Кун Кенешлэн Президиумез эскериз туэлы чаклам бюджетэ воштонъёсты

Удмурт Дунне
By Удмурт Дунне 16 сентября, 2015 14:47

Туэлы чаклам бюджетэз кылем арлэн пумаз юнматыку, озьы ик чакламын: ар куспын мултэс коньдон кылдыку, со висъяськоз тужгес лэчыт ужпумъёслы.

Чакламлэсь тросгес уксё вуиз Нюлэс хозяйствоя министерство, озьы ик Правительство бордын ужась Архивъёсъя кун комитет пыр сётэм кун услугаос понна — озьы 3 миллиард 800 миллион манетлы ятыргес коньдон люкаськиз. 37 миллион манет вуэмын Калыкез утён, семья но демография политикая министерство пыр. Со сяна, элькунмылэн бюджетаз вуиз берыктонтэм вылысь юрттэт но — 740 миллион манет.

Коньдон ужпумъёсъя министрлэн воштӥсез Фарид Асадуллин ивортэмъя, ватсаса вуэм коньдонэз висъяны чакламын пӧртэм министерствоослы: талэсь азьло соослэн ужрадъёссылы юрттэт кулэстэмын вал угось, табере со берыктэмын луоз.

Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова пусйиз: чакламлэсь мултэс люкаськем коньдонлэн бадӟым люкетэз висъяськоз бюджет чотын тыршисьёслы уждун тыронлы. Талы чакламын 3 миллиард манетлэсь ятыр. Со сяна, 30 миллион манет вуоз Дышетонъя но наукая министерстволы — учебник басьтонлы, 500 миллионэз кошкоз Медицинаын страхованиея фонд азьын кылдэм пунэмъёсты пытсаны. Уксё висъяськоз сюрес лэсьтонлы но, тылпуэн нюръяськонъя службалы эстӥськон басьтонлы но, Печатья но иворъёсъя агентстволэн бурд улаз кылдытэм «Удмуртия» центр усьтонлы но, спортъя но туризмъя куд-ог объектъёсты возёнлы но. Интыосысь кивалтонъя ёзъёслы ваньбурзы понна вытсэс тырыны капчигес луоз — талы субсидия выльысь висъяськоз.

президиум

Правительстволы вазиськон дасяно — лэсьтӥськонъя огазеяськонъёс азьын пунэмъёсты пытсаны 1 миллиард манет мед шедьтозы.

Коньдон ужпумъёсъя министерство макем ӟеч ужа коммерция банкъёсысь пунэмъёсты кун кредитъёсын пытсан ласянь? Фарид Асадуллин пусъемъя, таиз ужпум — валтӥсьёсыз пӧлын. Выриськомы, пе, федерал центрысь уксё кыскыны, шуак кылдылӥсь ужъёслы басьтӥськомы вакчи дырлы кредитъёс — таосъя процентъёс шӧдскымон ичи.

Федерал центрен кусып возён пумысен Софья Широбокова мылкыдзэ вераз: странамылэн бюджетаз Удмуртиысь укыр трос уксё кошке. Люкаськем доходъёсмы пӧлысь 35 процентэз шаерамы кыле ке вал, туннэ нуналлы та лыдпус 33 процентозь усиз ни.

Но ми тэк пукыны ум малпаське, шуиз Софья Эльфатовна. 19-тӥ сентябрьысен 23-тӥ сентябрёзь Удмуртиысь кивалтӥсьёс ужалозы Москваын: элькунмылэн Тӧроез Александр Соловьёв, Кун Кенешлэн Тӧроез Владимир Невоструев шаеренымы тодматозы Кун Думаысь, Федерацияя Кенешысь адямиосты. Отын чузъяськозы элькунмы азьын кылдэм лэчыт ужпумъёс но.

Президиуме пырисьёс соглаш луизы Софья Широбоковалэн ӵектонэныз: Правительстволы вазиськон дасяно — лэсьтӥськонъя огазеяськонъёс азьын пунэмъёсты пытсаны 1 миллиард манет мед шедьтозы. Со сяна, тросгес уксё чаклано гуртъёсын газ кысконлы. Бускельёсынымы ӵошатыса, та уж шаерамы дыг мынэ. Удмуртиысь делегация вуылӥз Марий Эл Республикае, чагыр эстӥськон кысконъя соослэсь амалъёссэс чаклазы. Лэсьтӥськонъя, архитектурая но улон инты политикая министр Иван Новиков ивортӥз: бускельёслэсь опытсэс лыдэ басьтыса, кылдытэмын нимысьтыз программа. Озьы юртъёсы газ пыртыны лякытгес луоз. Министр пусйиз, гумыосты кысконэ ӧтьыны чакласькомы инвесторъёсты: калыклэсь уксёзэ нырысь соос кутозы, гумы кыскозы, собере ини коньдонзэс висъялозы газ сётӥсь огазеяськонлы. Таӵе амал калыклы луонлык усьтоз газ кыскон понна дунэз люкетэн-люкетэн тырыны.

Елена Никитина

Удмурт Дунне
By Удмурт Дунне 16 сентября, 2015 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<