«Удмурт Кенеш» огазеяськонлэн исполкомез ортчиз

Удмурт Дунне
By Удмурт Дунне 16 сентября, 2015 08:21

Отын бадӟым ужпумъёс эскеремын вал. Кенешон 2 час ӵоже кыстӥськиз ке но, мӧзмыны маза ӧй вал.

Нырысь ик кыл сётэмын вал филология наукаосъя тодосчилы, ас вакытаз «Удмурт Кенешлэн» вице-президентэз луыса ужам муртлы Галина Шушаковалы. Солэн кивалтэмез улсын кыкетӥ арзэ ни улонэ пыӵа гуртысь шуге-леке шедем семьяослы юрттонъя «Тангыра» проект. Нырысь со Вавож ёросын радъяськиз, собере — Гракын. Пусйыны кулэ, проект ӟечен пусъемын Москваын, сое пыӵатон понна коньдон висъяськиз Россия федерацилэн бюджетысьтыз, ортчытэмын нимысьтыз конференциос, улонэ пыӵазы удмурт семьяез но пиналэз утёнъя зэмос ужъёс.

— Семьяосын ужан — «Удмурт Кенешлэн» одӥгез бадӟым ӧрез, — шуэ Галина Шушакова. — гуртоос ӵемысь асьсэ сюлмаськонъёссы пӧлы выемын луо, туж шугъясько визь-кенеш басьтыны, куро психологъёсты, логопедъёсты, православной священникъёсты. Анай-атайёслэн но нылпиослэн кусыпъёссы сӧриськемын. Ёросъёсын та проектъя ужаку, шӧдӥськиз: атайёс коньдон поттон понна арняосын-арняосын палэнын ужано луо, уг адӟыло кышнооссэс, нылпиоссэс. Тӥяськем кусыпъёсты кузьымъёсын но коньдонэн уд ни тупаты.

«Тангыра» проектъя Грак ёросысь «секыт» нылпиос люкамын вал. «Удмурт Кенеш» юн курон пуктӥз: пӧлысьтызы 70 процентэз одно ик удмуртъёс мед луозы. Та нылпиос санаторийын шутэтскизы, киное, цирке, зоопарке ветлӥзы, «Удмурт Кенешлэн» кивалтӥсеныз Игорь Семёновен пумиськылӥзы. Озьы нылпиос выльысь вордӥськизы кадь, соослэн пеймыт улоназы югыт тылсиос пиштыны ӧдъязы.

ук

— Мон тау шуысал «Тангыра» проектэз пыӵатӥсьёслы, — шуиз «Удмурт Кенешлэн» кивалтӥсезлэн воштӥсез Татьяна Ишматова. — Мон адӟи со нылпиосты: синъёссы шумпотонэн пачылало вал! Соос таш-таш удмурт кылын верасько. Туала вакытэ огшоры адямиос нылпиоссэс санаторийёсы келяны уг быгато, семья понна со туж дуно усе. Нош татын нокытчы потамтэ, семьяосазы шуге-леке шедем нылпиос понна сыӵе шуд усиз! Шоразы синвуаськытэк учкыны ӧй быгаты.

«Тангыра» проект одӥг-кык арлы гинэ чакламын ӧвӧл. «Удмурт Кенеш» бордын ужалоз шуге-леке шедем удмурт семьяослы юрттонъя центр. Солы шуыса, проектъя нимысьтыз оборудование но басьтэмын ни. «Удмурт Кенешлэн» бурд улаз таӵе центрлэн ужамез ассоциацилэн уставезлы пумит уг луы, ӝот-ӝот шуэ Игорь Семёнов. Нош мургес ке учконо, та ужлэн улонэ пыӵамез возьматэ: луэ вылэм, ӝожтӥськыса ветлэм интые, рос-прос пуксьыса, проект гожтыны, бадӟым ужлы федерал коньдон утыны. Нош кин люкетэ мукетъёсызлы но тунсыко ужъёс борды басьтӥськыны? Шуом, удмурт калыклэсь экономиказэ, культуразэ, дышетон удыссэ азинтонъя проектъёс дасяны.

Нялтас вераса, выль проектъёс вордыны юрттоз, вылды, удмурт егитъёслэн бадӟым форумзы но. Сое ортчытон пумысен «Удмурт Кенеш» вазиськылӥз республикамылэн Тӧроезлы Александр Соловьёвлы. Александр Васильевичлы та малпан яраз. Татьяна Ишматова верамъя, форуме люканы луысал шаерысьтымы но солэн палэнысьтыз тужгес мыло-кыдо, визьмо удмурт егитъёсты. Угось соослэн огазеяськыны быгатэмзы, кылзэс но калыксэс гажамзы бордысь потоз ӵуказе нуналмылэн азинлыкез.

Нош фин-угор дуннемы шоры оглом учконо ке, куд-ог ужпумъёсъя асьмеос огкылысь луыны ум быгатӥське. «Удмурт Кенешлэн» кивалтӥсез Игорь Семёнов та пумысен ӧпкелемзэ уг ваты. Исполкомын со фин-угор калыкъёслэн конгрессы сярысь ивортӥз. Конгресс ортчоз 2016-тӥ арын Финляндиын. Отын 5 пӧртэм ӧръя ужпумъёс эскериськыны кулэ. 4 секцияя нокыӵе валамтэос ӧз кылдэ ке, 5-тӥезъя Россиысь но кунгож сьӧрысь фин-угоръёс ваче вуизы. Вераськон мынэ политикаын радикализм пумысен. Та ужпумез нимаз секциын эскерыны дэмлазы Россиысь фин-угоръёс. Угось, Игорь Семёновлэн верамезъя, туала вакытэ историез мыдланьтон Европаын зол шӧдӥське. Тужгес но адӟиськиз со, Быдӟым Вормонлы 70 ар тырмонэз пусйыку. Сюлмаськытэ Эстониын егитъёс пӧлын неофашизмлэн алямез. Игорь Николаевич пусъе: та секциын ик чакласалмы, кызьы Румыниын уло венгеръёс, Швециын — финъёс но мукет. Но, жаляса верано, эстонъёс та ужпумъёсты эскерыны пумит луизы. Фин-угор калыкъёслэн конгрессы политикае, пе, уг пыриськы. Озьы ке но Россиысь фин-угоръёслэн дэмланъёссы воксё палэнтэмын ӧй вал. Конгресс вискын, пе, 2 час ӵоже ужалоз усьтэм площадка. Отын вань со лэчыт ужпумъёсъя вераськыны луоз…

Нялтас вераса, фин-угор калыкъёслэн конгрессы азьын, вуоно арын феврале, шаерамы ортчыны кулэ удмуртъёслэн 13-тӥ ӧтчамзы. Со азьын вань ёросъёсын но каръёсын ортчозы «кенешчиослэн» конференциоссы. Нош 2017-тӥ арын шаерамы ик радъяны чакламын фин-угор егитъёслэсь конгрессэс. Озьыен, тужгес тунсыкоез азьпалан на!

Елена Миннигараева

Удмурт Дунне
By Удмурт Дунне 16 сентября, 2015 08:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<