Выль куара поттон, яке ёросъёслэн выль сюлмаськонзы? «Элькуноведение» сярысь

Удмурт Дунне
By Удмурт Дунне Сентябрь 9, 2015 14:09
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

17-тӥ коньывуонэ Ижысь «Аксион» культурая юртын 4-тӥзэ ортчоз кырӟасьёс куспын радъяськылӥсь «Элькуновидение» конкурс. Та вожвылъяськонлы луыса кылдо выль кырӟанъёс но выль кырӟасьёс.

«Элькуновидение» вожвылъяськон «Евровидение» выллем ортче. «Евровидение» быдэс дуннеысь кырӟасьёс пырисько ке, «Элькуновидениын» асьсэ ёроссылэсь данзэ утё шаерысьтымы кырӟасьёс. Ӵапак та конкурс возьматэ, кызьы азинске шаерамы крезьгуро культура.

Кылем арын «Элькуновидение» ортчем бере пӧртэм мылкыдъёс чузъяськизы. Тани одӥгез соос пӧлысь: кырӟанъёс кулэ малпаськытыны, бӧрӟытыны, серекъятыны — оглом, соослэн кыӵе ке пуштроссы луыны кулэ. Конкурсэ пыриськисьёс кулэ та вожвылъяськонэ ӟечгес дасяськыны. Соос асьсэ ёроссылэсь туала лулчеберетсэ возьмато ук. Зэм, та выллем мылкыд кылдэ, сцена вылэ потэ ке ёрос ансамбль но «Вордӥськем палъёсы…» выллем кырӟан быдэстэ ке. Таӵеез «Элькуновидениын» ӵемысь луылэ. Но та вожвылъяськон ас азяз пуктэ ужпум азинтыны туала кырӟан культураез. Иське, куд-ог ёросъёсын эстрадамы кылем дауре кылемын?

тулкым

Кылем арын «Элькуновидениын» вормем Шаркан ёросысь «Тулкым» ансамбль ачиз концертъёс радъяса ветлэ.

— Ёросъёс асьсэос быръё, кинэ лэзьыны конкурсэ. Нош кызьы ортче быръён, таиз котькуд ёрослэн аслаз ужез, — вера «Мынам Удмуртие» ТРК-ысь анай кылын передачаос понна кыл кутӥсь С. Касаткин. — Та конкурсэ дасяськонлы бадӟымгес саклык висъяно. Но вераны луоз, арысь аре «Элькуновидениын» чузъяськись кырӟанъёслэн ӟечлыксы будэ.

«Евровиденилы» Россия пыр-поч дасяське: тодмо кырӟасьёс пӧлысь тужгес устозэ быръё, кырӟасьлы дэрем вуро усто дизайнеръёс, аранжировка лэсьто усто крезьгурчиос, номерез пукто дуно режиссёръёс… Нош милям кызьы? Тани ӵуказе луоз ни «Элькуновидение». Кин мыноз? Ёрос культурая юртын «Веттаськись тулкым» ансамбль вань ай. Кырӟалозы «Данъяськисько тонэн, вордскем гуртэ» кырӟанэз. Дэремъёс? Клублэн сандыказ юнме тузонӟыса кыллё костюмъёс. Крезьгур? Клубын ужась крезьгурчи гожтоз — уй кузь на. Ум вераське, вань ёросъёсын таӵе суред шуыса. Умой, кин вала, «Элькуновидение» вуэм кырӟась аслаз ёросэзлэсь ымнырзэ возьматэ шуыса. Та ёросъёс радъяло кырӟасьёс куспын «Ёросовидение» вожвылъяськон. Отысь ик вормисьёс мыно элькун вожвылъяськонэ но. Шумпотымон, вожвылъяськонэ пыриськон понна юромо кырӟан гожто на ке. Кылсярысь, озьы кылем арын кариз Пичи Пурга ёросысь «Ялыке» ансамбль. Со бордын ик вожвылъяськонлэн ужпумез но — удмурт крезьгурчиослэсь, кылбурчиослэсь, кырӟасьёслэсь ужзэс мытон.

«Элькуновидение», зэм но, туж трос аспӧртэмлыко кырӟасьёсты калыке поттэ. Кылсярысь, та вожвылъяськон бере тодмо луиз Дэри ёросысь этно-фолк амалэн кырӟась «Гаруда» группа. Берлогес но со пӧртэм удмурт концертъёсы мыло-кыдо пыриськылӥз, выль кырӟанъёс пӧрмытылӥз. Но берло дыре со но уг адӟылӥськы ни — усточиос гуртын уло бере, кулэ юртъерез утялтыны, пудо сюдыны — творчестволы дыр ӧжыт кыле. Со бордын гинэ меда ужпум?

— Шаерамы туж ӧжыт усто продюсеръёс, — вера «Юмшан» промо-группалэн кивалтӥсез, «Элькуновидениез» радъясь П. Поздеев. — Тани Эгра ёросысь Денис Чирковез адӟизы но ас киязы басьтӥзы «Эктоникаысь» продюсеръёс. Нош тросэзлы кырӟасьёслы асьсэ кужмынызы концертъёссэс радъяны, кырӟан гожъяны кулэ луэ. Кызьы, кылсярысь, каре кылем арын «Элькуновидениын» вормем Шаркан ёросысь «Тулкым» ансамбль.

элькунов

3 ар ӵоже конкурсэ воксё но ӧз пыриськылэ 4 ёросъёс. Со Камбарка, Каракулино, Сарапул но Красногорск ёросъёс.

Зэм но, «Элькуновидение» бере тросэз кырӟасьёс кутскем ужзэс азьланьтыны кулэ кадь — соослэн кырӟанъёссы «Мынам Удмуртие» радиолэн тулкымъёсаз но чузъяськыны кутско. Но, жаляса верано, ваньзы Шаркан ёросысь «Тулкым» кадь уг ӝуатско — кызьы потӥзы шуак, озьы ик чалмо. Малы озьы пӧрме? Оло, ёросъёсын ӟеч кырӟан гожтэмзы уг луы?
Кызьы вера «Мынам Удмуртие» ТРК-лэн удмурт ёзэныз кивалтӥсь С. Касаткин, ёросъёсын али кырӟан гожтыны луонлыкъёссы трос. Ёрос культурая юртъёсын вань кулэ аппаратуразы, крезьгур удысын ужась адямиоссы.

Тани валтӥсь концерт ортче — жюриос тужгес усто кырӟасьёсты пусъё. Телевизор пыр возьмато тужгес усто кырӟасьёсты — учкисьёс СМС пыр асьсэ куараоссэс сёто. Кин ворме? Валамон ни, Алнаш ёросысь учкисьёс асьсэ куаразэс сётозы асьсэ ёросысь кырӟась понна. Озьыен, кылдэ юан: тужгес ик усто кырӟан вожвылъяськонын ворме яке тужгес эшлыко ёрос?

— Валамон, дунъяны котыр ласянь шонер уг луы — татын патриотизм шуонэз лыдэ басьтоно. Озьы ке но Алнаш ёрос, кылсярысь, жюриослэсь ӧжыт балл басьтӥз ке, солы туж зол тыршыны кулэ луоз, учкисьёс со понна трос куараоссэс мед сётозы шуыса, — вера П. Поздеев.

Арысь аре «Элькуновидение» конкурсэ тросгес ёросъёс пырисько. Кылем арын соос 18 вал. Но 3 ар ӵоже воксё но ӧз пыриськылэ 4 ёросъёс. Со Камбарка, Каракулино, Сарапул но Красногорск ёросъёс. Оскиськом, туэ соос но куаразэс поттозы шуыса. Куриськонъёс кутӥськозы 30-тӥ куарусёнозь radio@mуudm.ru электрон адресъя.

Мария Векшина

Туспуктэмъёс: vk.com

Удмурт Дунне
By Удмурт Дунне Сентябрь 9, 2015 14:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<