Бетон сурась но уй бубыли

Удмурт Дунне
By Удмурт Дунне Сентябрь 22, 2015 13:05

веросПичи Пурга ёросысь М. гуртысь Петыр ужа Ижысь бетон суранъя заводын. Туганэз ӧвӧл, соин ик толэзьлы огпол, уждун басьтэмез бере, со вуылэ уй бубылиос доры. Туннэ ӵапак со нунал. Ужзэ быдэстэмез бере Петыр пуксиз «четыркаяз» но шонтӥз Удмуртской ульчае.

Сюрес дурын сыло машинаос. Петыр но вӧзазы дугдӥз. Одӥг машинаысь 4 чебер нылъёс потӥзы но чуренак Петыр азе султӥзы. Петырлы бон котькудзэ адӟоно, пӧлысьтызы чеберзэгес быръёно. Нылъёс огезлэсь пӧртэм мукетыз: вакчи юбка улысьтызы кузь кукъёссы пишто, котырзэс маялляса кадь вылазы пукись кофтаоссы мугорзылэсь люкетъёссэ кыре потто. Петыр бырйиз пичи но буй-буй мугоро нылашез, вешамон кадь.
— Садись! — йырыныз шонтӥз уй бубылилы.

Нылаш Петырлэн машинаяз пуксиз. Петыр корт валзэ ӝуатӥз но шонтӥз пеймытгес сэрег утчаны. Магнитолаысь чузъяськиз: «Чебер нылаше, кызьы-о нимыд…» Петыр шуак луиз.

— Тон удмурт? — юаз уй бубыли.
— Бен.
— Мон но. Нимы Орина.
— Петыр.

Таӵе пӧртэм адямиосты герӟаз удмурт кырӟан. Петырлы ӟуч нылаш сюрысал ке, оло, соос пал кыл но ӧй уськытысалзы. Но солы сюриз сюлэмызлы матысез. Потэ-а тодэмды, мар сярысь вераськизы та уе бетон сурась но уй бубыли? Уй бубыли вераз, кыӵе со али шудо. Нош Петыр — кыӵе сютэм. Петырлэн тросгес тодэмез потэ ке но вал (телефонзэ юаны, дораз, уксё тырытэк, вуылыны), ӧз пӧрмы, Орина кескичгес вылэм.

Орина 9-тӥ классэз йылпумъямез бере техникуме вуз карисе дышетскыны пырем. Бускель гуртысь эшез соку Ижын дышетске вал ини. ӵошен юылӥзы, калгылӥзы, валамон, анайёсынызы лэзем уксёзы ӧз тырмылы. Озьы ик соос шедьтӥзы та ужез. Ориналэн яратоно пиез мукетыз доры кошкиз. Табере нылаш гуртаз таксиен гинэ бертылэ на, огдырлы гинэ. Картошка, йӧл, сӥль кутэ, анаезлы коньдон сётэ но берен городаз шонтэ. Ужез сюлэмызъя, малпаськыны но сюлмаськыны номыр понна.

— Кельше-а? — юаз Петыр.
— Кинэн ке кельше, кинэн ке уг.

Одӥг пол бетон суранъя заводэ, Петырлэн бригадаяз, выль ужась вуиз. Пиос тодматскизы, эшъяськизы. Нырысетӥ нуналысен ик Сандырлэн вераськон манерез Петырлы ортчыт тодмо потӥз. Малпаськиз, малпаськиз но тодаз вайиз: «Орина ӵапак озьы вераське ук!»

— Тон уд тодӥськы-а Оринаез? Тӥ палась, дыр, со, удмурт кылын тон кадьгес ик вераське, — юаз Петыр Сандырлэсь.
— Ма, Оринаос трос ми палан. Туспуктэмез вань-а?
— Ӧвӧл. Со уй бубыли.
— Возьма. Тодӥсько кадь. «Контактысь» шедьто али.

Вотэсысь шедьтэм туспуктэмысь Петыр тодмаз Оринаез. Табере со тодэ, кытысь нылаш. Табере Петыр Орина сярысь троссэ тодэ.

Тыпыр-тапыр Олён

Удмурт Дунне
By Удмурт Дунне Сентябрь 22, 2015 13:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<