«Удмурт дунне» потаз Дэри ёросысь Подшивал гуртэ

Удмурт Дунне
By Удмурт Дунне Октябрь 21, 2015 13:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
DSC_1046

Пошивалэ редакциын ужасьёс потазы вал 2011-тӥ арын.

Десантмы азьланьтӥське. «Удмурт дуннеос» арнялы быдэ гуртысь лыдӟисьёсын пумиськыло. Та рад кыдёке ветлытэк, артысь Подшивалэ потӥм. Татысь «Дэлет» ансамбль кылем гужем юбилеймес пусъёнэ пыриськиз, соослэн кивалтӥсьсы Нина Петрова ик юрттӥськиз пумиськонэз радъяны.

Подшивал милемлы котыр ласянь матын: городысь ӝыны час сяна мынонэз ӧвӧл, собере, татын улэ милям огез ӟеч эшмы Галина Захарова. Со кема аръёс ӵоже Захар Гали нимын «Шӧкыче» гожъя маскара учыръёс. Сомында юмореска писательёс но уг гожъяло, дыр, нош гуртысь огшоры нылкышнолэн олокытысь тырме серем пырыез. Галина Максимовна понна газет — матысь эш но, визь-нод сётӥсь но. Куддыр, пе, пукисько, юанэлы валэктон утчаса, ки улам ӵап газет сюре, учкисько но — валэктон отын. Тани туэ малпаськыса улӥсько: ку ай та яблокез октоно, вазьгес ке ишкид — ӝог сисьмоз, берлолы ке кельтӥд — кынманы шедёз… «Берекетэз» усьтӥсько но — пырак мынам юанэлы валэктэмын: 27-тӥ сентябрёзь, пе, утялтоно. Озьы ик кари.

Мукетыз лыдӟисьмы Елена Колесникова вордӥськемын Кизнер ёросын. 18 аресказ Подшивалэ со вуэ «Удмурт дуннелы» луыса. Татчыозь вераме потыса улӥ, учыр ӧз кылдылы, шуэ егит нылкышно. «Тодматскон сэрегысьтыды» ялонэз шедьтыса, Подшивалысь пияшлы гожтэт ыстӥ. Кусыпмы тупаз, Юраен огазеяським, табере тани нылмы 6-тӥ классын дышетске ни. Со дырысен газетэз яратонэ уката юнгес луиз, арлы быдэ гожтӥськисько.

Зэм, сыӵе яратӥсьёс трос ӧвӧл. Ӵапак та выллем пумиськонэ ик редакциын ужасьёс потазы вал 2011-тӥ арын. Соку Подшивал поселениын (отчы пыре 4 удмурт гурт) «Удмурт дуннелы» гожтӥське вылэм 61 мурт. Калыкен пумиськылӥм, сюлмысь вераським, малпам, уката уно эш шедьтӥм, но …янгышаськеммы. Туннэ Подшивал почта ёз верамъя, татын газет басьтэ 19 мурт гинэ. Со но — арлыдоосгес. (Ми лушкемен ас поннамы малпаськомы ни: оло, быдэс газетэз пенсионеръёслы гинэ сӥзёно?). Тани та рад но пумиськонэ потэм калык пӧлысь гожтӥськисез 4 мурт гинэ вылэм, соос ик асьсэлэн пичи пенсиысьтызы коньдон шедьтӥзы вуоно арлы гожтӥськыны. Кылдэ (выжыдэ, культурадэ) гажан пересьмыса вуэ вылэм, сюлэмез вандӥз одӥгез апай. Егит дыръя, пе, соин йырин ӧй вал: ялан ужано, бызьылоно…

DSC_1054

«Дэлет» ансамбльлы вить ар гинэ ай, но соос быгатӥзы ни асьсэды возьматыны.

Пусйыны кулэ: Подшивалын анай кылэз дышето, покчи классъёсысен кутскыса. Но куспазы пиналъёс ӟуч кылын верасько. Со понна туж шумпоттӥз Маша Девятова: со, историен тунсыкъяськем сяна, удмурт кылын но туж чылкыт вераське. Малпаськом, со одно эшъяськоз егитъёслы потӥсь «Дарт» приложениенымы. Таиз сярысь школае ветлӥсьёс нырысьсэ кылӥзы, угось библиотекае удмурт газет уг вуы! Возьыт вераны, но отчы аслэсьтыз лыдӟем удмурт журналъёссэ, салазкие тырыса, нуллэ Елизавета Иосифовна Мушегова. Со пинал дырысеныз лыдӟиське, пенсизэ уг жаля. Тани та рад но со газетлы быдэс арлы гожтӥськиз. Абдрамон та улон-вылон — калыкез дышетонысь, культураысь чиновникъёс сыӵе кулэлыкез уг адӟо, коньдон уг висъяло, нош огшоры арлыдо кышномурт ӝабырскыса ик улэ анай кылыз борды.

Шумпотто «дэлетъёс» но. Ансамбльлы вить ар гинэ ай, но соос быгатӥзы ни асьсэды возьматыны. Быдэсъяло кызьы ке вашкала калык кырӟанъёсты, озьы ик туала гожтэмъёссэ но. Со гинэ ма — юбилеязы соос дасясько рэп быдэстыны. Ми кылӥм ни — туж тунсыко. Та арлыдоос ноку уз пересьме.

Зинаида Кириллова

Удмурт Дунне
By Удмурт Дунне Октябрь 21, 2015 13:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<