Пичиез понна — ичи. Ваньбурлы выт лыдъяськоз выль сямен

Удмурт Дунне
By Удмурт Дунне 29 сентября, 2015 12:50

Удмуртия шедиз 28 улосъёс пӧлы, кудъёсаз туэысен выль сямен лыдъяське нимаз адямиослэн ваньбурзы понна выт. Солэн быдӟалаез пуктӥське, ваньбурлэсь кадастръя дунзэ лыдэ басьтыса. Воштӥськонъёс сярысь тупен-тупен мадиз элькунысьтымы коньдон ужпумъёсъя министр Станислав Евдокимов.

2020-тӥ арозь ум вите

— Станислав Петрович, 284 номеро федерал законъя улосъёс та выль системае выжыны кулэ 2020-тӥ арысен. Но Удмурт шаер сое пыӵатон борды басьтӥськиз ни али ик. Маин та герӟаськемын?

— Зэм, та выльдӥськон быдэс Россиын пыӵаны кутскоз 2020-тӥ арысен. Но сое огнуналскын гинэ уд быдэсты. Трос дыр кулэ луоз вань ваньбурлэсь кадастр дунзэ тодон понна. Элькунамы та уж быдэстэмын ни.
Кыӵе воштӥськонъёсын пумиськоз выт тырись? Эскерон возьматӥз: выль сямен тыриськон тужгес но пайдаё луоз гуртын улӥсьёслы. Законэн, кылсярысь, луонлык сётэмын, шуом, коркалэсь «арлыдзэ» лыдэ басьтыны. Выль куронъёсъя пичи юртъёс понна выт воксё но тыроно уз луы. Озьы гуртоос коньдонзэс шыръяны быгатозы.

— Иське, шоро-куспо адями понна вытэз выль сямен тырон пайдаё луоз. Но азьвыл системая — ваньбурлэн инвентарь дунызъя — люкаськись вытэн тырмылӥзы интыослэн бюджетъёссы. Иське, соос ыштонъёс адӟоно луозы?

— Улосъёс ваньзэ-ӧвӧлзэ 30 миллиард манет пала ыштонъёс адӟозы. Но мукет ласянь, гуртоослы тыриськыны табере капчигес луоз. Таослэн доходзы, городъёсын улӥсьёсын ӵошатыса, шӧдскымон ичи ук. Тазэ но пусйытэк кельтыны уг луы: гуртъёсын улӥсьёслы нокин но корка дасяк пуктыса ӧз сёты, соос юртъёссэс ӝутӥзы асьсэ кужыменызы-коньдонэнызы. Бен, городъёсын но калык пуктӥське. Но татын чылкак мукет дунъёс. Адями дуно ваньбур басьтэ ке, иське, со дась ини бадӟым тыриськонъёслы но. Дуно машина басьтыкуз, адями тодэ ук, выт тыроно луоз шуыса.

Ми малпамъя, интыосысь бюджетъёсы коньдон люкаськоз коттеджъёсын улӥсьёслэсь но выль юрт пуктӥсьёслэсь бичам выт чотын.

— Котькуд гуртэ Интернет вуэмын ӧвӧл ай, мӧйы калык компьютерен вырыны но уг вала. Кытысь соос тодыны быгатозы вытэз выль сямен лыдъян сярысь?

— Вуоно арын ваньбур возисьёслы вуоз гожтэт — отын ваньмыз пусйиськоз: ваньбурезлэн кыӵе кадастр дуныз, кӧня лыдъямын соя налог. Калыклы ивор сётонэз ас вылаз басьтӥз Вытъёсъя федерал службалэн управлениез. Соос вуоно арез возьмаса уз пуке, туэ ик калыклы гожтэтъёс келялозы ни. Та ужез нуэ Кадастръя служба но. Со сяна, адямиослэн вазиськонъёссылы пыр-поч валэктон сётозы многофункциональной центръёсын но. Визь-кенешен юрттозы Росреестрысь но Вытъёсъя службаысь специалистъёс.

Панорама_без_названия1

Вытъёсъя федерал службалэн сайтаз www.nalog.ru адресъя пырыса, ваньбурлэн кузёез ачиз лыдъяны быгатоз недвижимостезлы вытлэсь быдӟалазэ.

5 арлы быдэ выль

— Кӧня дырлы пуктӥсь-ке ваньбурлэн кадастр дуныз? Огпол но весяклы?

— Дун вошъяськоз 5 арлы быдэ. Выль система, азьвылэныз ӵошатыса, трослы зэмлыкогес, шуыны луоз. Угось кадастр дунэз пуктыку, лыдэ басьтӥське ваньмыз: недвижимостьлэн рынокъя дуныз, кыӵе интыын но ёросын интыяськемын, матын-а солы социальной юрттэт сётонъя огазеяськонъёс но трос мукет.

Ваньбурлы вытэз инвентарь дунъя пуктон вужмиз ни: та система кылдытэмын вал совето вакытэ. Нялтас вераса, 2013-тӥ арын 1-тӥ мартысен инвентарь дун вошъяськемысь-выльдӥськемысь дугдӥз. Озьы талэсь бер ӝутэм коттеджъёс, коркаос понна выт ӧз кутӥськы. Нош со вие ик гуртъёсын вуж коркаосын улӥсьёс та вытэз быдэсак тыризы, эшшо ке инвентарь дунъя: таиз, кызьы валэктӥ ни, огкадь вал куашкан калэ вуэм коркаосын улӥсьёс понна но, выль юртын улӥсьёс понна но. Табере озьы уз луы ни, котькуд юртлы выт пӧртэм сямен пуктӥськоз.

— Удмуртиын улӥсьёс ку кутскозы та вытэз выль сямен тырыны?

— Туэ ар понна — вуоно арын. Калыклэн луонлыкез вань ни ваньбурлэсь кадастр дунзэ туннэ ик тодыны. Со понна пыроно Росреестрлэн сайтаз — www.rosreestr.ru адресъя. Быръёно «Электронные услуги» люкетэз, отысь шедьтоно «Справочная информация по объектам недвижимости в режиме онлайн» ссылкаез. Кадастр дун умойтэм лыдъямын потӥз ке, шуом, укыр трос пуктэмын, сайтысь ик тодыны быгатоды, кытчы та пумысен вазиськоно но выль сямен лыдъяны куроно.

Вытъёсъя федерал службалэн сайтаз www.nalog.ru адресъя пырыса, ваньбурлэн кузёез ачиз лыдъяны быгатоз недвижимостезлы вытлэсь быдӟалазэ. Со понна быръёно «Калькулятор расчёта налога на имущество по кадастровой стоимости» ссылкаез. Быръёно, кыӵе категорие пыре ваньбурды, кӧня ар тӥ соин кузёяськиськоды, кыӵе солэн быдӟалаез но кадастр дуныз.

Выль радлыке дыртытэк выжомы. Со пичиен пыӵалоз матысь 5 ар ӵоже, арлы быдэ 20 процентлы йылоз. 2020-тӥ арлы гинэ та вытэз быдэсак выль сямен тырыны кутскомы. Со понна вань муниципал кылдытэтъёсын вытъя ставкаос юнматэмын ни. Коркалэн, квартиралэн кадастр дунзы 10 миллион манетлэсь ичи ке, вытлэн быдӟалаез луоз 0,1 процент, мукет объектъёслы — 0,5 процент. Ваньбурлэн кадастр дуныз 300 миллионлэсь ятыр ке, выт луоз 2 процент.

Льгота — одӥгез понна

— Тыриськонэз капчиятон кинлы ке чак-ламын-а?

— Вань льготаос, кылсярысь, пенсионеръёслы, быдэсак утемын. Со сяна, недвижимостьлэн кыӵе ке люкетэз (площадез) понна выт воксё но уз басьтӥськы. Кылсярысь, комнаталэн 10 квадрат метрез понна, квартиралэн — 20 квадрат метрез понна, нимаз коркалэн — 50 квадрат метрез понна. Но та капчиятон адямилэн котькуд ваньбурезлы чакламын ӧвӧл. Шуом, солэн вань квартираез, нимаз коркаез, гаражез — льгота сётӥськоз одӥгезъя гинэ. Кудзэ быръёз со — ивортон келяно вытъя инспекцие 1-тӥ ноябрёзь.

Адями ивор ӧз келя ке, льгота сётӥськоз сыӵе ваньбурезлы, кудӥзлэн кадастр дуныз тужгес бадӟым. Пусйыны кулэ: льгота улэ уг шедьы ужбергатонын кутӥськись ваньбур.

— Вытлэн быдӟалаез арлы быдэ 20 процентлы йылоз шуыса кылӥськод ке, мылкыд куашка…

— Выль системая вытлэн быдӟалаез калыклы вормонтэм уз луы. Ми лыдъямы ни, кӧня басьтӥськоз соиз я таиз ваньбурлэсь. Син азяды пуктэ Ижысь Ленин ёросысь 2008-тӥ арын пуктэм юртысь одӥг висъетэн квартираез. Азьвыл сямен — инвентарь дунъя — лыдъяно ке, вытлэн быдӟалаез 653 манет вал. Нош кадастр дунызъя лыдъяно ке (0,1 процентъем ставкаен), 2015-тӥ ар понна вытлэн быдӟалаез 2 манетлы йылоз, нош матысь 5 ар куспын — ваньзэ-ӧвӧлзэ 13 манетлы. Нош Октябрь ёросысь 1975-тӥ арын пуктэм юртысь 2 висъетъем квартира понна, кылсярысь, выт 2020-тӥ арозь ӝутскоз 458 манетысен 845 манетозь.

Гуртын шерезлэн юртэз бадӟым. Вылаз ик, 50 квадрат метрезлы выт уз пуктӥськы. Соин ик ваньбур понна выт, азьвылэн ӵошатыса, шӧдскымон кулэсмыны быгатоз. Басьтом тани Якшур-Бӧдья ёросысь 1992-тӥ арын пуктэм коркаез. Быдӟалаез, шуом, 64 квадрат метр. Ваньбурлы выт инвентарь дунъя 1 сюрс 910 манет луэ. Кадастр дунъя лыдъяно ке, та лыдпус 162 манетлы кулэсмоз — 1 сюрс 748 манетозь. Та эшшо огпол возьматэ: выль радлыкъя бадӟым саклык висъямын ичи доход басьтӥсьёслы, соослэсь улонзэс капчиятонлы.

Сергей Захаров

Туспуктӥз А. Горбунов

Удмурт Дунне
By Удмурт Дунне 29 сентября, 2015 12:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<