Лидия Нянькина. Чорыг. Верос

Удмурт Дунне
By Удмурт Дунне Сентябрь 17, 2015 15:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Лидия Нянькина.

Одӥг ӵукна Паля кияз пуж кутӥз но чорыганы кошкиз. Ма, мукет дыръя пияш пужен уг чорыга. Солэн визнанэз вань. Чорыганы но огназ уг ветлы, нош али понназ мыноно кариськиз, малы ке шуоно со аквариум лэсьтыны малпаз.

Со нуналэ Паля трос чорыг кутӥз. Песянаез соослэсь шыд пӧзьтӥз, нош кык бадӟымесь чукырнаосты пияш аквариумлы шуыса кельтӥз. Со куинь литръем банкае шурысь ваем вузэ лэзиз, отчы кӧльыос куяз. Собере шур пыдсысь ишкам вубуртчинэз тыриз но чорыгъёссэ отчы лэзьяз. Банказэ-аквариумзэ укно дуре пуктӥз. Отчы нянь пырыосты, нумыръёсты куяз. Мед сиёзы, пе. Тазьы вырыкуз ик, дораз Горд Гирыш вуиз. Ма, Горд Гирыш — соослэн коӵышсы. Чорыгъёслэсь зынзэс шӧдыса, со мяугетыны кутскиз, банка пыр соосты азь пыдъёсыныз ӵабъяны ӧдъяз.

— Пирыс! Соосыз тыныд ӧй кутылы! — Паля коӵышсэ тышкаськем кариз.

Горд Гирыш, куатаськыса сямен, аквариум дорысь кошкиз.

— Песяй, учкы ай, мынам аквариуме вань!

— Осто-о! — чабкиськиз песянай. — Таосыд уз кулэ-а бон?

— Горд Гирыш гинэ медаз си! Мон шудыны пото, нош тон соосты чакласа ул!

Та пумитэ песянай номыр ӧз вазьы. Паля ураме потӥз. Ӝоген пияш дораз эшъёсыныз вуиз. Соослэн но аквариумез адӟемзы потӥз.

— Милям городысь Ивимылэн зэмос аквариумез вань, — пусйиз Палялэн огез эшез.

— Нош мынам зэмос ӧвӧл шат? — ӝоже усиз Паля.

— Конечно, ӧвӧл! Зэмос аквариум ньыль сэрго луэ! Чорыгъёсыз но чебересьгес!

— А мынам котырессэ но адӟеме вань! — будэтӥз мукетыз.

Пияшъёс кема ӧз ӝегатске: доразы бертӥзы. Соос аквариумзэ зэмос ӧвӧл ке но шуизы, Палялы аслыз кельше. «Конечно, зэмос аквариум басьтысалзы ке, мон чик пумит ӧй луысал!» — ас понназ малпаз Паля.

ӝыт анаен атаез ужысь бертӥзы. Пияш соос азьын но аквариуменыз ушъяськиз.

— Атай, учкы ай, мон кыӵе аквариум лэсьтӥ!

— Зэм но, кыӵе тунсыко! — аквариум доры матэктӥз атаез. — Только чорыгъёсыд татын кема уз улэ, пие, кулозы.

— Анай, тон но учкы! — анайзэ дэрем саестӥз кыскиз пияш.

— Нош ик ужтэк улӥськод-а? — пиез шоры лек вазиз анаез.

Пияш йырзэ ошиз, нош атаез сое йыртӥз маялтӥз но шуиз:

— ӵуказе городэ ветлом, пие. ӵошен аквариум быръём, ява!

— Ура-а! — кеськиз пияш.

— Коньдонэд туж трос луиз-а, мар-а? — атайзэс пыкылыны ӧдъяз анайзы.

Паля анаезлэн кылъёсызлы паймиз. Кызьы со уг вала, аквариум — со сыӵе чебер арбери! Кыӵе умой чорыгъёс шоры учкыса пукыны, нош кыӵе тунсыко соосты сюдыны!

— Басьтом, басьтом, пие.

— Я визнан солы, я аквариум… — нырулаз ӟургетыса, палэнскиз Палялэн анаез.

— Ма, кен, ачид нокыӵе кулэяськонъёстэк будӥд шат? — паймытскиз песянай.

— Мыным шудонэн йырин ӧй вал!

— Пичи мурт шудытэк уг буды! — вожез потыса, вазиз песянай.

— Басьтом, пие, басьтом! Нырысь аквариум басьтом, собере чорыгъёсты быръём! — аслэсьтыз ӵогиз Палялэн атаез.

— Коть акула басьтэ! — киыныз шонтӥз Палялэн анаез.

Со куспын доразы Горд Гирышсы лыктӥз. Пияш сое ӟыгыртӥз но нимаз висъетэ кошкиз.

— Гирыш, асьмелы акула кулэ ӧвӧл, оветь. Акула аквариуме но уз тэры. Со сьӧсь маке. Асьмелы чебер чорыгъёс кулэ…

— Мяу-у… — Паляен соглаш кариськыса сямен, вазиз Горд Гирыш.

— Аквариум басьтӥм ке, отысь чорыгъёсты сиыны уз яра. Валад-а, Гирыше?

Та пумитэ Горд Гирыш синъёсыныз гинэ кыньыртӥз.

ӵуказеяз Паля, котьку сямен, вазь сайказ. Вӧзаз Горд Гирышез нургетыса изе на.
— Я, мар-о, пие, султӥд-а? Сиськы но, асьмеос городэ кошком, — вешаз атаез.

— Зэм-а? Аквариум басьтомы-а?!

— Конечно, басьтом! Аквариум но, чорыгъёс но, соослы сиён но басьтом!

— Соос мар бен сиё, атай? Нумыръёсты-а, мар-а?

— Городын аквариумъёсты вузан нимысьтыз лавка вань, тылобурдо базар но вань. Отчы мыныса, ваньзэ ас синмынымы адӟом.

Пияш сиськиз, ӝог гинэ дӥсяськиз но аквариумез доры мынӥз. Чорыгъёсызлы нянь пырыос куямез бере атаеныз сюрес вылэ потӥзы.

Зэм, городын тылобурдо базар но вылэм. Паля чылкак паймиз, нош аквариумъёсты вузан лавкаысь соос атаеныз ӵош ньыль сэрго аквариум бырйизы. Дас чорыг басьтӥзы. Куинез бадӟымесь, нош мукетъёсыз пичиесь на ай. Соос, пе, меченосецъёс но гуппиос нимасько. Чорыгъёслы сиён но басьтӥзы. Вуз карисьёс ваньзэ валэктӥзы: кызьы чорыгъёсты возёно-утялтоно, кызьы но ку сюдоно. Аквариум сяна, Палялы атаез суредаськон альбомъёс, буёлъёс басьтӥз. Бадӟым будыса, Паля художник луыны малпа уго.

Пияш дораз туж шудо синъёсын вуиз. Корка пыремез бере ик со анаен песяезлы вазиськиз:
— Песяй, анай! Ми зэмос аквариум басьтӥм!

— Я, возьматы ай, зэмос аквариум кыӵе луэ! — песянайлэн ваньзэ ас синмыныз адӟемез потӥз.

— Тани, песяй, таиз аквариум, нош таиз — чорыгъёс, — банкаысь чорыгъёсты возьматӥз со.

— Осто, чебересь ук! — чабкиськиз песянай. — Чильк-вальк гинэ кисьтасько, ява!

ӝоген аквариум ӝӧк вылын сылэ вал ини. Отчы пияш ву вайиз. Собере атаеныз ӵош аквариуме кӧльыосты куязы но чорыгъёсты вуэ лэзьязы. Песянайзы но юрттӥськиз. Котыртӥзы Горд Гирышсы но бергаз.

— Со аквариум котырады ужтэм муртъёс сямен бергалоды ни, — куаретӥз анайзы. — Ярам ай, соосыз чоньдӥллям, — анайзы дорысьтызы кошкиз.

Пияш бызьыса соиз аквариумез доры мынӥз. Зэм но: чорыгъёсыз кулӥллям. Палялы чукырнаосыз туж жаль ке но йӧтӥзы, соосты Горд Гирышезлы сюдӥз. Соиз чорыгъёсты ыргетыса ик сииз. Эшшо куре на вал, но Паля солы шуиз:

— Гирыш, али мыным чорыганэн йырин ӧвӧл. Сьӧрам бызьылытозь, шыра вал…
Но зэмос аквариумез Палялэсь сюлэмзэ выльысь буйгатӥз. Ворпо буёлъёсын кисьтаськись чорыгъёсыз шоры учкыса пукемез бере эшъёсыз доры дыртӥз. ӝоген соос ваньзы Паляос доры вуизы.

— Вот зо-ол! Мон но анайме аквариум басьтыны куро! — шуиз огез пияш.

— Мон но! — вазиз кыкетӥез.

Собере соос суредаськыса пукизы. Паля альбом листоке акула лэсьтӥз. Ымыз маке быдӟа усьтэмын, отысь лэчыт пиньёсыз адӟисько. Суредэзлэн улӥяз гожтӥз: «Та луоз анай». Суредзэ Горд Гирышезлы гинэ возьматӥз.

Удмурт Дунне
By Удмурт Дунне Сентябрь 17, 2015 15:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<