Шор площадьын ортчиз Чудья Promoен тодматскон ӝыт

Удмурт Дунне
By Удмурт Дунне 3 сентября, 2015 15:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Книгалы сӥзем «Лыдӟиськы, Ижкар!» фестивальын калык тодматскиз «Чудья Promo» творческой группаысь удмурт егитъёсын.

3-тӥ арзэ ни Ижын радъяське «Лыдӟиськы, Ижкар!» фестиваль. Россиысь тодмо писательёсын пумиськем сяна, татын луэ тодматскыны Ижысь егит гожъяськисьёсын но. Котькуд ӝыт ужа «Ижккрлэн куараосыз» эрико микрофон — отын калыкез аслаз творчествоеныз котькуд мылкыд карись тодматыны быгатэ. Егитъёслэн Dart газетсы радъяз Чудья Promo творческой группаен тодматскон ӝыт.

_DSC0016

Егитъёслэн Dart газетсы радъяз Чудья Promo творческой группаен тодматскон ӝыт.

Шумпотымон, калык трос люкаськиз: мукет ужрадъёсы но лыктэмъёс кубызлэсь, кырӟанъёслэсь но кылбуръёслэсь чузъяськемзэ кылыса чудьяосын матэгес тодматскыны дугдылӥзы.

Асьсэзыс Чудья нимасьёс аспӧртэмлыкоесь, котькудӥзлэн аслаз яратоно ужез, тунсыкъёссыз. Соос вордӥськемын пӧртэм интыосын, Ижын эшъяськемын. Та кусыпъёс ик Чудьяослэсь творчестволы мылкыдзэс ӝуто. Кызьы шуэ Чудья Жени, Чудья Promoез кылдыто эшъёс, соин ик котькуд адямилэн вань аслаз «Чудья Promoез». Эшъяськон бордысь ик потӥз Богдан Анфиногеновлэн Чудья кылбур сузьетэз но – со котькуд эшез сярысь кылбур гожтӥз. Та кылбуръёсысен ик кутскиз котькуд усточиен тодматскон.

_DSC0038

Таня Тихоноваен но Лиля Леонтьеваен соос кылдытӥзы Dukes группазэс.

Евгений Бикузин – суредась. Ассэ со Чудья Жени шуыса нима, вордӥськемын Алнаш ёросысь Азамат гуртын. Быдтӥз Удмурт кун университетысь Искусствоосъя но дизайнъя институтэз, дипломез удмурт калык инстурментлы — кубызлы — сӥземын вал. Али ужез сюлэмызъя — Киужъёсъя элькун юртын крезьгуро инструментъёсты лэсьтэ. Шудэ арганэн, гитарен но кубызэн. Таня Тихоноваен но Лиля Леонтьеваен соос кылдытӥзы Dukes группазэс. Электрон крезьгурез кутытэк, кубыз улсын 2 куараен удмурт кырӟанъёсты быдэсто.

Таня Тихонова — Алнаш ёросысь Улын Сыръезь гуртысь. Дышетскемезъя — психолог, али ужа лицейын. Со сяна, магистратураын Россиысь выжы калыкъёслэсь литературазэс эскере. Яратӥсько, шуэ, ваньмон дыры ӧвӧл ке. Бен, паймод, кызьы со ваньзэ вуттэ. Угось ветлэ на фольклоръя «Чипчирган» ансамбле но эктонъя но кырӟанъя «Эктон корка» студие. Таня кадь ик кырӟаны-эктыны яратэ Лилия Леонтьева. Со но Алнаш палъёсысь, Варӟыл гуртысь. Али ужа школаын логопед луыса. Ваньмон дыръяз яратэ киужен вырыны. Та 2 нылъёс «Чипичрган» ансамблен но «Эктон корка» студиен дуннеез котыръяло, мукет калыкъёсты удмурт эктон-кырӟанъёсын тодмато. Алигес соос, кылсярысь, Румыниысь Трансильваниысь бертӥзы.

_DSC0069

Марина Сергеева – тужгес лыдӟымонэз удмурт кылын гожъяськись чурали.

Мукетыз Чудья – Марина Сергеева. Со вордӥськемын Алнаш ёросысь Усо гуртын. Таиз нылаш чылкак мукет удысын тырше. Туэ быдтӥз ӟуч кылосбуръя факультетэз, ужа Кузебай Герд нимо гимназиын дышетӥсь луыса. Тани кӧня арзэ ни со вотэсын аслэсьтыз бамзэ нуэ – гожъя гуртын но городын луэм учыръёссэ. Мон шуысал: туала удмурт улонэз историе кельтэ. Марина Сергеева – тужгес лыдӟымонэз удмурт кылын гожъяськись чурали.

Нош Богдан Анфиногеновез тодӥсьтэмез ӧвӧл, дыр. Маин гинэ со уг выры. Али гожъя этнофутуризмъя диссертацизэ. Тросэз Богданэз тодо Мурӝол Undeground но Ullapalla Boy крезьгуро проектъёсызъя. Озьы ик со вотэсын «МTV Удмуртия» огинзэ нуэ, удмурт видео люка. Льӧль малпанэз — кылдытыны уен-нуналэн ужась удмурт телевидение. Бадӟым инты усточилэн улоназ басьтэ литература. Кылем арын потэм «Айшет будущего» книгаеныз со йыгаське удмурт литературалэн ӧсъёсаз.

_DSC0007

Зал тыр чузъяськиз Богдан Анфиногеновлэн куараез. Зэмос Маяковский кадь кылбуръёссэ лыдӟиз.

Ужрадэ лыктэмъёс, усточиосын тодматскем сяна, выйылӥзы соослэн творчествоязы. Юанъёслэсь тросгес вал куронъёс. Угось, калык паймиз Таня Тихоновалэн но Лиля Леонтьевалэн кырӟамзылы, Чудья Женилэн кубызэн шудэмезлы (угось, тросэз та крезьгуро инстурментэз нырысьсэ адӟизы). Зал тыр чузъяськиз Богдан Анфиногеновлэн куараез. Зэмос Маяковский кадь кылбуръёссэ лыдӟиз. Калык зол чабиз. Блогысьтыз гожъямъёсыз пыр Марина Сергеева, калыкез туала егитъёслэн гуртын но городын улонэнызы тодматӥз.

Котькудӥз Чудья аспӧртэмлыко, котькудӥз аслаз яратоно уженыз выре — кин ке кырӟа, кылбура, кин ке крезьгуро интсурментъёсын шудэ, гожъяське. Но одӥгез соосты герӟа – этнофутуризм шуон. Чудьяос, вашкалазэ гажаса, кылдыто туала удмурт культураез.

Мария Векшина

Туспуктӥз Александр Горбунов

Удмурт Дунне
By Удмурт Дунне 3 сентября, 2015 15:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<