысь 300 спортсменъёс. Удмуртилэсь данзэ утизы Можга городысь но ёросысь 16 пиналъёс. Спортсменъёс, нимаз но командаен вормонъёссэс лыдъяса, 8 зарни, 4 азвесь но 11 туй медальёс утӥзы.

 

Алнаш

Красновлэн кузьымез

Ёросын ортчиз Россиысь спортъя мастерлэн А. Красновлэн кузьымез понна пыдын бызьылонъя ӵошатскон.

Алнаш ёросысь сяна, вожвылъяськонэ пыриськизы Грак, Вавож, Кизнер, Можга ёросъёсысь спортэз яратӥсьёс. Куазь зориз ке но, нокинэ со ӧз кышкаты, малпам ужрад капчи мылкыдын ортчиз. Тужгес покчи спортсменъёс 1 иськеме бызизы, вормисе потӥзы Алнашысь Арсений Колпаков но Вавожысь Анастасия Кулябина. 50 ареслэсь бадӟымъёс пӧлын висъяськизы Алнашысь Раиса Алашеева но Кизнерысь Владимир Лескин. Тужгес арлыдоез спортсмен вал Можгаысь Борис Горошников, 64 аресаз но со 2-тӥ инты басьтӥз. Вормисе потэмъёслы Александр Краснов кузьымъёс сётӥз.

 

Кизнер

Армие — ӟеч мылкыдын

Кылем арня шорын ёросын призывной комиссилэн нырысетӥ кенешез ортчиз.

Ужрад ортчиз Кизнер ёрослэн йырыз Александр Плотников кичӧлтэмъя. Туэ ар пумозь та ёросысь 34 пиос армие мыныны кулэ. Ӵапак сомында егитъёс люкаськизы комиссилэн нырысетӥ кенешоназ. Жаляса верано, 34 мурт пӧлысь та дырлы 17-ез гинэ армие мыныны дась. Тазалыксы лябен, вузъёсын но ссузъёсын дышетскеменызы валче 7 муртлы отсрочка сётэмын. Кизнер ёросысь пиосын нырысетӥез команда 19-тӥ октябре Иже келямын. Шумпотоно, тросэзлэн егитъёслэн вылӥ дышетскемзы. Ёросысь призывной комиссилэн вуоно кенешез 30-тӥ октябре луоз.

Ува

Шулдыр эшъяськон

Каргуртысь шутэтсконъя «Восток» центрын дуннеысь калык шудонъёслы сӥзем ужрад ортчиз.

Калык кусыпъёсты юнматон вылысь егитъёс пӧлын «Тупаса улон — тынад кияд» проектлы кутскон сётӥзы. Нырысетӥ ужрад дыръя дуннеысь калык шудонъёсын тодматскизы. Ужрадэз радъяны юрттӥськизы ёросысь азьветлӥсь егитъёс но шаерысьтымы «Вместе» огазеяськонэ пыриськисьёс. Бадӟым шудонэ вуылӥзы Ижысь, Сьӧлта, Ува ёросъёсысь егитъёс, ваньмыз-ӧвӧлэз 80 мурт.

 

Удмурт Дунне
By Удмурт Дунне Октябрь 27, 2015 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<