Банкъёс азьын пунэме кылемъёслэн лыдзы йылэ

Удмурт Дунне
By Удмурт Дунне 29 сентября, 2015 13:01
4-25

Банкрот тыриськонъёслэсь воксё пегӟыны уз быгаты.

Кылем арня вискын Пичи Пурга черкогуртысь 34 аресъем воргорон ассэ быдтӥз. Аслаз пыӵалэныз азбараз ыбиськем. Со курытэныз эшъяське вылэм, таин йырин ужзэ ыштэм, кузпалыз со дорысь кошкем. Трос кредитъёсыз вылӥллям, соосты пытсаны быгатымтэ ни, ассэ быдтоно кариськем.

Секыт югдуре шедем муртъёслы юрттон вылысь странаямы 4 ар ужа ни «Финансовая помощь» федерал центр. Татын визь-кенеш дунтэк сёто секыт югдуре шедемъёслы. Центрлэн улосъёсын кусып возёнъя ёзэзлэн кивалтӥсез Денис Король ивортэмъя, вазиськисьёс берло дыре шӧдскымон йылӥзы. Россиысь котькуд 4-тӥез кредит басьтэм адями пунэмъёссэ маин пытсаны ӟудэмын. Уноез пунэмъёссэ пытсан вылысь выль кредит басьтэ — озьы дасо аръёсын тыриськонъёсысь уг пота. Кылсярысь, Челябинскысь воргорон кредитъёссэ пытсаны пќртэм банкъёслэсь 67 пол пунэмаськылэм. Мар кароно, пунэмъёстэ пытсаны шугъяськиськод ке? Денис Король ӵектэ:

1. Шулӟектоно ӧвӧл. Котькыӵе секыт югдурысь потон сюрес вань. Милям центрмы уен-нуналэн дунтэк юрттыны дась: вамышен-вамышен валэктомы, ма кароно секыт югдурысь потон понна. Юристъёслэн визь-кенешсы кулэ луиз ке, уксёды ӧвӧл бере, утчалэ кун чотын юрттэт сётӥсьёссэ яке адямилэсь правооссэ утёнъя огазеяськонъёсты.

2. Банк тӥ вылэ ӝоггес судэ мед сётоз. Угось суд решение кутэм бере кредитъя процентъёс люкаськемысь дугдозы. Та бӧрсьы ужзэс мыто судъя приставъёс: должниклэн ваньбурез сярысь ивор куро пӧртэм ёзъёсысь, шуом, БТИ-ысь, Пенсиосъя кун фондысь но трос мукет. Солэн нокыӵе ваньбурез ӧвӧл ке, озьыен, таланы но солэсь номырзэ. Уждун но уг басьты ке, приставъёс акт гожто, адямиез ёртэмысь дугдо. Нош ваньбурез ӧвӧл, но уждун басьтэ ке, отысь кӧня ке люкетсэ сётозы пунэмез пытсаны. Законъя уждунысь бадӟым люкетсэ таланы лэземын ӧвӧл, со улыны тырмыны кулэ.

3. Туэ октябрь толэзьысен Россиын пыӵаны кутске нимаз адямиосты банкротэн ялон сярысь федерал закон. Талэсь азьло асьсэды банкротэн ялыны луонлыксы вал огазеяськонъёслэн гинэ. Адямиез банкротэн лыдъя суд, адями борды со юнматыны быгатоз коньдон ужпумъёсъя управляющиез. Со чакласа возёз банкрот луэм муртлэсь коньдонъя, ваньбуръя югдурзэ, та понна солы банкрот кӧня ке уксё тыроно луоз.

Банкрот тыриськонъёслэсь воксё пегӟыны уз быгаты. Ваньбурзэ талалозы (кредит залоге сётэмын ке) яке пунэмъёссэ ичиен пытсатозы. Ассэ банкротэн ялыны луонлык адямилы сётӥське 5 арлы огпол.

4. Уноез банкъёс пунэмъёс борды пӧртэм тыриськонъёс, комиссиос лякыны тыршо. Та понна соосты судын янгыш карыны луэ. Соин ик коньдон ужпумъёсъя тодон-валанэз будэтон нокинлы мултэс луымтэ на, шуэ Д. Король.
Пунэмъёстэс дыраз берыктыны уд быгатӥське ке, жингыртэ 8-800-700-87-10 номеръя. Отын визь-кенешен юрттозы.

Елена Тугашова

Удмурт Дунне
By Удмурт Дунне 29 сентября, 2015 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<