Быгатоз-а «Удмурт Кенеш» шурлэсь ӧрзэ воштыны?

Удмурт Дунне
By Удмурт Дунне Сентябрь 20, 2015 14:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
_DSC0023

И. Семёнов.

Ӝыны ар ортчыса, 2016-тӥ арын февраль толэзе, Ижкарын ортчоз вань удмуртъёслэн Бадӟым ӧтчамзы. Историмы ӵоже 13-тӥзэ. Таин валче кыӵе ужпумъёс тужгес шугъяськыто «Удмурт Кенеш» огазеяськонэз? Кыӵе малпанъёс бугыръясько кивалтӥсезлэн Игорь Семёновлэн лул-сюлэмаз?

— Игорь Николаевич, «Удмурт Кенешлэсь» берло аръёсы ужамзэ чаклано ке, нырысь интые потэ кун кылъёс сярысь законэ воштонъёс пыртон ласянь сюлмаськемды.

— Шаерысьтымы кун кылъёс сярысь закон кутэмын 2001-тӥ арын. Сое улонэ пыӵатон вылысь ужало программаос. Трос-а, ӧжыт-а лэсьтэмын вал? Одӥг ласянь, сюрес дурын, юртъёс вылын удмурт кылын гожъямъёс кылдӥзы. Улонэ пыӵазы пӧртэм проектъёс, тужгес тунсыкоосыз егитъёсын герӟаськемын. Потӥзы книгаос, ужазы но ужало удмурт кылэз дышетонъя курсъёс, будӥз удмуртлыкез выль сямен шӧдӥсь егитъёслэн пушъетсы. Но… со вие ик лыдъян-чотан возьматӥз: калыкмылэн лыдыз ялан кулэсме, анай кылынызы вераськисьёс ӧжытгес кылё. Тужгес но та шӧдӥське гуртъёсын.

Палэнысен учкыса, закон вань, программа вань, нош луонлыкъёс… Соос но вань кадь. Соку мар люкетэ? Ужпум, нырысь ик, законлэн вужмемез бордын. Кун кылъёс сярысь закон кылдэм дырысен отчы бадӟым воштонъёс, ватсанъёс пыртэмын ӧй вал. Соя школаос асьсэос чаклало: дышетозы-а удмурт кылэз, уз-а. Со шӧлкын куд-ог директоръёс анай кыллэсь воксё палэнско. Шуом, Вотка ёросын ик одӥг школаын но удмурт кылъя урокъёс уг нуисько. Нош огъя лыдпусъёсты чаклалэ ай: 2003-тӥ арын республикаысьтымы школаосын 28 сюрслэсь трос нылпиос удмурт кылэз дышетӥзы, нош 2015-тӥ арын — 16 сюрс 500 пала. Луэ, дыр, анай-атайёсты пыкылыны. Но удмурт школаослэн кулэсмемзы меӵак герӟаськемын оптимизациен но директоръёслэн удмурт кылъя урокъёслэсь куштӥськеменызы. Кун кылъёс сярысь законэ пыртэм воштонъёс юрттысалзы та югдурысь потыны. Соин ик законын пусъёно, шаерысьтымы вань дышетскон заведениосын удмурт кылэз дышетоно шуыса.

Ужпумез ми ӝутӥмы, Удмуртилэн Тӧроеныз Александр Соловьёвен пумиськылыса но. Со шугъяськемзэ вераз: школаосын удмурт кылэз одно ик дышетоно шуим ке, мукет калыкъёслэсь правооссэс ум тӥялэ-а? «Кенешчиос» та малпанэн соглаш ӧз луэ. Юнме гинэ кышкаськом. Мордовия, Марий Эл, Коми республикаосысь школаосын вань нылпиос анай кылзэс дышето. Зэм, Комиын судъёсын выризы ик, но ваньмыз интыяз пуксиз. Веранэз ӧвӧл ни Татарстан, Башкортостан, Чечня сярысь. Асьмелэн Удмурт шаерамы кык кун кыл: ӟуч но удмурт. Мар уродэз, пинал школаысен ик удмурт кылэз, удмурт калык культураез тодыса будӥз ке?

Малпасько, асьмеос дышемын огпорма улыны. Мае ке воштыны дась ӧвӧл. Но азьланез сярысь малпаськоно ке, воштӥськонъёс одно кулэ.
Удмуртилэн Тӧроез оскытӥз: законэ пыртоно ӵектонъёсты учкыса потоз. Нялтас вераса, со дэмланъёс министерствоос пыр потэмын, эскеремын-чакламын ни.

— Туэ лэчыт вераськонъёс пуромизы удмурт учебникъёсъя. Соос федерал перечне пыремын ӧвӧл, соин ик законъя соосъя дышетыны, пе, уг яра. Та ужпумъя «Удмурт Кенеш» маке лэсьтэ-а?

— Зэмзэ но, выль, яркыт удмурт учебникъёсмы вань шуыса, шумпотыны кулэ, но соосты кутон законэз тӥян луэ. Угось учебникъёслы лицензия ӧвӧл. 1-тӥ-4-тӥ классъёслы чаклам удмурт учебникъёсты гинэ сертификация пыр поттон понна 8 миллион манет кулэ.

Туэ тулыс Шаркан, Кияса ёросъёсын прокуроръёс удмурт кыллы дышетӥсьёслэсь кылзэс юаны выризы. Ярам, югдурез тупатыны луиз. Малпасько, учебникъёс понна анай-атайёслэн, дышетӥсьёслэн йырзы висьыны кулэ ӧвӧл. Россиын 150 пала калык улэ. Анай кылын учебникъёс ласянь шугъяськонъёссы вань ваньзылэн. Та югдурез валэктыса, вазиськылӥм Удмуртилэн Тӧроезлы. Александр Соловьёв шугъяськеммес валаз. Дышетонъя но наукая министрлэн воштӥсезлы Зоя Суворовалы со куриз 4-тӥ классозь учебникъёсъя югдурез матысь дыре тупатыны. Угось Владимир Путин Россиысь дышетонъя министр азе ужпум пуктӥз: 2016-тӥ арын 1-тӥ мартозь анай кылын учебникъёсты лицензирование пыр поттон ужпумез йылаз-пумаз вуттоно.

— Таиз юан К. Герд нимо гимназимы пумысен. Азьвыл аръёсы республикалэн бюджетаз гимназилы коньдон нимаз чурен висъяське вал. Туэ та ласянь шугъяськон кылдэмын. Со сяна, верасьёс вань: малы гимназиез гинэ висъянэз?

— Туннэ нуналлы асьмелэн одӥг сыӵе лач-лач удмурт гимназимы, соин ик сое утьыны, азинтыны тыршоно. Мукет ласянь, кулэ вылэм 2-3 сыӵе гимназия, куспазы вожвылъяськыны мед быгатозы шуыса. Туала улонын вожвылъяськонтэк азьлань уд мыны.

Вуоно арын февраль толэзе вань удмуртъёслэсь Бадӟым ӧтчамзэс ортчытыны чакламын. Оргкомитетэз валтыны соглаш луиз Удмуртилэн Тӧроез. Ӧтчамлы дасяськон мынэ ни-а?
— «Удмурт Кенешлэн» исполкомаз юнматӥмы нимысьтыз ӧри. Со ужалоз уставе воштонъёс дасян бордын. Та ӧриен ачим ик кивалтӥсько.

Туннэ нуналлы вань ини ёросъёсын конференциос ортчытонъя сметаос. Сентябре люкаломы «Удмурт Кенешлэсь» ёросъёсысь кивалтӥсьёссэс, вераськомы вуоно ӧтчам пумысен. Бӧрысьгес люкаллялом республикалэн палэнысьтыз ёзъёсын кивалтӥсьёсты.

Бадӟым ӧтчаме ог 400 делегат пыриськоз. Съезд 2 нунал ӵоже мыноз.

— Игорь Николаевич, куд-огез пыкылыны выре, «Удмурт Кенеш» мӧйыосынгес ужа, егитъёс татын ӧжыт шуыса. Та пумысен мар шуысалды?

— Озьы малпасьёс вунэто, лэся, удмурт егитъёслэн «Шунды» огазеяськонзы «Удмурт Кенешлэн» бурд улаз ужа шуыса. Вань ужрадъёс огкылысь, кенешыса радъясько. Шуом, «Шундыкар» лагерез радъян. Арлы быдэ отын тужгес быгатӥсь, визьмо, таланто удмурт егитъёс шутэтско, ог-огенызы кусып тупато, вордӥсько выль малпанъёс, проектъёс. Удмурт егитъёслы чаклам мукет лагерьёс, ужрадъёс но вань на. Троссэ соосты ортчытыны «Удмурт Кенеш» юрттэ.

Со сяна, вераме потэ: ми вазиським Удмуртилэн Тӧроезлы шаерамы удмурт егитъёслэсь бадӟым форумзэс радъян сярысь. Удмуртиысь но солэн палэнысьтыз удмурт егитъёс отын кӧня ке нунал ӵоже тодон-валанзэс будэтыны, асьсэ проектъёссэс, малпанъёссэс шараяны быгатысалзы. Александр Соловьёв та форумез ортчытонэз умоен лыдъяз, аслаз бурд улаз басьтыны оскытӥз.

Нялтас вераса, али дасяськон мынэ Фин-угор калыкъёслэн конгрессылы но. Со ортчоз вуоно арын ик Финляндиын.
Туж потэ удмурт калыклы вазиськеме: эшъёс, анай кылмес азьланяз но бызись шуръя уллань лэзим ке, асьмеос быром. Зэм, уллань васькыны капчи, шурлэсь ӧрзэ берыктыны — секыт. Рос-прос удмурт пушъетъёс будэтон понна анай кылмес одно ик дышетоно. Аслэсьтыз выжызэ гажась, дунъясь но утись калык гинэ кужмо, азинлыко но быдэс дуннелы тунсыко луэ!

Елена Миннигараева

Туспуктӥз А. Горбунов

Удмурт Дунне
By Удмурт Дунне Сентябрь 20, 2015 14:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<