Зарни сюанъёс, Дауръем бабуш но 4 питрано кузьым… Ёросъёсысь иворъёс

Удмурт Дунне
By Удмурт Дунне Сентябрь 24, 2015 12:39

Яр

Зарни сӥзьыл, зарни сюанъёс

Яр черкогуртысь культурая юртын сӥлы каризы 50 но 55 ар ӵош улэм кузпалъёсты.

Ёросын сокем кема ӵош улӥсь семьяос трос ӧвӧл. Алигес сӥлы каризы Ярысь Вершининъёсты, Биграгуртысь Вершининъёсты, Возьпиысь Сунгуровъёсты но Мосейгуртысь Главатскихъёсты. Культурая юртын ужасьёс та семьяос понна аспӧртэмлыко ужрад дасяллям. Та нуналэ кузпалъёс выльысь егитомизы кадь.

Глазов

Выль памятник

Глазовысь Революция но Энгельс ульчаослэн вожвылазы усьтӥськиз авариослэсь но катастрофаослэсь бервылъёссэс утялтӥсьёслы сӥзем памятник — та ужрад ортчиз Глазов городлэсь нуналзэ пусъён улсын.

Чернобыльын луэм шудтэм учырлэсь бервылъёссэ утялтонэ, асьсэды жалятэк, пыриськизы Глазовысь 600 адямиос. Жаляса верано, тросэз улонысь кошкизы ни, кылемын на 271-ез.
Синпелетэз усьтонэ пыриськизы Удмуртилэн Тӧроез А. Соловьёв, Кун Кенешлэн Тӧроез В. Невоструев.

Юкаменск

Клубъёсын жингыр вазёз

Ёросысь культурая центръёсын ужасьёс гужем шутэтскемзы бере выльысь концертъёс возьматъяны кутскозы.

Кызьы ивортэ Юкаменскысь культурая юртысь методической отделэн кивалтӥсь Елена Поздеева, ӝыны ар куспын ёросын радъямын вал 974 ужрад. Гужем вакытэ гурт клубъёсын чус улӥз ке, матысь дыре нош ик жин! вазьыны кутскоз. Удмурт культуралы сӥзем «Шулдыр ӝыт» нуналъёс ортчытыны медо Пискор гуртын, нош Юкаменск клубын возьматыны дасясько «Бабий бунт» спектаклез. Клубъёсын ужаны кутскись егит специалистъёс но калыкез выль ужъёсынызы шумпоттозы.

Сьӧлта

Улонзэ уретӥз урмон

Сьӧлта ёросысь Выльгуртысь одӥгаз хозяйствоын малпамтэ шорысь пунызы кулӥз.

Пунылэсь шӧйзэ Уваысь пудо эмъянъя лабораторие нуизы. Эскерон возьматӥз: пуны черламын вылэм урмон висёнэн. Ветеринарияя станциын ужасьёс ӝегатскытэк Выльгуртэ потӥзы, дезинфекция ортчытӥзы. Урмон учыр Сьӧлта ёросын берлозэ пусъемын вал 2 ар талэсь азьло. Азьланяз выль учыръёс медаз пумиське шуыса, гуртысь вань пуныослы но коӵышъёслы вакцина пуктылӥзы, нош артысь гуртъёсын улӥсьёсты котыр ласянь сак кариськыны куризы, листовкаос но памяткаос люкылӥзы.

Камбарка

Тыл кысӥзы, знамя басьтӥзы

Кылем суббота нуналэ Камбаркаысь «Центральный» стадионын 200-лэсь ятыр пиналъёс, знамя басьтыса, шудӥзы.

Городысь пиналъёс понна тунсыко ужрад дасяллям тылпу кысонъя 23-тӥ частьын ужасьёс. Сӥземын со Россиысь МЧС-лэн 25 ар тырмонэзлы. Нырысь ик возьматэмын вал тылпу кысон удысын кутӥськись выль техника но туспуктэмъёсын адӟытон. Пиналъёслы луонлык сётэмын вал ваньзэ сое ас киосынызы кутылыны, нош тужгес дӥсьтӥсьёсыз тылпу кысонъя ӵошатсконэ пыриськизы. Отӥяз пиналъёс, командаослы люкиськыса, «Шулдыр стартъёсы» пыриськизы но, знамя басьтыса, шудӥзы.

Ува

4 питрано кузьым

Ува каргуртысь ужбергатӥсь Руфина Кустарникова ёрос больницалы «скорой» кузьмаз.

Нылкышнолэн 4 питрано кузьым сётыны мугез вал. Шуге-леке шедем пизэ «скороен» шоркаре нуон учыр кылдэм. Но ёрос больницаысь машинаослы оскон пичи: укыр вужесь ини, кин тодэ, сюрес вылын тӥяськозы но висисез больницае уз вуттэ. Мукетъёсызлэн та выллем сюлмаськонъёссы медаз луэ шуыса, Р. Кустарникова больницалы выль машина басьтыны уксё висъяз.

Вазенгес Руфина Кустарникова кузпалэныз калыклы бадӟым кузьым лэсьтӥзы вал ини: соослэн сюлмаськемзыя каргуртын часовня ӝутӥськиз.

Можга

Выль нянь

14-тӥ сентябре Можга ёрос йырлэн Аркадий Вершининлэн ужан нуналэз, выль пыжем нянез сиыса, кутскиз.

Кытын кызьы, нош Можга ёросысь бусыын ужасьёс ю-нянь октон-калтонзэс 14-тӥ сентябре йылпумъязы. Та нуналэз кызьы ке пусъён вылысь гуртоос туэ бичам ю тысьлэсь нянь пыжизы. Можгаос таяз аре котькуд гектарысь 21,2 центнер нянь люканы быгатӥзы. Мукетъёсын ӵошатоно ке, со ушъямон лыдпус.

Красногорск

Дауръем бабуш

Красногорск черкогуртын улӥсь Надежда Филимоновна Буркова толэзь кутсконын 100 арес тырмонзэ пусйиз.

Надежда Филимоновна Дёбы гуртын улэмын, «Качкашурский» совхозын тыршемын. Собере нылпиосызлы матэгес кариськыны малпаз. Озьы 20 ар пала ёрос центрын улэ. Туж гажа чылкытлыкез, юрт котырын ужаны кынарыз уг тырмы ни ке но, корка пушкысь тузонэз соку ик синйылтэ.

Кызьы ивортӥз Красногорск ёросысь калыклы улон-вылонын юрттэт сётонъя центрен кивалтӥсь Елена Самоделкина, котырес лыдпуссэс пусйись песянай-песятайёсты ваньзэс ӟечкылало. Октябрь толэзе 90 арессэ 2 мурт пусъёз, ноябре — 3 мурт, нош декабре 90 но 95 арессэс пусйыны дасяськисьёс вань. Улонын пӧртэм шуг-секытэз адӟем арлыдоослы шуныт кыллэсь дуноез номыр ӧвӧл, шуэ Е. Самоделкина.

«УД»

Удмурт Дунне
By Удмурт Дунне Сентябрь 24, 2015 12:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<