Журналистъёс пӧлын быръёзы Эрик Батуев нимо премилэн лауреатъёсыз

Удмурт гожъяськонлэсь аспӧртэмлыкъёссэ лыдэ басьтыса но удмурт кылэз но культураез азинтон вылысь 2011-тӥ арысен та премиез сётъяны кутскемын удмурт калыклэсь историзэ, культуразэ, сям-йылолъёссэ, туала вакытысь ужпумъёсты быгатыса возьматӥсь журналистъёслы. Вожвылъяськонэ пыриськыны быгато удмурт кылын но, ӟуч кылын но гожъяськисьёс.

Премиез басьтонлы кандидатъёслэсь ужъёссэс витё 2015-тӥ арын 15-тӥ ноябрёзь «Удмурт Кенеш» ассоциациын, адресэз: Ижкар, Октябрьлы 50 ар площадь, 15 номеро юрт, 213 яке 215 номеро кабинетъёс. Жингыртыны луоз 8(3412)68-53-23 яке 8(3412) 68-83-08 телефон номеръёсъя. Озьы ик кутыны луоз udmkenesh@gossovet.udm.ru электрон адресэз.

Публикациослэн, радио-, телепередачаослэн лыдзы 5-лэсь трос луыны кулэ ӧвӧл. Со сяна, вакчияк ивортоно журналистлэн кытын, кӧня ужамез сярысь. Кулэ луоз на ходатайство, тазэ сётыны быгатозы газет-журналъёслэн редакциоссы, телерадиокомпаниос, творческой союзъёс, «Удмурт Кенеш» огазеяськонлэн ёзъёсыз.

Премилэн фондэзлэн быдӟалаез — 20 сюрс манет.

Эрик Батуевлэн (Валерий Николаевич Батуев) нырысетӥ ужъёсыз печатласькыны кутскизы элькунамы потӥсь газет-журналъёсын, данакез соос сӥземын вал анай кылмес яратонлы, дунъянлы. МГУ-ысь журналистикая факультетэз но аспирантураез йылпумъяса, со кӧня ке ар ужаз «Московский комсомолец» газетын, ужъёсыз печатласькизы мукет изданиосын но. Одӥг пол гинэ ӧй вал Чечняын, Курдистанын, Афганистанын, Косовоын — пӧсь интыосысь репортажъёс вайылӥз. Пӧртэм выжыосысь калыкъёсты ӧтьылӥз эшъяськыса, ог-огзэс валаса, улыны. 24 аресаз сое кутӥзы Россиысь Писательёслэн огазеяськоназы. Жаляса верано, Эрик Батуев пӧламы ӧвӧл ни 2002-тӥ арысен. Улонэз куспетӥ луыку, солы 33 арес но ӧй вал на. Но нимыз ноку ӵушиськонтэм.

«УД»