Г. Сабитовлы — 100 ар. Куноосты пумитаз Татарстанысь Кукмор посёлок

Удмурт Дунне
By Удмурт Дунне Сентябрь 23, 2015 08:51

IMG_4952Куноосты пумитазы кылбурчилэн вордӥськем палъёсаз, Татарстанысь Кукмор посёлокын.

Кукморе сюрес вакчи вылымтэ, Г. Сабитовлэн вордскем палъёсаз 5 час мыныны выримы. Но сокузьда сюрес юнме ортчемын ӧй вал. Ужрадэз дасясьёс, Удмуртиысь Национальной библиотекаын ужасьёс, Татарстанысь Кукмор ёросысь библиотека (кивалтӥсез Резида Касимова) но Кукмор ёросысь культура управление (кивалтӥсез Рамиль Нуриев) ваньзэ пыр-поч малпаллям-радъяллям. Удмуртиысь делегациез соос дуно куноосты кадь гинэ ӧз, матысь ӵыжы-выжыосты сямен пумитазы.

3 часлэсь кема кыстӥськем конференция нокинэ ӧз жадьыты. Туж тунсыкоесь вал докладъёс, кылсярысь, Удмуртиысь дано журналист Владимир Михайлов вераз Г. Сабитовен луэм серемес учыръёсты. Озьы ик кылзӥськыны сётӥз Гай Сабитовичлэсь куаразэ, удмурт Левитан лыдӟиз аслэсьтыз «Шунды но ӝужа но…» сонетъёсын тугокозэ. Филология наукаосъя кандидат Виктор Денисов мадиз, кызьы 100 ар талэсь азьло Австро-Венгриын удмурт военнопленнойёслэсь вераськемзэс фонографе гожтӥзы, нимысьтыз пусйиз Кукморысь удмуртъёсты. Нош кылбурчилэн эмеспиез, юридической наукаосъя кандидат Владимир Ившин, тодаз вайиз, кыӵе адями вал Гай Сабитов.

Котькуд докладчикез туж сак кылзӥз Кукмор ёросысь Ошторма-Юмья гуртысь Тамара Михайлова. Тамара Садыковна кукмор уӵыез умой тодэ. Т. Михайловалэн песятаез но Г. Сабитовлэн бубиз агай-вынъёс вылӥллям.

— Гай Сабитовлэн пичи дырыз секыт вал. 4 нылпиослэн анайзы вазь кулӥз, атайзы кыкетӥзэ кышнояськиз, бултырез ӟеч нылкышно вал, но Гай мынам бубиным песяймы дорынгес улӥз. Собере атайзэс жугыса виизы, агаез войнаын быриз, улонысь кошкизы ини кык сузэр-апайёсыз. Гай Сабитович арлы быдэ ми доры куное бертылӥз, семьязэ вайылӥз. Со туж яратэ вал инкуазез. Капчи мылкыдо, дыртӥсьтэм, вылтӥяськисьтэм вал. Берло дыре Г. Сабитовлэн ӵыжы-выжыосыз дорамы уг ни вуыло. Туннэ, оло, вуозы-а шуисько вал, но тани эмеспиез лыктэм. Ми туж данъяськиськом Г. Сабитовен, школаын солы сӥзем урок луэ ке, внучкае Гай Сабитовичлэсь фотооссэ, автографъёсын книгаоссэ возьматыны нуэ, — шуэ Тамара Михайлова.

Тамара Садыковна гинэ ӵыжы-выжыеныз уг данъяськы, быдэс Кукмор ёрос таӵе земляксэ яратэ. Та праздник но возьматӥз: Кукмор ёросын валче уло бигеръёс, удмуртъёс но ӟучъёс, ваньзы ик тодо но дунъяло Гай Сабитовез. Кылсярысь, аспал эшсылы сӥзьыса, ёросысь котькуд школаын ортчиз «Мон улонэз кырӟасько» конкурс. Вожвылъяськонын вормисьёс ӧтемын вал та конференцие. Соос Г. Сабитовлэсь кылбуръёссэ лыдӟизы. Залын пукисьёс зол чабизы вормисьлы Алина Галимуллиналы. Нош ёросысь «Инвожо», «Сактон», «Купанча» но «Вуюись» ансамбльёс быдэстӥзы Г. Сабитовлэсь кырӟанъёссэ.

Тодэ ваёнъёс

Удмуртиысь культура удысысь дано ужась Леонид Гусев:

— Удмурт радиоын «Шунды но ӝужа но» сонетъёсты гожтон учыр тодам лыктэ. Гай Сабитович лыдӟе, собере бӧрдыны кутске, микрофон азьысь султэ но огшап малпаськыса сылэ вал. Отӥяз нош ик микрофон азе пуксе. Ми собере тупась крезьгур отчы бырйимы, солы кельшиз, кызьы эфирын чузъясько сонетъёсыз.

Кылбурчи, журналист Владимир Михайлов:

— Гай Сабитович сярысь трос анекдотъёс верало. Кылсярысь, таӵезэ: Гай Сабитов пуке, пе, дораз но шуэ: «Маке нервничать карисько, тэркы пилёно-а, мар-а?» Радиоын ужакуз, телефон трубкаез ӝутэ вал «Кинлы, мар кулэ луи ай мон?» юанэн.

Г. Сабитовлэн эмеспиез Владимир Ившин:

— Гай Сабитовичен ми, ог-огмес валаса, улӥм. Со серекъятыны быгатӥсь но туж востэм адями вал, туж гань-гань, тэркы пильылэмез ӧвӧл.

Галина СЕМЁНОВА

Удмурт Дунне
By Удмурт Дунне Сентябрь 23, 2015 08:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<