«Тыметын»: инкуазь но мон — MORT поттӥз крезьгуро бичетсэ

Удмурт Дунне
By Удмурт Дунне Сентябрь 22, 2015 12:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

тыметынКотькуд творческой адямилэн вань пушказ ватэм дуннеез. Кинлэн ке со югыт, шуныт, паськыт. Кинлэн ке пеймыт, кезьыт, мӧзмыт. Куинетӥезлэн пичи, мукетъёсызлы валантэм. Аслэсьтым пуш дуннеме мон адӟытыны тырши «Тыметын» кырӟан бичетэ пыр.

5 пичи дуннеос кылдӥзы асьсэ понна но герӟаськыса пӧрмытӥзы одӥгзэ, валтӥсьсэ. Со 5 кырӟанъёс. Котькудӥзлэн аслаз темаез, котькудӥз вера сюлэмшугъяськонъёсы, малпанъёсы сярысь, адӟытэ улонысьтым пӧртэм вакытъёсты. Ӟеч кырӟан кылдэ соку, куке кылъёс но крезьгур ог-огзылы тупало. Нош кырӟанэдлы крезьгурзэ но кылъёссэ ачид гожтӥськод ке, со тыныд эшшо но матын луэ, со быдэсак тынад дуннеед.

Бичетысь нырысетӥез кырӟан нимаське «Мон огнам тонтэк». Котькуд адямилэн йыраз, улоназ одӥг пол коть таӵе малпан вуэ, дыр: нокин мыным кулэ ӧвӧл, кулэ ӧвӧл яратон но, огнам дышо улыны. Таӵе мылкыд кылдылэ синмаськон бырем бере, куке адямиен герӟаськем шӧдонъёс тӧлӟо но, сюлэмын буш кыле, кезьыт. Соку кужмысь йырад пыртӥськод, тыныд тазьы но улыны кельше шуыса, вӧзысь адями люкетоз гинэ. Но дыр ортчыса, валаны кутсконо, оген кема но шудо улыны уз пӧрмы. Йӧтэ, матысь адямитэк тон быдэсмымтэ мурт кадь шуыса. Пушкад мӧзмыт, секыт, тыныд уг тырмы сюлэм шунтӥсь.

Кыкетӥез кырӟан — «Ышем кылбур» — мукетъёсызлэсь пӧртэм луэ. Кырӟанэз быдэстыны юрттӥз Иван Белослудцев, нош аранжировказэ мон басьтӥ мукет карын улӥсь тодмотэм адямилэсь. Малы озьы пӧрмиз? Куддыръя тупась аранжировка аслыд кылдытыны уг пӧрмы яке маке выльзэ эскерем потэ. Куд-ог адямиослэн крезьгуро ужъёссы куддыр творчестволы мылкыдме ӝуто. Та кырӟан мынам удмурт сямы сярысь, востэм но дӥсьтӥсьтэм луон сярысь. Тон кинлы ке синмаськемын ке, кышкано со адями вӧзтӥ ортчыны ик, пушкад пӧртэм мылкыдъёс ожмасько, уйин умме усем уг луы. Но мылкыддэ котьку вераны кулэ — дӥсьтытэк улӥд ке, бере кылёд.

Куинетӥез кырӟан — «Нунал бере нунал». Таиз вера огвыллем пурысь нуналъёс сярысь, куке ас уженыд вырыса, быдэс улонэд ортче. Мон пукисько уйин но, крезьгур гожтыны вырыса, ӝӧк вылам ик умме усисько. Огвыллем уж шузимытэ. Калык пӧлы но потӥськод ке, аслыд ӝыныё улэп йӧтӥськод, нокинэ уд тодмаськы ни но пегӟиськод кытчы ке йырдэ сазёмытыны.

Ньылетӥез кырӟан — «Учкы синучконэ». Та кырӟанэн мынам малпаськытэме потӥз котькуд кылзӥсез. Мон сярысь кин ке шуэ: со троссэ басьтӥз ни та улонлэсь, малпам ужъёссэ лэсьтӥз. Мыным но потэ, улон сюресме ортчи ни шуыса, нош аслым 20 арес гинэ ай. Со серем. Соин ик, астэ синучконысь адӟыса, юан сётоно: тон ик-а со? Сыӵеен-а тынад астэ адӟемед потэ? Мар карыса вуттӥд ни но ӟеч лэсьтэмзы пумитэ маке умойзэ карид ни-а дуно адямиосыдлы? Дыр вань на. Одӥг интыын сылыны уг яра. Нокин уг тоды, ку тон кошкод но кельтод ваньзэсты.

Берпуметӥез кырӟан, «Тыметын», валтӥсез луэ, со бичетлэн сюлэмыз. Татын ини адӟиське романтической дунне: ку авторлы уг яра зэмос улон но со кылдытэ аслэсьтыззэ. Со тымет. Отын шыпыт, нокин ӧвӧл, мон но котыр инкуазь гинэ. Пыже выдыса, мон кыллисько со тымет шорын но учкисько кизилиё инбам шоры. Мон пегӟисько акыльтэм дуннелэсь но огыр-бугыр ортчись дырлэсь, ватскисько адямиослэсь. Йырын нокыӵе малпан ӧвӧл. Ваньмыз, ма юнме сюлмаськытэ вал, кылиз палэнэ но татчы мон доры уз вуы. Озьы.

Таӵе малпанэн йылпумъяське бичетэ. Ваньмызлы тау, кин кылзӥз но тыршиз валаны сое. Альбомлэн одӥг валтӥсь малпанэз вань, кырӟанъёс ог-огенызы герӟаськемын. Вераме потэ: мынам кадь малпанъёсын ялан ӧвӧл улоно. Зэмос улонлэсь палэнскыса, ышыны но кема ӧвӧл. Со уйвӧт кадь: куке но одно ик сайкалод, ас дуннеысьтыд бугыръяськись улонэ потод. Но уд ышы-а меда собере? Милям, удмуртъёслэн, сяммы но дунне шоры учконмы аспӧртэмлыко. Умме кемалы усид ке, султоно шуыса аслад шӧдэмед, оло, уз луы, оло, юрттыны мычем ки тонэ дуннеысьтыд поттыны уз быгаты ни. Соин чакласьконо. Таин мынам веранэ быриз. Выльысь пумиськытозь выль альбомам, ас кылдытэм дуннеям.

Алексей Пикулев (MORT)

Удмурт Дунне
By Удмурт Дунне Сентябрь 22, 2015 12:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<