Лымшоръёслы зор ӧз люкеты — 9 ёрос уборказэ йылпумъяз

Удмурт Дунне
By Удмурт Дунне 29 сентября, 2015 09:34

сараматоваГурт удысъя но сиён-юонъя министерство ивортэмъя, 24-тӥ сентябрьлы шаерысьтымы 9 ёрос уборказэ йылпумъяз.

Шорлыдын гектарысьтыз 17,1 центнер потэ. Кылем арен ӵошатоно ке, та 3 центнерлы ӧжытгес. Тужгес бадӟым урожай басьтӥзы Вавожын — 29,1 центнер. Ёросысьтызы «Удмуртия» хозяйствоын воксё но 33,7 центнер люказы, нош «Колосын» — 30,5. Таосты одӥг хозяйство но сутыны ӧз быгаты.

— Вавож палъёс уго гектараз ог 60 килограмм удобрение понӥзы, — шуэ гурт удысъя но сиён-юонъя министерствоысь будосъёсъя но музъем кусыпъёсъя управлениен кивалтӥсь Николай Широбоков. — Нош куд-ог хозяйствоосын 10 килограмм но поныны ӧз быгатэ. Хозяйство юн ке, удобрение тырмыт басьтытэк со нокызьы но уз кыльы. Ӟеч урожаез утялтыны мед быгатозы шуыса, техника но басьто.

Зэмен ик, техниказэс выльдэмзы ик лымшоръёслы ӝоггес ужаны луонлык сётӥз. Зоръёс но, уйпалан сярысь, татын ичигес кисьтӥзы. Котьма ке но лымшоръёслы но уборказэс ортчытыны капчи ӧй вал.

— Зоръёсын сэрен толэзь но ӝыны ӵоже юосмес утялтыны выримы, азьвыл аръёсы 20 нуналскын ужъёсмес йылпумъяськомы вал, — шуэ Алнаш ёрос администрациысь гурт удысъя управлениен кивалтӥсь Владимир Медведев. — Пӧсь возиськемен, юос нырысь туж начар пушйизы. Зоръёс усьыны кутскыса гинэ, выльысь ӝужазы на. Таин сэрен бусыос тэгыз ӧз ӝужалэ. Гербицидъёс пазямы ке но, жаг зол аляз. Со но ю-няньлы огкадь куасьмыны ӧз сёты. Тысь куасьтон но шертон комплексъёсмы уен-нуналэн ужано луизы. Бератаз ю тысен ӵош кизем трос аръем турынъёс но зол нуйтӥськыны ӧдъязы. Соин ик 18 сюрс 625 гектар пӧлысь ог 2 сюрс гектарез юос пудо сиёнлы кошкизы. Котьма ке но гектарысьтыз ог 19 центнер люкаськиз. 20 центнерлэсь но уно люканы пӧрмытӥзы «Оркино», «Прогресс», «Колос» хозяйствоос. Вуоно арын бусы ужъёсты ӟеч ортчытон понна кидыс тырмыт дасямы: 4 сюрс тонна ёрослы тырме ке но, ог 6 сюрс тонна кельтомы. Кин тодэ, мукет ёросъёс но, оло, дорамы вазиськозы ай.

045199,Селтинский район,уборочная,уборка,комбайн,поле,СПК Свобода

Тулыслы 62 сюрс тонна кидыс дасямын ни. Кулэяськемлэсь со 80 процент.

 

Алнашъёс пудо сиён но, лябгес ужась ёросъёсты санэ басьтыса, дасяло. Али гижысь-пиньысь утялто кукурузазэс. Таиз 4 сюрс гектар вылын чебер пушъемын. 700 гектарез утялтэмын ни. Куазь сётӥз ке, кылемзэ но гуосы син куспын тырозы. Озьыен, оглом котькуд пудолы 45 центнер сиён люкаськоз, шуэ Владимир Медведев. Шаерамы та лыдпус туннэ 23,5 центнер. Сиёнлы кулэяськисьёслы алнашъёс юрттыны дасесь.

— Тол улэ кизёнмес гинэ чакламмыя быдэстыны ӧм быгатэ, — азьланьтэ Владимир Медведев. — 4 сюрс 900 гектарез тырмытыны малпаськомы ке вал, 3 сюрс 300 гектаре гинэ кизьыса вуттӥмы. Зорыса улэмен, уборка борды бергес кутскимы, бусыос бушаса ӧз вуэ бере, кизён но ӝегаз. Нош 15-тӥ сентябрь бере кизьыны уг яра ни — ляб потоз, кынмоз. Но мылкыд алама ӧвӧл. Тол улэ кизён — со страховка, пудо сиёнтэк воксё медам кыльы шуыса. Тулыс бусыосмы ӝужалозы ай.

Туэ быдэс шаерамы тол улэ кизёнэн югдур начар. Николай Широбоков верамъя, 85 сюрс гектар интые, 55 сюрсэз гинэ киземын. Тужгес секыт та ласянь Красногорск, Кез но Камбарка палъёсын — ӝыныез но бусыоссы киземын ӧвӧл.

Тулыслы 62 сюрс тонна кидыс дасямын ни. Кулэяськемлэсь со 80 процент. Но таизлэн ӟечлыкез рос-прос эскерымтэ на. Алнаш, Вавож, Можга, Кез, Пичи Пурга, Сьӧлта ёросъёсын гинэ кидыссы тырмыт.

Туспуктӥз А. Горбунов

Удмурт Дунне
By Удмурт Дунне 29 сентября, 2015 09:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<