Ӧсъёссэ вӧлъяз Инвестициосъя калыккуспо форум

Удмурт Дунне
By Удмурт Дунне Октябрь 21, 2015 09:47
фото Карипов Э KAR_0030

Инвестициосъя форумын пќртэм пумо огкылъёс гожтэмын.

Туэ со ортчиз 2 бадӟым ужрадъёсты — «Бизнес-мост в Удмуртии» но «Неделя инвестора» — огазеям улсын.

Форуме пыриськизы Россиысь пӧртэм улосъёсысь, кунгож сьӧрысь куноос, министерствоосысь но ведомствоосысь кивалтӥсьёс, ужбергатӥсьёс.

Инвестициосты кысконлы туала экономикаын тужгес бадӟым саклык висъяське. Ог 3 ар талэсь азьло Россилэн Президентэз Владимир Путин улосъёс азе курон пуктӥз: инвестициосты кысконъя программа кылдытоно но сое быдэстон борды басьтӥськоно. Удмурт шаер понна таиз уж выль ӧй вал ни, шуыны луоз: угось палэнысь юрттэтэз утчанлы-кысконлы шаерамы кемалась бадӟым саклык висъяське. Озьы берло 5 ар куспын элькунамы вуттэм инвестициослэн быдӟалазы 350 миллиард манетлэсь ортчиз, нош туэ ар пумозь кыскемын луоз ог 90 миллиард манет. Инвестициослэн йылэмзыя Приволжск федерал округысь улосъёс пӧлын Удмурт шаер 4-тӥ интыын. Ужбергатонлы кун ласянь юрттэт сётонъя Удмуртия Россиысь улосъёс пӧлын 23-тӥ интыын.

Шаерамы синмаськымон ужа кылем арын кылдытэм Инвестициосъя агентство. Та ёзлэн но Экономикая министерстволэн кичӧлтэмзыя кусып тупатэмын ни Россиысь пӧртэм улосъёсысь, озьы ик кунгож сьӧрысь инвесторъёсын.

Инвестициосъя калыккуспо форумез усьтон улсын Ижысь Эшъяськон юртлэн бадӟым залаз уно калык люкаськиз. Удмурт Республикалэн Тӧроез Александр Соловьёв вазиськиз:

— Россилэн экономикаезлы азинскыны та вакытэ секыт, ыштонъёсы вуттӥзы странамылы пумит кутэм санкциос. Но ӵапак таӵе югдурын луонлык усьтӥське асьме производствоез азинтыны, калыклэсь улонзэ ӝутонъя выль амалъёс утчаны. Инвестициосты кыскон ласянь Удмурт шаер ушъямон тырше. Властьлэн быдэсъясь ёзъёсыз азьын курон пуктэмын: инвестициосъя программазэс кылдытоно, пыӵатоно. Озьы котькуд удысэ палэнысь юрттэтэз кыскыны луоз. Элькун бюджетын дефицит йылэ — та учырын инвестициослэн кулэлыксы эшшо тросгес луэ. Тужгес но — социальной удысын. Кылсярысь, туж ӟеч проект — «Кам ярдур». Сое пыӵатон улсын Сарапул городысь синпелетъёс тупатъямын луозы, отчы араз 350 сюрс туристъёс вуылыны быгатозы, городын улӥсьёслы ужан интыос кылдозы. Яке басьтом Воткаын усьтыны чаклам нылпи садэз — со ӝутӥськоз инвесторлэн уксёез чотын: элькунлэн кисыез но шыръяськоз, нылпи садэ черод но кулэсмоз, ужан интыос но усьтӥськозы. Огъя вераса, таӵе пайдаё проектъёс шаерамы ичи ӧвӧл — элькунысьтымы Инвестициосъя кун агентство та ласянь бадӟым уж нуэ. Экономикаын югдур тупатскоз ай шуыса возьманэз ӧвӧл, али ик басьтӥськоно уж борды, — шуиз Александр Соловьёв.

Инвестициосъя калыккуспо форум ужзэ йылпумъя туннэ. Со радъяськиз пӧртэм площадкаосын, отын ӝутэмын пӧртэм ужпумъёс: бизнеслы кун ласянь юрттон, инвесторъёслы кельшымон условиос кылдытон, выль проектъёсын тодматскон но трос мукет. Россиысь улосъёс пӧлысь форумлэн ужаз тужгес но мыло-кыдо пыриськиз Киров улос — солэн губернаторез Никита Белых пумиськылӥз Удмурт Элькунлэн Тӧроеныз Александр Соловьёвен. Соос пыриськизы «Киров улос но Удмурт Республика: ог-огмы пумитэ вамыш» адӟытонэ, чаклазы, кыӵе удысъёсъя ог-огенымы кусып тупатыны луоз на. Нялтас вераса, Киров улосэн вуз карон берло 4 ар ӵоже йылӥз 31 процентлы.

Елена Тугашова

Удмурт Дунне
By Удмурт Дунне Октябрь 21, 2015 09:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<