Кыед зын но голькыт шоколад

Удмурт Дунне
By Удмурт Дунне 22 сентября, 2015 12:02
Юлия Турова

Юлия Турова

«Маке зуркыт луиз, иське, гуртэ кыдёкын ӧвӧл ни», — малпай мон. Зэм но, гуртам вуисько ни шуыса, мон валай, куке машинае кыед зын пырыны кутскиз.

Машинаысь потыса, тодмо сюрестӥ мынӥсько. Та сюрес гопо ке но, дэри ке но, мон сое яратӥсько. Маке шат, со сюрестӥ ӝужыт каблукъёсы вылын мырдэм мынӥсько шуыса, асфальт вылтӥ но пӧртэм уг ветлӥськы ук. Валтӥсез — со сюрес гуртэ нуэ.

Пыри корка. Анай табань пыже. Йӧлвыл дасям, мятаен чай. Ми но алигес общагаын табань пыжылӥм, тазьы ик кадь йӧлвылын сиим. Но малы таӵе ческыт ӧй вал. «Йӧлвылды магазинысь», — серектэ анай. Табань пыжыса, песянай доры тубим. Кыӵе мон яратӥсько песянай доры ветлыны. Со мачкоз но, буйгатоз но, кырӟалоз но массаж лэсьтоз на. Ми соин эшъёс кадь. Пиналэн пересен огкадесь, пе.

Дорамы лыктӥз киросанае. Мыным канфет ваем. Пизэ уг лэзьы сиыны. Нечё, пе, тамак кыскисьлы канфет сиыны. Ха! Вот тыныд. Шонер.

Мынам школае ветлэме потӥз. Кыӵеен борддоръёссэ буязы ни меда таяз аре? Кинъёс дышето? Стадионмы лэсьтӥське-а? Дышетӥсьёс юалляськизы дышетскон, спортэн выреме сярысь. Адске, соослы зэм но тунсыко, соос сюлмасько шуыса.

Ӝытазе, кино учкыкумы, горячий шоколад лэсьтыны малпай. Лэсьтӥ, пе. Атайлы сётӥ. Татчыозь уг валаськы, макем зол яратоно толыктэм пиналдэ туж-туж-туж голькыт мае ке ымнырдэ кисыръятэк юыса быдтон понна. Атай кофе но сакыртэк юэ ук. Адске: ӧз поты солэн монэ обидемез.

Дорын гинэ монэ валалозы. Соин мон татчы ялан дыртӥсько. Гуртэ. Анай-атай доры.

гурт

* * *

Паймисько та городлы. Ваньмыз чебер кадь. Сяськаос но будо, кызьпуос но гуртын кадь ик. Котыр шулдыръяськон интыос, соос понна ик городын улэм потэ вал. Котыр пуктылэмын бадӟым вузаськонниос. Но малы ке со вузаськон интыос улон коркаослэсь чебересьгес. Малы ке магазинъёсын борддоръёссы но шонересь, укнооссы но пластиклэсь, диванъёссы но кожаноесь… Нош милям огъяулонниысь комнатаямы вань тумбочкамы, кудаз гожтэмын — 1983-тӥ ар. Апае шуэ, выль общежитие пуктӥзы 1982-тӥ арын, ваньмыз вал выль… 30 ар отын улэмын ни. Татчы улыны пырыкумы, милесьтым 4 сюрс манетэн октӥзы, кытчы меда со кошкиз? Коньдон милесьтым гинэ ӧз октэ, дыр, ук, азьло аръёсы улэм адямиослэсь но.

Али милемлы ярагес супермаркетысь диван вылын пукыны, малы ке шуоно отын тыл уг кысылы, тараканъёс уг бызьыло, со сяна — отын шуныт…

Суредаз Чудья Жени

 

Удмурт Дунне
By Удмурт Дунне 22 сентября, 2015 12:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<