Шаерамы кылдытэмын 20 лесничествоос

Удмурт Дунне
By Удмурт Дунне 24 сентября, 2015 12:30
047525,природа,лес

Туэ шаерамы 2,86 гектар нюлэс вылын 12 пол тылпу поталляз.

Шаерамы кылдытэмын 20 лесничествоос. Соос азьын сылӥсь валтӥсь ужпум — нюлэслэсь кызьы кутӥськемзэ чаклан. Нош сикез мерттон но будэтон оскемын «Удмуртлес» учрежденилы.

Соослэсь ужамзэс син азяз возе элькунысьтымы Нюлэс хозяйствоя министерство . Нырысь ик со бадӟым саклык висъя вож узырлыкмес тылпулэсь утёнлы. Элькунамы та ласянь югдур урод ӧвӧл. Туэ шаерамы 2,86 гектар нюлэс вылын 12 пол тылпу поталляз, но ваньмыз огъя кужымен ӝог кысэмын вал.

Приволжск федерал округысь улосъёс пӧлын Удмуртиын сик тужгес шер ӝуа. Малы ке шуоно асьмелэн нюлэсэз чаклась инспекторъёсмы оскем ужзэс ӟеч быдэсъяло. Тани туэ гинэ нюлэсъя законъёсты тӥясьёс вылэ 1 сюрс 846 протокол гожтэмын, кылем арын та дырен ӵошатыса, со 1,7 поллы тросгес.

Министерство озьы ик арысь аре бадӟым саклык висъя тэль мерттонлы. Шаерамы ужало 13 нюлэс питомникъёс, озьы 177,6 гектар вылын будэтӥське пинал нюлэс. Питомникъёсын арлы быдэ 17 миллион пужым но кыз уд будэто. Со тырме республикаямы мерттыны но бускель улосъёсы вузаны. Кылсярысь, пичи писпуосты басьто Киров, Пермь, Свердловск улосъёс но Башкортостан.

Котькинлы тодмо: писпу мерттэмлэсь азьло кидыс дасяно. Со бордысен кутске нюлэсэз паськытатон. Со сярысь вис карытэк сюлмаське «Удмуртлес» огазеяськон. Солэсь тыршемзэ тужгес но яркыт возьмато лыдпусъёс. Тани 2014-тӥ-2015-тӥ аръёсы 8,7 тонна кидыс дасямын. Со пӧлысь 8,5 тонна — кыз кидыс, пужым — 108 килограмм, лыстэмпужым (лиственница) — 85 килограмм. Кидыслэн ӟечлыкез вылӥ. Ваньмыз нырысетӥ классэ пыре. Та ужлы «Удмуртлес» 40 миллион манет быдтӥз. Но со пайдаен берытскоз, табере кидыс уно аръёс ӵоже нюлэс мерттыны тырмоз. 2010-тӥ арын кӧс улэм бере лымшор палъёсын кызъёс куасьмыса быризы вал. Оскем потэ, быдэс шаерамы соос нош ик шаугетозы, чеберенызы синэз шумпоттозы шуыса.

Геннадий Романов

Вож узырлыкмы тус-тас медаз луы шуыса, тэль коранэз но сое производствое келянэз ӟечгес эскероно.

Шаерысьтымы ӝыныез тэль пу дасяны арендае сётэмын, со 888 сюрс гектарлэсь ятыр 497 нюлэс участокъёс. Кызьы чаклано вож узырлыклэсь кытчы кутӥськемзэ?

— Нюлэс хозяйствоя министерство дася нимысьтыз проект, — шуиз министр Рафис Касимов. — Соя тэлез арендае сётыны луоз сыӵе предприятиослы гинэ, кудъёсыз пулэсь ӟеч продукция поттыны быгато, шаермылэн кисыяз коньдон пырто. Таос пӧлысь быръемын луозы устоосыз но оскымонъёсыз. Туннэ нуналлы та куронъёслы тупа одӥг предприятие гинэ — Можгаысь «Красная звезда».

Елена Тугашова

Удмурт Дунне
By Удмурт Дунне 24 сентября, 2015 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<