Удмурт кыллы кырӟан пыр дышето

Удмурт Дунне
By Удмурт Дунне Октябрь 15, 2015 12:12
Р. Кузнецова удмурт кыллы дышетэ кырӟанъёс пыр.

Р. Кузнецова удмурт кыллы дышетэ кырӟанъёс пыр.

Педагогика наукаосъя кандидат Роза Кузнецова Дышетӥсьёслэсь тодон-валанзэс будэтонъя институтын ужа. Нылпиосты анай кыллы дышетон пумысен пӧртэм амалъёс утча.

— Роза Аркадьевна, тӥ вань улондэс дышетонэн герӟады. Кызьы та удысэ вуиды?

— Нотаосты валаны, кырӟанлэсь тональностьсэ вошъяны, трос куараен кырӟаны дышетӥзы, Можга педучилищеын дышетскыкум. Со быгатонъёсме азьланьтыны шуд усиз, Удмурт кун университетэ пыреме бере «Чипчирган» ансамбльын кырӟаса. Ансамблен кивалтӥсьмы Р. Анкудинова удмурт калык кырӟанъёсты яратон мылкыд пыӵатӥз.

4-тӥ курсын дышетскыкум, аслам вордскем гуртам — Кияса ёросысь Уддядиын (Карамас-Пельга) — практикае ортчиз, отын пиналъёсты хорен кырӟатӥмы. 5-тӥ курсын Татарстанысь Бавлы ёросысь Урсы школаын ансамбль кылдытӥ. Макем ӝог но юн герӟа кырӟан нылпиосты! Университетэз йылпумъяса, Урсы школае ик дышетыны мынӥ. Ансамблен ужме азьланьтӥ.

Пиналъёслэсь мӧйыос но адӟем каризы. Соосын но ансамбль кылдытӥмы. Нырысь-валысь туж секыт вал кырӟасьёсты люканы: семьязэс утялтоно, пудо-животсэс сюдоно, кудӥз сцена вылэ потаны керпотылӥз. Но басьтӥськемзы бере клубысь бертыны ӧз ӵыдылэ ни пересьёсы. Бавлы ёросысь смотръёсын ансамбльёсы лауреатъёс луылӥзы.

8 ар ортчыса, мон Иже берытски, 10 ар ужай аслам дышетскем факультетам. Со сяна, анай кыллы дышетыны ӧтчазы Ижысь 56 но 19 номеро школаосы, 5 номеро нылпи садэ. Диссертациме городын улӥсь покчиосты удмурт кыллы дышетон ужпумен герӟай бере, пыраклы ужаны кошки нылпи садэ. Пиналъёс туж ярато удмурт сямен кырӟаны, шудыны, эктыны.

Ӵем дыръя озьы луэ: кырӟанлэн пуштросэз кельше, кылъёсыз пиналъёсты дышетыны тупало, нош гурзэ уг тодӥськы. Соку, ӝогак баянме кутыса, нотаосъя гурзэ утчасько. Нош удмурт эктон гурез шудыны кутскисько ке, кыӵе шумпотыса экто покчиос удмурт сямен! Туж тау карисько педучилищеын крезьгуро инструментэн шудыны дышетэмзы понна.

Удмурт кылэз тодӥсьтэм студентъёсын но ужаны туж юртто кырӟанъёс. Соослэн текстъёссы вылын грамматикаез эскериськом, собере гурзэс дышетӥськом. Грамматика студентъёслэн йыразы кыле, нош кырӟан сюлмазы пыӵа.
— Тӥ нылпи садъёсысь кивалтӥсьёс, воспитательёс понна экспериментальной площадкаос кылдытӥды.

— Удмурт кылэз каръёсысь но каргуртъёсысь нылпи садъёсы пыӵатон понна сюлмаськонэ вуттӥз экспериментальной площадкаос усьтонэ.

2012-тӥ арлэн пумаз Дышетӥсьёслэсь тодон-валанзэс будэтонъя институтын приказ потӥз: Балезиноысь «Сказка», Вавожысь «Журавушка», Ижысь К. Герд нимо гимназиысь, Эграысь 8 номеро нылпи садъёсын, озьы ик Ува ёросысь Узей-Тукляын, Дэри ёросысь Ягулын покчиосты эксперимент амалэн удмурт кыллы дышетозы. 2013-тӥ арлэн кутсконаз ми пыримы «Финляндия-Россия» обществолэн «Покчиосты визьноданын фин-угор кылъёс но культураос» проектаз. Саесъёсмес пужалляса ик, кутскимы вылӥ верам нылпи садъёсын удмурт кыллы дышетыны. Нылпи садъёслэн кивалтӥсьёссы, воспитательёс дышетскизы удмурт кыллы дышетонъя курсъёсам. Табере соос пӧртэм дидактической материалъёс дасяло, тунсыко амалъёсты ужазы куто.

Шаерамы семинаръёс радъяськомы. Экспериментэ пырись нылпи сад люка матысь ёросъёсысь садын ужасьёсты. Удмурт кылын пӧртэм ужрадъёс возьматэ. Собере люкаськемъёс адӟемзы но кылэмзы сярысь малпанъёссэс верало.

Кылем арын гужем «Леленчи» лагерь-семинар ортчытӥмы. Отчы люкамы экспериментэ пырись садъёсысь быдэн 5 нылпиез но соослэсь анайёссэс. Пиналъёс понна со лагерь вал, нош анайёс понна — семинар.
Вуылӥмы коми (Сыктывкаре) но мордва (Саранске) нылпи садъёсы. Учкимы, кызьы соос дышето покчиоссэс анай кылзылы.

Кылем арлэн пумаз семинар ортчиз Удмурт шаерын. Люкаськизы быдэс фин-угор дуннеысь адямиос. Москваысь лектор Н. Родина милемыз дышетӥз выль кун стандартъёсъя ужаны, Комиысь но Карелиысь эшъёсмы тодматӥзы ас ужан амалъёсынызы. Удмуртиысь визьнодасьёс нылпи садъёсазы возьматӥзы тунсыко ужаны быгатэмзэс.

Кылсярысь, Кузебай Герд нимо гимназиысь визьнодасьёс но покчиос «Шудон корка» амалэн ортчись ужрадэнызы тодматӥзы. Мукет шаеръёсын таӵе амалэз уг куто на. «Шудон корка» нылпи садэз анай-атайёсын но социумен герӟа, малы ке шуоно пиналъёс анай-атайёсынызы ӵош шудо, нимысьтыз ӧтем тунсыко адямиосын тодматско.

Туэ эксперимент амалэн ужась вань визьнодасьёсме семинаре люкалляй. Фильм лэсьтыса, «ЭтноУдмуртия» конкурсэ пыриськомы. Отӥяз ини, ас ужам опытэнымы шаерысьтымы вань визьнодасьёсты тодматон понна покчиослы ужан тетрадьёс дасяло.

Эксперимент амалэн ужанмы йылпумъяськыса, медаз быры покчиосты удмурт кыллы дышетон. Кутскем ужмы котькуд нылпи садэ мед пыӵалоз. Семьяосазы но анай кылын вераськизы ке, макем бадӟым узырлык но шумпотон со будӥсь пиналлы! Сое пинал валалоз, оло, быдэ вуэмез бере гинэ но мумы-бубыезлы, дышетӥсьёсызлы тау кароз ас кӧкыяз будэмез понна.

Любовь Тихонова

Удмурт Дунне
By Удмурт Дунне Октябрь 15, 2015 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<